IMD Weather Update: દેશના હવામાનમાં મોટો પલટો જોવા મળી રહ્યો છે. ભારતીય હવામાન વિભાગ (IMD) દ્વારા જારી કરવામાં આવેલા તાજેતરના અહેવાલ મુજબ, આગામી 6 કલાકથી લઈને 26-27 ઓક્ટોબર સુધી દેશના 9 જેટલા રાજ્યો અને કેન્દ્રશાસિત પ્રદેશોમાં ભારે વરસાદ અને વાવાઝોડાની ચેતવણી આપવામાં આવી છે. ખાસ કરીને દક્ષિણ ભારતમાં બંગાળની ખાડી અને અરબી સમુદ્રમાં સર્જાયેલી હવામાન પ્રણાલીને કારણે દરિયાકાંઠાના વિસ્તારોમાં મેઘરાજા મન મૂકીને વરસી શકે છે. બીજી તરફ, ઉત્તર ભારતના મેદાની વિસ્તારોમાં સવાર અને સાંજની ઠંડક સાથે શિયાળાની આગમનની શરૂઆત થઈ ચૂકી છે.
દક્ષિણ ભારતમાં ભારે વરસાદનું એલર્ટ અને માછીમારોને ચેતવણી
આ પણ વાંચો
હવામાન વિભાગના જણાવ્યા અનુસાર, તમિલનાડુના દરિયાકાંઠા નજીક દક્ષિણ-પશ્ચિમ બંગાળની ખાડીમાં 'લો પ્રેશર એરિયા' સક્રિય થયો છે. તેની વ્યાપક અસરને કારણે તમિલનાડુ, પુડુચેરી અને કરાઈકલમાં 25 ઓક્ટોબર સુધી ભારેથી અતિ ભારે વરસાદની આગાહી છે. આ વિસ્તારોમાં ગાજવીજ અને વીજળીના કડાકા સાથે 40 થી 50 કિમી પ્રતિ કલાકની ઝડપે પવન ફૂંકાઈ શકે છે, જે ક્યારેક વધીને 60 કિમી પ્રતિ કલાક સુધી પહોંચી શકે છે.
આ ઉપરાંત કેરળમાં પણ 22 ઓક્ટોબર પછી આગામી દિવસોમાં (ખાસ કરીને 23 અને 26-27 ઓક્ટોબરે) ધોધમાર વરસાદ વરસી શકે છે. લક્ષદ્વીપમાં 22 અને 25 ઓક્ટોબરે વરસાદની શક્યતા છે, જ્યારે 23-24 ઓક્ટોબરે અતિભારે વરસાદ પડી શકે છે. કર્ણાટક અને આંધ્રપ્રદેશમાં પણ વરસાદી માહોલ રહેશે; જેમાં દક્ષિણ આંતરિક કર્ણાટક અને દરિયાકાંઠાના કર્ણાટકમાં 22 થી 24 ઓક્ટોબર દરમિયાન સારો એવો વરસાદ નોંધાઈ શકે છે. દરિયાઈ સ્થિતિ પ્રતિકૂળ હોવાથી માછીમારોને કેરળ અને લક્ષદ્વીપ કિનારે 26 ઓક્ટોબર સુધી તેમજ કર્ણાટક કિનારે 23 થી 26 ઓક્ટોબર દરમિયાન દરિયામાં ન જવા સૂચના અપાઈ છે.
અંદમાન-નિકોબારથી લઈને ઓડિશા સુધી અસર
આજથી એટલે કે 22 ઓક્ટોબરથી અંદમાન અને નિકોબાર ટાપુઓના અનેક વિસ્તારોમાં ભારે વરસાદનો રાઉન્ડ શરૂ થઈ ગયો છે, જે 27 ઓક્ટોબર સુધી ચાલુ રહી શકે છે. આ ઉપરાંત, પૂર્વ ભારતના ઓડિશા રાજ્યમાં પણ આગામી 26 અને 27 ઓક્ટોબરે છૂટાછવાયા સ્થળોએ હળવો વરસાદ પડવાની સંભાવના વ્યક્ત કરવામાં આવી છે.
દિલ્હી અને ઉત્તર ભારતમાં હવામાનનો મિજાજ
રાષ્ટ્રીય રાજધાની દિલ્હીમાં આજે 22 ઓક્ટોબરે આકાશ સ્વચ્છ રહેશે અને દિવસ દરમિયાન તેજ તડકાના કારણે થોડી ગરમી અનુભવાશે. જોકે, રાત્રિના તાપમાનમાં ઘટાડો નોંધાઈ રહ્યો છે. દિલ્હીમાં આજે મહત્તમ તાપમાન 32°C અને લઘુત્તમ તાપમાન 19°C રહેવાની શક્યતા છે. પ્રદૂષણની સમસ્યાની વચ્ચે 24 ઓક્ટોબર સુધી આકાશ આંશિક વાદળછાયું રહી શકે છે અને 25 ઓક્ટોબરથી લઘુત્તમ તાપમાન ઘટીને 18°C સુધી પહોંચવાની સંભાવના છે.
ઉત્તર પ્રદેશ અને બિહારમાં પણ હવામાન સામાન્ય અને શુષ્ક રહેવાની સાથે સવાર-સાંજ ગુલાબી ઠંડીનો અહેસાસ થવા લાગ્યો છે. ગ્રામીણ વિસ્તારોમાં તાપમાનમાં ઘટાડો થવાથી ઠંડક વધી છે. જોકે, હવામાન વિભાગના મતે આગામી 24 ઓક્ટોબરથી ઉત્તર-પશ્ચિમ ભારતમાં એક નવું 'વેસ્ટર્ન ડિસ્ટર્બન્સ' (પશ્ચિમી વિક્ષેપ) સક્રિય થવા જઈ રહ્યું છે, જેના કારણે આગામી દિવસોમાં ઉત્તર ભારતના હવામાનમાં ફેરફાર થઈ શકે છે. રાજસ્થાનમાં હાલ 27 ઓક્ટોબર સુધી વરસાદની કોઈ ચેતવણી નથી, પરંતુ ત્યાં પણ પશ્ચિમી વિક્ષેપની અસર જોવા મળી શકે છે.