Imran Khan Apology: બોલિવૂડ અભિનેતા ઇમરાન ખાન માટે મુશ્કેલીઓ વધી રહી છે. મતદાતા યાદીના SIR (સ્પેશિયલ સમરી રિવિઝન) વિરોધી પ્રદર્શનમાં ભાગ લેવાના કારણે સરકારી તંત્ર દ્વારા તેમને આપવામાં આવેલી ભારત છોડો નોટિસ (Leave India Notice)ના મામલે બોમ્બે હાઈકોર્ટે અત્યંત સખત વલણ અપનાવ્યું છે. કોર્ટની ભારે ફટકાર બાદ અભિનેતા ઇમરાન ખાને કોર્ટ સમક્ષ બિનશરતી માફી માગવાની તૈયારી દર્શાવી છે.
શું છે સમગ્ર વિવાદ?
આ પણ વાંચો
છેલ્લા ઘણા સમયથી ભારતમાં રહી રહેલા અભિનેતા ઇમરાન ખાન પાસે અમેરિકન નાગરિકતા છે અને તેઓ ભારતમાં OCI (Overseas Citizen of India) કાર્ડધારક તરીકે રહે છે. તાજેતરમાં યોજાયેલા SIR વિરોધી આંદોલનમાં તેઓ સામેલ થયા હતા.
વિદેશી નાગરિક હોવા છતાં ભારતના આંતરિક રાજકીય કે ચૂંટણી સબંધી પ્રદર્શનમાં ભાગ લેવો એ OCIના નિયમોનું ઉલ્લંઘન ગણાય છે. આ નિયમભંગ બદલ સંબંધિત સત્તાવાળાઓએ તેમને તાત્કાલિક ભારત છોડવાની નોટિસ ફટકારી હતી, જેને ઇમરાન ખાને બોમ્બે હાઈકોર્ટમાં પડકારી હતી.
"માત્ર બાંહેધરી કે સોગંદનામું પૂરતું નથી" - બોમ્બે હાઈકોર્ટ
સુનાવણી દરમિયાન મુખ્ય ન્યાયાધીશ મહેશ ચંદ્રની અધ્યક્ષતાવાળી ખંડપીઠે ઇમરાન ખાનની અરજી પર ગંભીર નારાજગી વ્યક્ત કરી હતી. ઇમરાન ખાનના વકીલે કોર્ટને વિનંતી કરી હતી કે તેઓ ભવિષ્યમાં આવા કોઈ પ્રદર્શનમાં ભાગ નહીં લે તેવું સોગંદનામું (Affidavit) આપવા તૈયાર છે અને તેમને ભારતમાં જ રહેવા દેવામાં આવે.
આ દલીલને ફગાવતા હાઈકોર્ટે સ્પષ્ટ શબ્દોમાં કહ્યું- માત્ર સોગંદનામું આપવાથી કામ નહીં ચાલે. અભિનેતાએ પોતાના આ વર્તન બદલ કોર્ટ અને દેશ સમક્ષ બિનશરતી માફી (Unconditional Apology) માગવી પડશે.
કોર્ટના તીખા સવાલો
સુનાવણી દરમિયાન બોમ્બે હાઈકોર્ટે ઇમરાન ખાનને કેટલાક આકરા સવાલો પૂછ્યા હતા. કોર્ટે અમેરિકાનું ઉદાહરણ આપતા કહ્યું કે- જો કોઈ ભારતીય નાગરિક અમેરિકા જઈને ત્યાંના આંતરિક મુદ્દાઓ કે નિયમો સામે વિરોધ પ્રદર્શન કરે, તો ત્યાંની સરકાર કેવો વ્યવહાર કરશે? તેને તો બીજી જ ફ્લાઇટમાં ડિપોર્ટ કરીને ભારત પાછો મોકલી દેવાયો હોત.
ભારતીય નાગરિકો અને OCI કાર્ડધારકોના અધિકારો વચ્ચે બહુ મોટો તફાવત હોય છે. તમે ત્યાં કયા હેતુથી ગયા હતા તે સ્પષ્ટ કરો.
કોર્ટે વધુ વેધક સવાલ પૂછ્યા હતા કે- તમે આટલા વર્ષોથી ભારતમાં રહો છો, પરંતુ અગાઉ ક્યારેય કોઈ પ્રદર્શનમાં નથી દેખાયા. હવે અચાનક આ SIR આંદોલનમાં શા માટે જોડાયા?
કોર્ટે ટકોર કરતા જણાવ્યું હતું કે SIR એ મતદાતા યાદી સાથે જોડાયેલો મુદ્દો છે, જેની સાથે OCI કાર્ડધારક તરીકે ઇમરાન ખાનને કોઈ લેવાદેવા હોવી જોઈએ નહીં.
ઇમરાન ખાનની સફાઈ અને માફી
અદાલતના કડક વલણને જોઈને ઇમરાન ખાને પોતાના બચાવમાં જણાવ્યું કે, તેમનો વિરોધ પ્રદર્શનના આયોજકો સાથે કોઈ સીધો કે અપ્રત્યક્ષ સંબંધ નહોતો. કોર્ટની સૂચના બાદ તેમણે સ્વીકાર્યું કે તેઓ કોઈપણ શરત વગર પોતાની ભૂલ સ્વીકારીને માફીનામું રજૂ કરશે.
7 ડિસેમ્બર સુધી નોટિસ પર સ્ટે
અભિનેતા દ્વારા બિનશરતી માફી માગવાની સહમતિ દર્શાવ્યા બાદ, બોમ્બે હાઈકોર્ટે રાહત આપતા આ મામલાની આગામી સુનાવણી 7 ડિસેમ્બર સુધી મુલતવી રાખી છે. ત્યાં સુધી અધિકારીઓ દ્વારા ઇમરાન ખાનને આપવામાં આવેલી 'ભારત છોડો નોટિસ'ના અમલ પર હંગામી સ્ટે લગાવી દેવામાં આવ્યો છે.