IMD Weather Alert 20 October: દેશમાંથી ચોમાસાની વિદાયની પ્રક્રિયા ચાલી રહી છે તેવા સમયે ભારતીય હવામાન વિભાગ (IMD) એ એક ચિંતાજનક નવી ચેતવણી જારી કરી છે. હવામાન વિભાગના તાજા અનુમાન મુજબ આજે, 20 ઓક્ટોબરના રોજ રાજધાની દિલ્હી, ઉત્તર પ્રદેશ, બિહાર, પશ્ચિમ બંગાળ અને ઓડિશા સહિત દેશના 17 થી વધુ રાજ્યોમાં તેજ વાવાઝોડા સાથે ભારે વરસાદ પડવાની પ્રબળ શક્યતા છે. આ દરમિયાન પવનની ઝડપ પ્રતિ કલાક 70 km સુધી પહોંચી શકે છે.
હવામાનમાં અચાનક આવેલા આ પલટા પાછળ બંગાળની ખાડીના દક્ષિણ-પશ્ચિમ ભાગમાં સર્જાયેલું સાયક્લોનિક સર્ક્યુલેશન અને તમિલનાડુના ઉત્તરીય ભાગો પર સક્રિય ઉપલા સ્તરનું પરિભ્રમણ જવાબદાર છે. આ પરિબળોને કારણે પહાડી રાજ્યોમાં હિમવર્ષા અને ભૂસ્ખલનનું જોખમ ઊભું થયું છે, જ્યારે દરિયાકાંઠાના વિસ્તારોમાં તોફાની પવનને કારણે માછીમારોને દરિયામાં ન ખેડવાની કડક સલાહ આપવામાં આવી છે.
આ 17 રાજ્યોમાં હવામાન બગડશે
IMD ના જણાવ્યા મુજબ કેરળ, તમિલનાડુ, પશ્ચિમ બંગાળ, દિલ્હી, છત્તીસગઢ, ઉત્તર પ્રદેશ, આસામ, જમ્મુ અને કાશ્મીર, બિહાર, હિમાચલ પ્રદેશ, કર્ણાટક, પંજાબ, ઉત્તરાખંડ, રાજસ્થાન, આંધ્રપ્રદેશ, સિક્કિમ અને ઓડિશામાં ગાજવીજ સાથે ભારે વરસાદની ચેતવણી આપવામાં આવી છે.
દિલ્હી-NCRનું હવામાન:
IMD એ દિલ્હી માટે ખાસ યલો એલર્ટ જારી કર્યું છે. પ્રતિ કલાક 30 km ની ઝડપે પવન ફૂંકાવાની અને ભારે વરસાદની શક્યતા છે. દિલ્હીમાં આજે મહત્તમ તાપમાન 31°C અને લઘુત્તમ તાપમાન 19°C રહેવાનો અંદાજ છે.
ઉત્તર પ્રદેશનું હવામાન:
શ્રાવસ્તી, અલીગઢ, બિજનૌર, દેવરિયા, મથુરા, કુશીનગર, આગ્રા, હરદોઈ, મેરઠ, હમીરપુર અને સહારનપુરમાં 70 km/h ની ઝડપે પવન સાથે ભારે વરસાદનું એલર્ટ છે. લખનૌમાં મહત્તમ તાપમાન 32°C અને લઘુત્તમ તાપમાન 18°C રહેશે.
બિહારનું હવામાન:
બેગુસરાય, ભાગલપુર, મુંગેર, કટિહાર, અરારિયા, કિશનગંજ, પૂર્ણિયા, સુપૌલ, ગયા, વૈશાલી, બક્સર સહિતના મોટાભાગના જિલ્લાઓમાં તોફાની વરસાદની આગાહી છે. પટનામાં મહત્તમ તાપમાન 31°C અને લઘુત્તમ તાપમાન 19°C રહેશે.
ઉત્તરાખંડનું હવામાન:
ઉત્તરકાશી, પૌરી ગઢવાલ, હરિદ્વાર, ઋષિકેશ, પિથોરાગઢ, ચમોલી અને નૈનીતાલમાં 70 km/h ની ઝડપે પવન સાથે વરસાદી તોફાનની શક્યતા છે. દેહરાદૂનમાં મહત્તમ તાપમાન 27°C અને લઘુત્તમ તાપમાન 16°C નોંધાશે.
રાજસ્થાનનું હવામાન:
જયપુર, બીકાનેર, અજમેર, જેસલમેર, ચિત્તોડગઢ, બુંદી સહિતના વિસ્તારોમાં ગાજવીજ સાથે વરસાદ પડી શકે છે. જયપુરમાં મહત્તમ તાપમાન 32°C અને લઘુત્તમ તાપમાન 20°C રહેશે.
મધ્ય પ્રદેશનું હવામાન:
ઉજ્જૈન, ઈન્દોર, ભોપાલ, સાગર, ધાર, રાયસેન સહિતના વિસ્તારોમાં કમોસમી વરસાદ અને વીજળીના કડાકા ભડાકાની શક્યતા છે. ભોપાલમાં મહત્તમ તાપમાન 31°C અને લઘુત્તમ તાપમાન 23°C રહી શકે છે.
હિમાચલ પ્રદેશનું હવામાન:
કુલ્લુ, સોલન, ચંબા, મંડી અને કિન્નોરમાં મધ્યમથી ભારે વરસાદનું એલર્ટ છે. મનાલીમાં તાપમાન ગગડીને મહત્તમ 7°C અને લઘુત્તમ -3°C સુધી પહોંચવાની શક્યતા છે, જેનાથી તીવ્ર ઠંડીનો અનુભવ થશે.