Independence Day Terror Alert: 15મી ઓગસ્ટ એટલે કે સ્વતંત્રતા દિવસની ઉજવણી પૂર્વે દેશની ગુપ્તચર એજન્સીઓએ એક અત્યંત ગંભીર અને સણસણતી ચેતવણી જારી કરી છે. પાકિસ્તાનની ગુપ્તચર એજન્સી ISI ના ઈશારે કામ કરતા ભારત વિરોધી આતંકવાદી તત્વો સ્વતંત્રતા દિવસની આસપાસ દેશમાં મોટો આતંકી હુમલો કરવાનું કાવતરું ઘડી રહ્યા છે. ગુપ્તચર અહેવાલો મુજબ, પાકિસ્તાન માત્ર સરહદી વિસ્તારો પૂરતું સીમિત ન રહેતા દેશના આંતરિક ભાગોને પણ નિશાન બનાવવાની ફિરાકમાં છે, જેને પગલે દેશભરની તમામ સુરક્ષા એજન્સીઓને ઉચ્ચ ચેતવણી પર મૂકી દેવામાં આવી છે.
ISI નો પ્લાન: 15 ઓગસ્ટની ઉજવણી વચ્ચે હુમલાનો પ્રયાસ
ઇન્ટેલિજન્સ બ્યુરો (IB) ના એક વરિષ્ઠ અધિકારીના જણાવ્યા અનુસાર, ISI નું માનવું છે કે 15મી ઓગસ્ટની ઉજવણીને કારણે દિલ્હી અને જમ્મુ-કાશ્મીરમાં સુરક્ષા દળોનું ધ્યાન મુખ્ય કાર્યક્રમો પર કેન્દ્રિત રહેશે. આ સ્થિતિનો અયોગ્ય લાભ ઉઠાવીને ISI સ્વતંત્રતા દિવસ પર કે તે પહેલાં કોઈ મોટી ઘટનાને અંજામ આપવા માંગે છે.
આ કાવતરા હેઠળ:
- ઘૂસણખોરીના પ્રયાસો: આતંકવાદી તત્વો સૌપ્રથમ જમ્મુ-કાશ્મીર સરહદેથી આતંકીઓની ઘૂસણખોરી કરાવવાનો પ્રયાસ કરશે.
- બાંગ્લાદેશ સરહદનો ઉપયોગ: પૂર્વ સરહદે બાંગ્લાદેશ મારફતે પણ આતંકવાદીઓને ભારતમાં ધકેલવાના સતત પ્રયાસો થઈ રહ્યા છે.
- ટાયર-II શહેરો નિશાન પર: મેટ્રો કે મોટા શહેરોની સરખામણીએ ટાયર-II (નાના અને મધ્યમ) શહેરોમાં સુરક્ષા વ્યવસ્થા સામાન્ય રીતે ઓછી કડક હોય છે, તેથી ISI આ શહેરોને સોફ્ટ ટાર્ગેટ બનાવવાની યોજના બનાવી રહી છે.
પાકિસ્તાનમાં અશાંતિથી ધ્યાન ભટકાવવાનો પ્રયાસ
અધિકારીએ વધુમાં ઉમેર્યું હતું કે સરહદ પારથી થતા સંદેશાવ્યવહાર પરથી સ્પષ્ટ થાય છે કે આ સમયે ISI અને પાકિસ્તાની સૈન્ય ભારે દબાણ હેઠળ છે. પાકિસ્તાનના કબજા હેઠળના કાશ્મીર (PoK) અને બલુચિસ્તાન જેવા પ્રદેશોમાં વ્યાપક આંતરિક અશાંતિ અને વિરોધ પ્રદર્શનોના કારણે પાકિસ્તાની શાસન બેકફૂટ પર આવી ગયું છે. પોતાના દેશની આંતરિક નિષ્ફળતાઓ અને જનતાના અસંતોષથી ધ્યાન ભટકાવવા માટે પાકિસ્તાન ભારત પર હુમલો કરવાનું કાવતરું ઘડી રહ્યું છે. હાલમાં દેશની તમામ આંતરરાષ્ટ્રીય સરહદો, એરપોર્ટ, રેલવે સ્ટેશનો અને સંવેદનશીલ સ્થળો પર સુરક્ષા વ્યવસ્થા અત્યંત સઘન કરી દેવામાં આવી છે.