Jagtar Singh Hawara Parole: પંજાબના પૂર્વ મુખ્યમંત્રી બેઅંત સિંહની હત્યાના કેસમાં જેલમાં બંધ જગતાર સિંહ હવારા પોતાની વૃદ્ધ અને બીમાર માતાને મળવા માટે 1 દિવસના પેરોલ પર આવવા સંમત થયા છે. જોકે, હજી સુધી પેરોલ અંગે કોઈ લેખિત આદેશ જાહેર કરવામાં આવ્યો નથી, અને મુલાકાતની તારીખ પણ નક્કી થઈ નથી. કૌમી ઈન્સાફ મોરચાના નેતા ગુરુચરણ સિંહ હવારાએ આ બાબતની પુષ્ટિ કરી છે.
CM ભગવંત માને કરી હતી પેરોલ માટે ભલામણ
ગુરુચરણ સિંહના જણાવ્યા અનુસાર, પંજાબના મુખ્યમંત્રી ભગવંત માને અગાઉ જગતાર સિંહ હવારાને પોતાના પૈતૃક ગામ જઈને માતાને મળવા માટે 10 દિવસનાપેરોલ આપવાની ભલામણ કરી હતી. જોકે, સુરક્ષા અને અન્ય તકનીકી કારણોસર આ પ્રસ્તાવ પર આખરી નિર્ણય થઈ શક્યો નહોતો.
માતા સાથે વિતાવવા મળશે 7-8 કલાકનો સમય
જગતાર સિંહ હવારાની માતાની બગડતી તબિયતને ધ્યાનમાં રાખીને પરિવાર અને કૌમી ઈન્સાફ મોરચાની સમન્વય સમિતિ દ્વારા તેમને 1 દિવસના પેરોલ સ્વીકારવા અપીલ કરી હતી, જેના પર જગતાર સિંહ હવારાએ પોતાની સંમતિ આપી દીધી હતી.
પ્રસ્તાવિત વ્યવસ્થા મુજબ, જગતાર સિંહ હવારાને પોતાની માતા અને પરિવારના અન્ય સભ્યો સાથે આશરે 7 થી 8 કલાક વિતાવવાનો સમય મળી શકે છે. જોકે, દિલ્હીથી પંજાબ આવવા-જવામાં લાગનાર સમય આમાં સામેલ રહેશે નહીં. પ્રશાસન તરફથી મુલાકાત માટે જરૂરી પરિવહન અને સુરક્ષા વ્યવસ્થા પૂરી પાડવાની ખાતરી આપવામાં આવી છે.
કાનૂની પ્રક્રિયા પૂર્ણ થયા બાદ નક્કી થશે તારીખ
ગુરશરણ સિંહે સ્પષ્ટ કર્યું છે કે, હાલમાં 1 દિવસના પેરોલ અંગે માત્ર મૌખિક સંમતિ સધાઈ છે. હજી સુધી કોઈ લેખિત આદેશ જાહેર થયો નથી. કાનૂની ઔપચારિકતાઓ પૂર્ણ થયા બાદ હવારા તેમની માતાને ક્યારે મળશે તેની તારીખ સ્પષ્ટ થઈ શકશે. માતાની ખરાબ તબિયત વચ્ચે હવે પરિવારને આશા છે કે જરૂરી પ્રક્રિયા પૂર્ણ થયા બાદ માતા અને પુત્રના મિલનનો રસ્તો સાફ થઈ જશે.