India US Relations: ફ્રાન્સમાં યોજાયેલી G-7 સમિટ દરમિયાન વડાપ્રધાન નરેન્દ્ર મોદી અને અમેરિકાના રાષ્ટ્રપતિ ડોનાલ્ડ ટ્રમ્પ વચ્ચે થયેલી મુલાકાતને લઈને ઉભા થયેલા વિવાદ વચ્ચે ભારત સરકારે સ્પષ્ટતા કરી છે. અમેરિકાના રાજદૂત સર્જિયો ગોરના નિવેદન બાદ ભારત સરકારે કહ્યું છે કે VVIP મુલાકાતો દરમિયાન નેતાઓની જાહેર હાજરી અને મીડિયા વ્યવસ્થા અંગે ચર્ચા કરવી એક સામાન્ય અને પ્રમાણભૂત પ્રક્રિયા છે.
સરકારી સૂત્રોને ટાંકીને સમાચાર એજન્સી ANIએ જણાવ્યું કે કોઈપણ VVIP મુલાકાત પહેલાં નેતાઓની જાહેર હાજરી અંગેની વ્યવસ્થા અંગે બંને પક્ષો વચ્ચે ચર્ચા થતી હોય છે. આ મામલે પણ ભારતીય પક્ષે આવી મુલાકાતો માટે પોતાના પ્રમાણભૂત પ્રોટોકોલ અંગે અમેરિકાને જાણકારી આપી હતી.
સર્જિયો ગોરે શું દાવો કર્યો?
ભારતમાં અમેરિકાના રાજદૂત સર્જિયો ગોરે શનિવારે ઇકોનોમિક ટાઇમ્સ વર્લ્ડ લીડર્સ ફોરમમાં G-7 સમિટ દરમિયાન મોદી-ટ્રમ્પ મુલાકાત અંગે વાત કરી હતી. તેમણે દાવો કર્યો હતો કે જૂનમાં ફ્રાન્સમાં યોજાયેલી G-7 સમિટ દરમિયાન બંને નેતાઓની મુલાકાત પહેલાં ભારતના વિદેશ મંત્રાલયે અમેરિકાને વિનંતી કરી હતી કે મીડિયાને બેઠકમાં હાજર રહેવાની મંજૂરી આપવામાં આવે, પરંતુ પત્રકારોને પ્રશ્નો પૂછવાની તક ન આપવામાં આવે.
ગોરના જણાવ્યા અનુસાર, બેઠક પહેલાં રાષ્ટ્રપતિ ટ્રમ્પે ભારતીય પક્ષ કયા મુદ્દાઓ ઉઠાવશે અને તેમની કોઈ ખાસ માંગણી છે કે કેમ તે અંગે પૂછ્યું હતું. ત્યારે તેમણે ટ્રમ્પને જણાવ્યું હતું કે ભારતીય પક્ષની મુખ્ય વિનંતી મીડિયાની હાજરીને લઈને હતી અને સંપૂર્ણ પ્રેસ કોન્ફરન્સ ન યોજવાની પસંદગી હતી.
ગોરે વધુમાં કહ્યું હતું કે તેમણે ટ્રમ્પને ભારતીય પક્ષની આ ઈચ્છા અંગે સીધી માહિતી આપી હતી. ટ્રમ્પે તેના પર કોઈ વાંધો ન હોવાનું જણાવ્યું હતું.
બેઠક દરમિયાન શું થયું?
સર્જિયો ગોરના જણાવ્યા મુજબ, ત્યારબાદ બંને નેતાઓની બેઠક શરૂ થઈ હતી. બેઠકના પ્રારંભિક તબક્કામાં મીડિયા કર્મચારીઓ અને ટેકનિકલ ટીમ પણ રૂમમાં હાજર હતી. વડાપ્રધાન મોદી અને રાષ્ટ્રપતિ ટ્રમ્પે શરૂઆતની ટિપ્પણીઓ કરી અને ત્યારબાદ બંને નેતાઓ વચ્ચે થોડા સમય માટે વાતચીત થઈ હતી.
ભારત સરકારે હવે સ્પષ્ટ કર્યું છે કે VVIP બેઠકો દરમિયાન મીડિયા અને જાહેર હાજરી અંગે પ્રોટોકોલ નક્કી કરવા માટે બંને પક્ષો વચ્ચે અગાઉથી ચર્ચા થવી સામાન્ય બાબત છે. સરકારની આ સ્પષ્ટતા બાદ મોદી-ટ્રમ્પ મુલાકાતને લઈને ચાલી રહેલા વિવાદમાં ભારતનો પક્ષ સામે આવ્યો છે.