Jaipur Food Poisoning Case: રાજસ્થાનના પાટનગર જયપુરમાંથી એક અત્યંત હૃદયદ્રાવક ઘટના સામે આવી છે, જ્યાં ઘરે બનાવેલા નૂડલ્સ ખાધા બાદ 7 વર્ષની બાળકીનું કરૂણ મૃત્યુ નીપજ્યું છે, જ્યારે તેની મોટી બહેન બીમાર પડી હતી. આ સમગ્ર મામલે તંત્ર દ્વારા ફૂડ પોઈઝનિંગની આશંકા વ્યક્ત કરવામાં આવી રહી છે. આ ઘટનાને પગલે પરિવારમાં ભારે શોકનો માહોલ છવાઈ ગયો છે.
ઘરે એકલી રહેલી બંને બહેનોએ નૂડલ્સ બનાવ્યા હતા
પ્રાપ્ત માહિતી મુજબ, આ ઘટના 19 નવેમ્બરના રોજ બની હતી. તે દિવસે બે બહેનો પીહુ કુમાવત અને દિવ્યાંશી ઘરે એકલી હતી અને બંનેએ સાથે મળીને નૂડલ્સ બનાવ્યા હતા. અધિકારીઓના જણાવ્યા અનુસાર, નૂડલ્સ ખાધા બાદ બંને બહેનો સૂઈ ગઈ હતી.
બપોરે લગભગ 3:00 વાગ્યાની આસપાસ જ્યારે તેમની માતા ઘરે પરત ફરી, ત્યારે મોટી બહેન દિવ્યાંશી અસ્વસ્થ હાલતમાં જાગી હતી, જ્યારે નાની બહેન પીહુ બેભાન અવસ્થામાં જોવા મળી હતી. પરિવારજનો તાત્કાલિક બંને બહેનોને સારવાર અર્થે નજીકની હોસ્પિટલમાં લઈ ગયા હતા, જ્યાં ફરજ પરના ડોક્ટરોએ 7 વર્ષની પીહુ કુમાવતને મૃત જાહેર કરી હતી.
પોસ્ટમોર્ટમ રિપોર્ટની રાહ
હોસ્પિટલમાં દાખલ કરવામાં આવેલી મોટી બહેન દિવ્યાંશીને તબીબી સારવાર આપવામાં આવી હતી. તબિયતમાં સુધારો થતા શુક્રવારે સવારે તેને હોસ્પિટલમાંથી રજા આપવામાં આવી હતી. પ્રાથમિક તબક્કે આ ઘટના ફૂડ પોઈઝનિંગની હોવાનું અનુમાન સેવાઈ રહ્યું છે, પરંતુ પીહુના મૃત્યુનું ચોક્કસ કારણ પોસ્ટમોર્ટમ રિપોર્ટ આવ્યા બાદ જ સ્પષ્ટ થઈ શકશે.
નૂડલ્સના નમૂના લેબોરેટરીમાં મોકલાયા
આ દુઃખદ ઘટના અંગે પરિવારજનો દ્વારા પોલીસમાં ફરિયાદ નોંધાવવામાં આવી છે. ફરિયાદના આધારે કરધાની પોલીસે ઘટનાસ્થળેથી નૂડલ્સના નમૂના કબજે લઈને પરીક્ષણ અર્થે લેબોરેટરીમાં મોકલી આપ્યા છે, જેથી ખોરાકમાં કોઈ ઝેરી તત્વ કે બગાડ હતો કે કેમ તે જાણી શકાય.
વધુમાં, પોલીસ અને તંત્રના અધિકારીઓએ જણાવ્યું છે કે આ બંને બહેનોનો ભાઈ ગોવિંદ પણ બીમારીના કારણે છેલ્લા બે મહિનાથી હોસ્પિટલમાં સારવાર હેઠળ દાખલ છે. પરિવાર પર એકસાથે આવી પડેલી આ મુસીબતોને કારણે સ્થાનિક વિસ્તારમાં પણ ઘેરો શોક વ્યાપી ગયો છે.
