Prashant Kishor Family Tree: જન સુરાજના સ્થાપક પ્રશાંત કિશોર આ દિવસોમાં ચર્ચામાં છે. ચૂંટણી રણનીતિકાર ગણાતા પ્રશાંત કિશોરને એક પણ બેઠકમાં જીત મળી નથી, જે એક ચર્ચામાં વિષય છે. કારણ કે જે પીએમ નરેન્દ્ર મોદીથી લઈ મમતા બેનર્જી તેમજ નીતિશ કુમાર જેવા નેતાઓને સત્તા સુધી પહોંચાડવામાં તેમનો ફાળો રહ્યો છે. ચાલો જાણીએ શું કરે છે તેમનો પરિવાર
પ્રશાંત કિશોરનો પરિવાર
પ્રશાંત કિશોરનો જન્મ તેમના પૈતૃક ગામ રોહતાસ જિલ્લાના કોનાર ખાતે 20 માર્ચ, 1977ના રોજ એક બ્રાહ્મણ પરિવારમાં થયો હતો. ડૉ. શ્રીકાંત પાંડેય વ્યવસાયે ડૉક્ટર હતા. તેમણે લાંબા સમય સુધી બક્સર અને શાહપુરમાં સેવા આપી હતી. બક્સર ખાતે પણ તેમનું ઘર છે અને પરિવારના સભ્યોની અવરજવર રહે છે. જ્યારે તેમના માતા સુશીલા પાંડેય ગૃહિણી હતા. પીકેના મતે તેમના પિતા કોંગ્રેસી હતા, જ્યારે તેમની માતા સુશીલા પાંડે રાજકારણના સખત વિરોધી હતા. પ્રશાંત કિશોરના માતા-પિતા બંનેનું નિધન થઈ ચૂક્યું છે.
પ્રશાંત કિશોરને એક મોટા ભાઈ છે, જેમનું નામ અજય કિશોર છે. પીકેને બે બહેનો પણ છે, જેમાંથી એક દિલ્હીમાં રહે છે અને તેમના પતિ આર્મી ઓફિસર છે.
પીકેની પત્ની જાહ્નવી પણ વ્યવસાયે ડૉક્ટર છે. તે આસામના ગુવાહાટીની રહેવાસી છે. એક માહિતી અનુસાર, પીકે અને જાહ્નવીની મુલાકાત સંયુક્ત રાષ્ટ્ર સંઘના એક સ્વાસ્થ્ય કાર્યક્રમમાં થઈ હતી. ત્યાંથી તેમની મિત્રતા થઈ, જે પછી પ્રેમમાં બદલાઈ અને બંનેએ લગ્ન કર્યા હતા. તેમને એક પુત્ર પણ છે. હાલમાં જાહ્નવીએ પોતાની તબીબી પ્રેક્ટિસ છોડી દીધી છે અને પ્રશાંત અને તેના પુત્ર સાથે બિહારમાં રહે છે.
પક્ષો માટે બનાવતા હતા જીતની ફોર્મ્યુલા
ચૂંટણીના રાજકારણમાં જોડાતા પહેલા પ્રશાંત કિશોર રાજકીય પક્ષો માટે જીતની ફોર્મ્યુલા બનાવતા હતા. તેમણે 2015ની બિહાર વિધાનસભા ચૂંટણીમાં નીતિશ કુમારનો ચહેરો ચમકાવવામાં અને મહાગઠબંધનની જીતમાં મહત્વની ભૂમિકા ભજવી હતી. આ ઉપરાંત તેઓ ભાજપ, કોંગ્રેસ, ટીએમસી વગેરે પક્ષો માટે પણ રણનીતિ બનાવી ચૂક્યા છે.
જ્યારે નરેન્દ્ર મોદી સત્તામાં આવ્યા
ઇન્ટરવ્યૂ દરમિયાન પીકેએ એક વાર કહ્યું હતું કે બિહારમાં 2015 ની સરકારમાં તેમનો નોંધપાત્ર પ્રભાવ હતો. જો તેમને કોઈ પદ જોઈતું હોત તો તેમણે તે સમયે તે પ્રાપ્ત કર્યું હોત. બિહારની ચૂંટણી જીત્યા પછી નીતિશે કિશોરને તેમના સલાહકાર તરીકે નિયુક્ત કર્યા હતા. 2014 માં જ્યારે નરેન્દ્ર મોદી પહેલીવાર વડાપ્રધાન બન્યા ત્યારે એક નામ સૌથી વધુ ચર્ચામાં હતું. આ નામ પ્રશાંત કિશોર હતું. તેમણે વડાપ્રધાન મોદીના ચૂંટણી કેમ્પેઈન ડિઝાઈન કર્યું હતું.
પંજાબ અને આંધ્ર પ્રદેશમાં ચૂંટણીના રણનીતિકાર
2016માં કોંગ્રેસે પ્રશાંત કિશોરને પંજાબ વિધાનસભા માટે ચૂંટણી રણનીતિ ઘડવા માટે નિયુક્ત કર્યા. સતત બે હાર બાદ કોંગ્રેસે 2017માં પ્રશાંત કિશોરની રણનીતિનો ઉપયોગ કરીને પંજાબમાં સત્તામાં પાછી ફરી. કોંગ્રેસે 2017ની ઉત્તર પ્રદેશ ચૂંટણી માટે કિશોરની નિમણૂક કરી, પરંતુ તેઓ ત્યાં નિષ્ફળ રહ્યા. ત્યારબાદ મે 2017 માં વાય.એસ. જગનમોહન રેડ્ડી દ્વારા કિશોરને રાજકીય સલાહકાર તરીકે નિયુક્ત કરવામાં આવ્યા. તેમણે રેડ્ડીના ચૂંટણી પ્રચારના કેમ્પેઈન ડિઝાઇન કર્યા અને વાયએસઆરસીપી 175 માંથી 151 બેઠકો જીતીને સત્તામાં પાછી આવી.
દિલ્હી અને પશ્ચિમ બંગાળ ચૂંટણીના રણનીતિકાર
2020 ની દિલ્હી વિધાનસભા ચૂંટણીમાં આમ આદમી પાર્ટીના ચૂંટણી રણનીતિકાર પણ પ્રશાંત કિશોર હતા. આમ આદમી પાર્ટીએ 70 માંથી 62 બેઠકો જીતીને પ્રચંડ વિજય મેળવ્યો. કિશોરને 2021 ની પશ્ચિમ બંગાળ વિધાનસભા ચૂંટણી માટે તૃણમૂલ કોંગ્રેસના સલાહકાર તરીકે નિયુક્ત કરવામાં આવ્યા હતા અને તેમની સફળ રણનીતિને કારણે મમતા બેનર્જીએ 294 માંથી 213 બેઠકો જીતીને પ્રચંડ વિજય મેળવ્યો હતો.
2021 માં તેઓ ડીએમકેના વડા એમકે સ્ટાલિન માટે રણનીતિકાર હતા. તેમના સંચાલન હેઠળ ડીએમકેએ 159 બેઠકો સાથે ચૂંટણી જીતી હતી અને સ્ટાલિન પ્રથમ વખત તમિલનાડુના મુખ્યમંત્રી બન્યા હતા.