Maharashtra Municipal Election Results: મુંબઈમાં બૃહદમુંબઈ મહાનગર પાલિકા (BMC) ના 227 વોર્ડ માટે યોજાયેલી ચૂંટણીની મતગણતરી આજે સવારે 10 વાગ્યે શરૂ થશે,. આ પ્રક્રિયા માટે કુલ 23 ચૂંટણી નિર્ણય અધિકારીઓની નિમણૂક કરવામાં આવી છે અને દરેક અધિકારી હેઠળ એક સ્ટ્રોંગ રૂમ અને કાઉન્ટિંગ સેન્ટર નક્કી કરવામાં આવ્યું છે. શહેરના વિવિધ સ્થળોએ ઉભા કરવામાં આવેલા 23 કાઉન્ટિંગ રૂમમાં આ પ્રક્રિયા હાથ ધરવામાં આવશે.
પક્ષો અને ગઠબંધનનું ગણિત
આ ચૂંટણીમાં ભાજપ 137 બેઠકો પર ચૂંટણી લડી રહ્યું છે, જ્યારે શિંદેની શિવસેનાએ 90 બેઠકો પર ઉમેદવારો ઉતાર્યા છે. બીજી તરફ, શિવસેના (UBT) એ મહારાષ્ટ્ર નવનિર્માણ સેના (MNS) સાથે ગઠબંધન કર્યું છે; જેમાં UBT 163 બેઠકો પર અને MNS 52 બેઠકો પર લડી રહી છે. કોંગ્રેસે વંચિત બહુજન આઘાડી (VBA) સાથે હાથ મિલાવ્યા છે, જ્યાં કોંગ્રેસ 143 અને VBA 46 બેઠકો પર લડી રહ્યા છે. અજિત પવારની એનસીપી (NCP) 94 બેઠકો પર સ્વતંત્ર રીતે લડી રહી છે.
BMC ચૂંટણી શા માટે પ્રતિષ્ઠાનો જંગ છે?
BMC ચૂંટણી માત્ર નગરપાલિકાની ચૂંટણી નથી, પરંતુ મુંબઈની સત્તા હાંસલ કરવાની લડાઈ છે. 74,000 કરોડ રૂપિયાના બજેટ સાથે, BMC એશિયાની સૌથી મોટી નાગરિક સંસ્થા છે અને તેનું બજેટ ગોવા અને મેઘાલય જેવા કેટલાક નાના રાજ્યો કરતા પણ મોટું છે. 1997 થી 2017 સુધી શિવસેનાએ અહીં શાસન કર્યું હતું, તેથી મહાયુતિ અને મહાવિકાસ અઘાડી બંને માટે આ સાખનો સવાલ છે.
એક્ઝિટ પોલમાં મહાયુતિને સ્પષ્ટ બહુમતી મળવાના સંકેત
વિવિધ એક્ઝિટ પોલના તારણો મુજબ ભાજપના નેતૃત્વવાળી મહાયુતિ આગળ દેખાઈ રહી છે. BMC માં બહુમતી માટે 114 બેઠકોની જરૂર છે. 'Axis My India' ના મતે મહાયુતિને 131-151 બેઠકો, ઠાકરે જૂથને 58-68 અને કોંગ્રેસ ગઠબંધનને 12-16 બેઠકો મળી શકે છે. વળી, વોટ શેરમાં પણ મહાયુતિને 42% મત મળવાનો અંદાજ છે.
રાજકીય પક્ષોના મુખ્ય ચૂંટણી વચનો
મતદારોને રીઝવવા માટે દરેક પક્ષે મોટા વચનો આપ્યા છે. ભાજપ ગઠબંધને મહિલાઓને BEST બસોમાં મુસાફરી કરવા પર ભાડામાં 50% છૂટનું વચન આપ્યું છે. બીજી તરફ, ઉદ્ધવ-રાજ ઠાકરે ગઠબંધને ઘરેલુ મહિલા સહાયકોને દર મહિને ₹1500 અને 700 ચોરસ ફૂટ સુધીના ઘરો પર પ્રોપર્ટી ટેક્સ માફ કરવાની વાત કરી છે. કોંગ્રેસે પ્રદૂષણની સમસ્યા ઉકેલવા અને આર્થિક સ્થિતિ મજબૂત કરવાના વાયદા કર્યા છે.
ગત ચૂંટણી (2017) ના પરિણામો પર એક નજર વર્ષ 2017 ની ચૂંટણીમાં, શિવસેના 84 બેઠકો જીતીને સૌથી મોટી પાર્ટી બની હતી, જ્યારે ભાજપે 82 બેઠકો મેળવી હતી. તે સમયે કોંગ્રેસને 31, એનસીપીને 9 અને મનસે (MNS) ને 7 બેઠકો મળી હતી.