IMD Weather Alert: દેશભરમાં હવામાનનો મિજાજ ફરી એકવાર પલટાઈ રહ્યો છે. ભારતીય હવામાન વિભાગ (IMD) દ્વારા આગામી સમય માટે મોટું અપડેટ સામે આવ્યું છે, જેમાં દેશના 14 જેટલા રાજ્યોમાં આગામી કલાકો અને દિવસો દરમિયાન ગાજવીજ સાથે વરસાદ પડવાની ચેતવણી જારી કરવામાં આવી છે. ચક્રવાતી તોફાન 'મુરાસુ'ની અસર હવે ધીમે ધીમે નબળી પડી રહી છે, તેમ છતાં વાતાવરણમાં મોટા ફેરફારો જોવા મળી રહ્યા છે. હવામાન વિભાગના જણાવ્યા અનુસાર, આ દરમિયાન કેટલાક વિસ્તારોમાં 60 થી 80 કિમી પ્રતિ કલાકની ઝડપે તોફાની પવન ફૂંકાઈ શકે છે.
કયા રાજ્યોમાં છે વરસાદનું એલર્ટ?
IMD ની આગાહી મુજબ, દક્ષિણ અને પૂર્વ ભારતના કેટલાક રાજ્યોમાં ભારે વરસાદ અને વાવાઝોડાની શક્યતા છે. તમિલનાડુ, અંદામાન અને નિકોબાર ટાપુઓ, ઓડિશા, ઝારખંડ, છત્તીસગઢ, કેરળ, કર્ણાટક, પુડુચેરી અને આંધ્રપ્રદેશમાં હળવાથી મધ્યમ તેમજ કેટલાક સ્થળોએ ભારે વરસાદ પડી શકે છે.
દક્ષિણ ભારતમાં મેઘરાજા મહેરબાન
5 થી 10 નવેમ્બર દરમિયાન તમિલનાડુ, પુડુચેરી અને કરાઈકલમાં છૂટોછવાયો વરસાદ પડી શકે છે. ખાસ કરીને 7 અને 8 નવેમ્બરે આ વિસ્તારોમાં વ્યાપક વરસાદ થવાની પ્રબળ સંભાવના છે. તટીય કર્ણાટક, કેરળ, માહે, લક્ષદ્વીપ, રાયલસીમા અને દક્ષિણ આંતરિક કર્ણાટકમાં પણ 10 નવેમ્બર સુધી વરસાદી માહોલ યથાવત રહેશે. કેરળ અને માહેમાં 6 થી 8 નવેમ્બર દરમિયાન ભારે વરસાદની ચેતવણી આપવામાં આવી છે.
આંધ્રપ્રદેશમાં તેજ પવન ફૂંકાશે:
5 થી 8 નવેમ્બર દરમિયાન દરિયાકાંઠાના આંધ્રપ્રદેશ, યાનમ અને રાયલસીમામાં જમીન સપાટી પર ભારે પવન ફૂંકાવાની શક્યતા છે. શરૂઆતમાં 40 થી 50 કિમી પ્રતિ કલાક (જે ક્યારેક 60 કિમી સુધી પહોંચી શકે) ની ઝડપે પવન ફૂંકાઈ શકે છે.
ઓડિશા અને ઝારખંડનું હવામાન:
IMD મુજબ 5, 6 અને 7 નવેમ્બરે ઓડિશાના કેટલાક ભાગોમાં વરસાદ પડવાની શક્યતા છે. જ્યારે ઝારખંડમાં 5 થી 8 નવેમ્બર દરમિયાન કોઈ વિશેષ એલર્ટ નથી, પરંતુ 9-10 નવેમ્બરે વરસાદની શક્યતા દર્શાવાઈ છે. આંદામાન અને નિકોબારમાં 8 થી 10 નવેમ્બર દરમિયાન મોટાભાગના વિસ્તારોમાં વરસાદ વરસી શકે છે.
દિલ્હી-એનસીઆર અને ઉત્તર ભારતમાં ઠંડીની શરૂઆત
એક તરફ દક્ષિણ ભારતમાં વરસાદનું જોર છે, ત્યારે ઉત્તર ભારતમાં હવે ગુલાબી ઠંડીએ દસ્તક દઈ દીધી છે.
દિલ્હીનું હવામાન:
રાષ્ટ્રીય રાજધાની દિલ્હી-એનસીઆરમાં ૫ નવેમ્બરના રોજ આકાશ મોટે ભાગે સ્વચ્છ રહેવાની અપેક્ષા છે. સવારના સમયે હળવું ધુમ્મસ અથવા ઝાંખપ (haze) જોવા મળી શકે છે. આગામી 6 અને 7 નવેમ્બરે પણ દિલ્હીમાં હવામાન મુખ્યત્વે સ્વચ્છ રહેશે અને ઉત્તર-પશ્ચિમ દિશામાંથી પવન ફૂંકાઈ શકે છે. દિલ્હીમાં મહત્તમ તાપમાન 27 થી 29 ડિગ્રી સેલ્સિયસ અને લઘુત્તમ તાપમાન 15 થી 17 ડિગ્રી સેલ્સિયસની વચ્ચે રહેવાનું અનુમાન છે.
ઉત્તર પ્રદેશ અને બિહારનું હવામાન:
ઉત્તર પ્રદેશમાં હવામાન સામાન્ય રીતે સ્થિર છે અને રાજ્યભરમાં ધીમે ધીમે ઠંડી વધી રહી છે. ગ્રામીણ વિસ્તારોમાં લોકોએ સવાર-સાંજ ધાબળા અને રજાઈનો ઉપયોગ શરૂ કરી દીધો છે. યુપીના કોઈપણ ભાગમાં હાલ વરસાદનું કોઈ એલર્ટ નથી. તેવી જ રીતે, બિહારમાં પણ વાતાવરણ ખુશનુમા અને સામાન્ય છે; સવાર-સાંજ હળવી ઠંડી અને દિવસ દરમિયાન તડકો જોવા મળી રહ્યો છે.
હવામાન વિભાગની આ ચેતવણીને પગલે તટીય અને દક્ષિણ રાજ્યોમાં વહીવટી તંત્રને સાવધ રહેવા સૂચના આપવામાં આવી છે, જ્યારે ઉત્તર ભારતના લોકો હવે આગામી દિવસોમાં વધતી ઠંડીનો સામનો કરવા તૈયાર થઈ રહ્યા છે.