Aviation Advisory: ઉત્તર ભારતમાં ગાઢ ધુમ્મસની હવાઈ મુસાફરી પર અસર ઉત્તર ભારતમાં ગાઢ ધુમ્મસના કારણે હવાઈ મુસાફરી ખરાબ રીતે પ્રભાવિત થઈ છે, ખાસ કરીને દિલ્હી એરપોર્ટ પર તેની મોટી અસર જોવા મળી છે. ઓછી વિઝિબિલિટીના કારણે સેંકડો મુસાફરો મુશ્કેલીમાં મુકાયા છે અને ઘણી ફ્લાઇટ્સ મોડી પડી છે અથવા રદ કરવામાં આવી છે.
દિલ્હી એરપોર્ટ પર 100થી વધુ ફ્લાઇટ્સ રદ
દિલ્હીના ઈન્દિરા ગાંધી ઈન્ટરનેશનલ એરપોર્ટ પર મંગળવારે ધુમ્મસને કારણે 118 ફ્લાઇટ્સ રદ કરવામાં આવી હતી, જેમાં 60 આવતી અને 58 જતી ફ્લાઇટ્સનો સમાવેશ થાય છે. આ ઉપરાંત 16 ફ્લાઇટ્સને અન્ય એરપોર્ટ પર ડાયવર્ટ કરવામાં આવી હતી અને લગભગ 130 ફ્લાઇટ્સ મોડી પડી હતી. એરપોર્ટ અધિકારીઓના જણાવ્યા અનુસાર માત્ર CAT III સુવિધા ધરાવતી ફ્લાઇટ્સ જ ઓછી વિઝિબિલિટીમાં ઓપરેટ થઈ શકે છે.
એરલાઇન્સ માટે નાગરિક ઉડ્ડયન મંત્રાલયની કડક સૂચનાઓ
પરિસ્થિતિને ધ્યાનમાં રાખીને નાગરિક ઉડ્ડયન મંત્રાલયે એરલાઇન્સને મુસાફરોની સુવિધા માટે કડક સૂચનાઓ આપી છે. મંત્રાલયે સ્પષ્ટ કર્યું છે કે મુસાફરોની સુરક્ષા અને સુવિધા સૌથી ઉપર છે અને એરલાઇન્સે પેસેન્જર સુવિધાના નિયમોનું ચુસ્તપણે પાલન કરવું પડશે.
મુસાફરોને મળવાપાત્ર સુવિધાઓ
સરકારી એડવાઇઝરી મુજબ ફ્લાઇટ મોડી થવાના કિસ્સામાં એરલાઇન્સે ભોજનની વ્યવસ્થા કરવાની રહેશે. જો ફ્લાઇટ રદ થાય તો મુસાફરોને ફરીથી બુકિંગ અથવા સંપૂર્ણ રિફંડ આપવું પડશે. આ ઉપરાંત સમયસર ચેક-ઇન કરનારા મુસાફરોને બોર્ડિંગ નકારવું જોઈએ નહીં અને સામાન (બેગેજ) સંબંધિત સુવિધાઓ અને ફરિયાદોનું ઝડપથી નિવારણ લાવવા આદેશ અપાયો છે.
એરપોર્ટ ઓથોરિટી દ્વારા ગ્રાઉન્ડ સપોર્ટ એરપોર્ટ ઓથોરિટી ઓફ ઈન્ડિયા (AAI) એ પ્રભાવિત એરપોર્ટ પર સ્પેશિયલ આસિસ્ટન્ટ ટીમો તૈનાત કરી છે જે મુસાફરોને જમીન સ્તરે મદદ કરી રહી છે. AAI એ મુસાફરોને સલાહ આપી છે કે તેઓ પોતાની એરલાઇન્સના સંપર્કમાં રહે અને એરપોર્ટ પહોંચવા માટે પૂરતો વધારાનો સમય રાખે.
મુસાફરો માટે જરૂરી હેલ્પલાઇન નંબરો
મુસાફરોની સુવિધા માટે વિવિધ એરલાઇન્સના કસ્ટમર સપોર્ટ નંબર પણ જાહેર કરવામાં આવ્યા છે. જેમાં ઈન્ડિગો માટે 0124 497 3838, એર ઈન્ડિયા માટે 011 6932 9333, અને સ્પાઈસજેટ માટે +91 (0)124 498 3410 / +91 (0)124 710 1600 પર સંપર્ક કરી શકાય છે. મંત્રાલયે મુસાફરોને એરપોર્ટ પર આવતા પહેલા તેમની ફ્લાઇટનું સ્ટેટસ તપાસી લેવા અપીલ કરી છે