IMD Weather Forecast: દેશભરમાં ચોમાસું અત્યંત આક્રમક મોડમાં આવી પહોંચ્યું છે. ભારતીય હવામાન વિભાગ (IMD) દ્વારા 6 સપ્ટેમ્બરના રોજ દેશના 24 જેટલા રાજ્યોમાં ભારેથી અતિભારે વરસાદ અને વાવાઝોડાની ગંભીર ચેતવણી જારી કરવામાં આવી છે. બંગાળની ખાડીમાં સર્જાયેલી સિસ્ટમ, રાજસ્થાન નજીક બનેલું લો-પ્રેશર અને ઉત્તર મધ્ય પ્રદેશ પર સક્રિય ચક્રવાતી પરિભ્રમણના કારણે હવામાનમાં મોટો પલટો આવ્યો છે. આ દરમિયાન કેટલાક વિસ્તારોમાં 80 કિલોમીટર પ્રતિ કલાકની ઝડપે તોફાની પવન ફૂંકાવાની શક્યતા છે, જે ખેડૂતોના પાકને ભારે નુકસાન પહોંચાડી શકે છે.
પર્વતીય વિસ્તારોમાં ભૂસ્ખલન અને વીજળી પડવાનું જોખમ
આ પણ વાંચો
હવામાન વિભાગે ઉત્તરાખંડ, હિમાચલ પ્રદેશ અને જમ્મુ-કાશ્મીર જેવા પર્વતીય રાજ્યો માટે ભૂસ્ખલન (Landslide) ની ચેતવણી આપી છે અને લોકોને ગાઢ જંગલો કે પહાડી રસ્તાઓ પર મુસાફરી ન કરવાની સલાહ આપી છે. પૂર્વી ભારતના રાજ્યોમાં ગાજવીજ સાથે વીજળી પડવાની અને કેટલાક સ્થળોએ કરા પડવાની સંભાવના વ્યક્ત કરાઈ છે. આ સિવાય, નદીઓ અને દરિયાકિનારે જવાનું ટાળવા માટે માછીમારો અને સ્થાનિકોને ખાસ એલર્ટ કરવામાં આવ્યા છે.
દિલ્હી, યુપી અને બિહારમાં હવામાનનો મિજાજ
આજે 6 સપ્ટેમ્બરે વાદળછાયા વાતાવરણ વચ્ચે 40 થી 50 કિમી/કલાકની ઝડપે પવન ફૂંકાશે અને ભારે વરસાદ પડી શકે છે. દિલ્હીમાં મહત્તમ તાપમાન 29°C અને લઘુત્તમ 24°C રહેવાની ધારણા છે. તેમજ લખનૌ, કાનપુર, નોઈડા, ગાઝિયાબાદ, આઝમગઢ અને ગોરખપુર સહિત અનેક જિલ્લાઓમાં વાવાઝોડા સાથે મુશળધાર વરસાદનું યલો-ઓરેન્જ એલર્ટ જારી કરાયું છે. અને પટના, ગયા, વૈશાલી, રાંચી અને ધનબાદ સહિતના વિસ્તારોમાં ગાજવીજ સાથે ભારે વરસાદની તીવ્ર શક્યતા છે.
ગુજરાત અને અન્ય રાજ્યો પર અસર
ગુજરાત, મહારાષ્ટ્ર, રાજસ્થાન, મધ્ય પ્રદેશ, છત્તીસગઢ, ઓડિશા, પશ્ચિમ બંગાળ અને પંજાબ જેવા રાજ્યોમાં પણ આગામી 24 કલાક દરમિયાન તોફાની પવનો સાથે વરસાદી માહોલ રહેશે. રાજસ્થાન અને છત્તીસગઢમાં પવનની ઝડપ 60 થી 70 કિમી/કલાક સુધી પહોંચી શકે છે. હવામાન વિભાગે તમામ નાગરિકોને ખરાબ હવામાન દરમિયાન સુરક્ષિત સ્થળોએ રહેવા અને સરકારી માર્ગદર્શિકાનું પાલન કરવા વિનંતી કરી છે.