IMD Weather Alert 19 October: દેશમાં શિયાળાની ગુલાબી ઠંડકની શરૂઆત થવાની સાથે જ વાતાવરણમાં અચાનક પલટો આવ્યો છે. ભારતીય હવામાન વિભાગ (IMD) એ એક ગંભીર ચેતવણી જારી કરીને દેશના વિવિધ વિસ્તારોમાં ભારે વરસાદ, ગાજવીજ અને વાવાઝોડા જેવી પરિસ્થિતિ અંગે ચેતવણી આપી છે. હવામાન વિભાગ અનુસાર, આજે 19 ઓક્ટોબરે દિલ્હીથી લઈને પશ્ચિમ બંગાળ સુધીના દેશના 14 જેટલા રાજ્યોમાં ભારે વરસાદ અને ગાજવીજ સાથે વાવાઝોડું ત્રાટકી શકે છે. આ દરમિયાન પવનની ગતિ પ્રતિ કલાક 65 થી 70 કિલોમીટર સુધી પહોંચવાની આશંકા વ્યક્ત કરવામાં આવી છે.
દેશના 14 રાજ્યોમાં ભારે વરસાદનું યેલો અને ઓરેન્જ એલર્ટ
હવામાન વિભાગ દ્વારા જારી કરવામાં આવેલી તાજેતરની આગાહી મુજબ, દેશના પશ્ચિમ, ઉત્તર અને પૂર્વ વિસ્તારોમાં હવામાનમાં મોટો ફેરફાર જોવા મળશે. આજે 19 ઓક્ટોબરે જે 14 રાજ્યોમાં ભારે વરસાદ અને તેજ પવનોનું એલર્ટ જાહેર કરવામાં આવ્યું છે તેમાં દિલ્હી, ઉત્તર પ્રદેશ, બિહાર, મધ્ય પ્રદેશ, રાજસ્થાન, મહારાષ્ટ્ર, ગુજરાત, આસામ, પશ્ચિમ બંગાળ, ઝારખંડ, ઓડિશા, કર્ણાટક, આંધ્ર પ્રદેશ અને તમિલનાડુનો સમાવેશ થાય છે.
દરિયાકાંઠાના વિસ્તારોમાં વાવાઝોડા જેવા માહોલને પગલે માછીમારોને દરિયામાં ન જવાની સ્પષ્ટ સલાહ આપવામાં આવી છે. જ્યારે પહાડી વિસ્તારોમાં ભૂસ્ખલન અને કરા પડવાની શક્યતાને ધ્યાનમાં રાખીને પ્રવાસીઓને સાવચેત રહેવા જણાવાયું છે.
દિલ્હી NCRનું હવામાન:
રાજધાની દિલ્હીમાં આજે વરસાદની સાથે મધ્યમ ગતિના પવનો ફૂંકાશે. પવનની ગતિ 30 કિમી/કલાક સુધી રહી શકે છે. દિલ્હીમાં મહત્તમ તાપમાન 31°C અને લઘુત્તમ તાપમાન 18°C ની આસપાસ નોંધાઈ શકે છે.
ઉત્તર પ્રદેશનું હવામાન:
યુપીના પ્રયાગરાજ, ગાઝિયાબાદ, મેરઠ, કાનપુર, ગોરખપુર, મથુરા, બુલંદશહેર અને આગ્રામાં ગાજવીજ સાથે ભારે વરસાદની ચેતવણી છે. આ દરમિયાન 40 કિમી/કલાકની ઝડપે પવન ફૂંકાશે. પાટનગર લખનૌમાં મહત્તમ તાપમાન 32°C અને લઘુત્તમ 19°C રહેશે.
બિહારનું હવામાન:
બિહારના પૂર્ણિયા, ભોજપુર, દરભંગા, ગયા, સમસ્તીપુર, કિશનગંજ, મુંગેર, બેગુસરાય અને મધુબનીમાં ભારે વરસાદ સાથે પવનની ઝડપ 70 કિમી/કલાક સુધી પહોંચવાની શક્યતા છે. પટનામાં મહત્તમ તાપમાન 31°C અને લઘુત્તમ 21°C રહેશે.
મધ્ય પ્રદેશનું હવામાન:
એમપીના છિંદવાડા, ઉજ્જૈન, નર્મદાપુરમ, રાયસેન, ગ્વાલિયર, જબલપુર, મંડલા અને વિદિશા માટે ગાજવીજ સાથે વરસાદનું એલર્ટ છે. ભોપાલમાં તાપમાન 31°C થી 21°C વચ્ચે રહેશે.
રાજસ્થાનનું હવામાન:
રાજ્યના બિકાનેર, કોટા, અજમેર, જયપુર, બાંસવાડા, શ્રી ગંગાનગર, બારાં, પ્રતાપગઢ અને ઉદયપુરમાં 65 થી 70 કિમી/કલાકની ઝડપે તેજ પવન સાથે હળવાથી મધ્યમ વરસાદની આગાહી છે.