India Weather Update 24 September: ઉત્તર આંધ્રપ્રદેશ અને દક્ષિણી ઓડિશાના દરિયાકાંઠે ચક્રવાત અર્નબ ટકરાયું છે, જેના કારણે આ વિસ્તારોમાં ભારે વરસાદ અને ભારે પવન ફૂંકાવાની શક્યતા છે. ઓડિશાના 6 જિલ્લા ગજપતિ, કોરાપુટ, રાયગડા, નબરંગપુર, કાલહાંડી અને ગંજામને રેડ ઝોનમાં મૂકવામાં આવ્યા છે. બીજી તરફ, દિલ્હીમાંથી ચોમાસું નક્કી સમય કરતાં 2 દિવસ પહેલાં જ પૂર્ણ થયું છે. રાજસ્થાનમાં પણ ગરમી વધી રહી છે.
આંધ્ર અને ઓડિશાના કાંઠે ટકરાયું વાવાઝોડું 'અર્નબ'
બંગાળની ખાડીમાં સર્જાયેલું વાવાઝોડું 'અર્નબ' ઉત્તર આંધ્રપ્રદેશ અને દક્ષિણી ઓડિશાના દરિયાકાંઠે ટકરાઈ ચૂક્યું છે. ભારતીય હવામાન વિભાગ (IMD)ના જણાવ્યા અનુસાર, આ ચક્રવાત જમીન તરફ આગળ વધતાં આંધ્રપ્રદેશ અને ઓડિશાના કેટલાક ભાગોમાં ભારે વરસાદ સાથે ઝડપી પવન ફૂંકાશે. વાવાઝોડાના પગલે ઓડિશાના ગજપતિ, કોરાપુટ, રાયગડા, નબરંગપુર, કાલહાંડી અને ગંજામ જિલ્લાને રેડ ઝોનમાં રાખવામાં આવ્યા છે.
ઓડિશામાં 230 mm વરસાદ, બિહાર-MPમાં ચેતવણી
ઓડિશામાં મંગળવારથી જ વરસાદ ચાલુ છે, અને વાવાઝોડું કિનારે ટકરાયા બાદ વરસાદની તીવ્રતામાં વધારો થયો છે. છેલ્લા 24 કલાકમાં કોરાપુટ જિલ્લાના સેમિલીગુડામાં સૌથી વધુ 230 મીમી અને જયપુરમાં 161 મીમી વરસાદ નોંધાયો છે. હવામાન વિભાગે મધ્યપ્રદેશના છિંદવાડા, સિવની અને બાલાઘાટ જિલ્લામાં ભારે વરસાદનું એલર્ટ આપ્યું છે. આ ઉપરાંત બિહારમાં વરસાદનું યલો એલર્ટ છે. તેમજ 24 અને 25 સપ્ટેમ્બરના રોજ તેલંગાણામાં પણ અતિભારે વરસાદની ચેતવણી આપવામાં આવી છે.
દિલ્હીમાંથી ચોમાસાની બે દિવસ વહેલી વિદાય
રાજધાની દિલ્હીમાંથી ચોમાસું તેના નિયત સમય કરતાં બે દિવસ પહેલા વિદાય લઈ ચૂક્યું છે. સામાન્ય રીતે દિલ્હીમાંથી ચોમાસાની વિદાય 25 સપ્ટેમ્બરે થતી હોય છે. આ વર્ષે દિલ્હીમાં સામાન્ય 629.7 મીમી વરસાદની સરખામણીએ 16 ટકા વધુ એટલે કે 728.6 મીમી વરસાદ નોંધાયો છે. હવામાન વિભાગ અનુસાર પંજાબ, હરિયાણા, રાજસ્થાન મોટાભાગના વિસ્તારો તેમજ ઉત્તર પ્રદેશ અને ગુજરાતના કેટલાક વિસ્તારોમાં પણ ચોમાસું પાછું ખેંચાયું છે.
રાજસ્થાનમાં સપ્ટેમ્બરમાં મે-જૂન જેવી ગરમી
રાજસ્થાનમાં વરસાદી ગતિવિધિઓ અટકી જતાં જ તાપમાનમાં અચાનક ઉછાળો જોવા મળ્યો છે. જેસલમેરમાં મહત્તમ તાપમાન 41 ડિગ્રી સેલ્સિયસ અને બિકાનેર તથા બાડમેરમાં 40 ડિગ્રી સેલ્સિયસથી ઉપર નોંધાયું છે. સપ્ટેમ્બર મહિનો હોવા છતાં સ્થાનિક લોકોને મે અને જૂન મહિના જેવી કાળઝાળ ગરમી અનુભવાઈ રહી છે.