Diwali 2026 Firecracker Deaths: દેશભરમાં પ્રકાશના પર્વ દિવાળીની ઉત્સાહભેર ઉજવણી વચ્ચે અનેક સ્થળોએ ફટાકડા અને આગની દુર્ઘટનાઓએ ભારે તારાજી સર્જી છે. સમગ્ર દેશમાં દિવાળી દરમિયાન ફટાકડા અને આગ સંબંધિત અકસ્માતોમાં કુલ 24 લોકોનાં કરૂણ મોત નીપજ્યાં છે, જ્યારે સેંકડો લોકો ઈજાગ્રસ્ત થયા છે. એકલા રાષ્ટ્રીય રાજધાની દિલ્હીમાં જ 300થી વધુ લોકો ઈજાગ્રસ્ત થઈને હોસ્પિટલ પહોંચ્યા હતા. મધ્યપ્રદેશ, ઉત્તર પ્રદેશ, પંજાબ, રાજસ્થાન સહિતના રાજ્યોમાં ફટાકડાના વિસ્ફોટ અને આગના કારણે અનેક પરિવારોના માળા ઉજડી ગયા છે.
મધ્યપ્રદેશમાં બે મોટા અકસ્માતમાં 12 લોકોનાં જીવ ગયા
મધ્યપ્રદેશના કટની અને સિઓની જિલ્લામાં બનેલી આગની બે ભયાનક ઘટનાઓમાં એક જ પરિવારના સભ્યો સહિત કુલ 12 લોકોએ જીવ ગુમાવ્યા છે.
કટની જિલ્લોના બરહી નગરમાં દિવાળીની મધ્યરાત્રિએ વેપારી પુરણ અગ્રવાલના ત્રણ માળના મકાનના નીચેના માળે આવેલી વાસણની દુકાનમાં આગ ફાટી નીકળી હતી. આ આગ ઉપરના માળ સુધી પ્રસરતા, ગાઢ નિંદ્રામાં સૂતેલા બે મહિનાના બાળક સહિત છ લોકોના ગુંગળામણ અને દાઝી જવાથી ઘટનાસ્થળે જ મોત થયાં હતાં.
સિઓની જિલ્લોના છાપરા નગરના મહાવીર વોર્ડમાં સોના-ચાંદીના વેપારી કુંદન લાલ સોનીના મકાનમાં સોમવારે વહેલી સવારે 4:00 વાગ્યે આગ લાગી હતી. ઘરમાં દસ સભ્યો સૂતા હતા, જેમાંથી છ લોકોનાં મોત થયાં હતાં જ્યારે ચારને સુરક્ષિત બચાવાયા હતા. મકાનના દરવાજા પર લોખંડનો ચેનલ ગેટ બંધ હોવાથી બચાવ કામગીરીમાં ભારે અડચણ આવી હતી.
દિલ્હીની હોસ્પિટલોમાં ઈજાગ્રસ્તોનો ધસારો
દિલ્હીમાં ફટાકડાના કારણે દાઝી ગયેલા અને ઘાયલ થયેલા દર્દીઓથી હોસ્પિટલો ઉભરાઈ ગઈ હતી. સફદરજંગ હોસ્પિટલમાં 135, એઈમ્સ (AIIMS) માં 42 અને આકાશ હેલ્થકેરમાં 15 દર્દીઓ સારવાર અર્થે આવ્યા હતા, જ્યારે અન્ય હોસ્પિટલોમાં પણ 100થી વધુ દર્દીઓ નોંધાયા હતા. એઈમ્સમાં દાખલ 11 દર્દીઓની સ્થિતિ ગંભીર હોવાથી પાંચ લોકોની સર્જરી કરવામાં આવી છે, જેમાં 45 ટકા દાઝી ગયેલા 8 વર્ષના એક બાળકની હાલત અત્યંત નાજુક છે.
વિવિધ રાજ્યોમાં કરૂણ અકસ્માતોની હારમાળા
ઉત્તર પ્રદેશના મેરઠમાં ફટાકડાના અવાજથી ગભરાઈને ભાગતી વખતે પડી જવાથી 5 વર્ષના બાળકના માથામાં ધારદાર વસ્તુ ઘૂસી જતાં મોત થયું. ફતેહપુરમાં કિશોરના ખિસ્સામાં 'સુતલી બોમ્બ' ફૂટવાથી અને ફર્રુખાબાદમાં ગળામાં ફટાકડાનો ટુકડો ફસાઈ જવાથી એક બાળકનું મૃત્યુ થયું. કાનપુરમાં આગને કારણે રજાઈ-ઓશીકાની ફેક્ટરી ખાખ થતાં એક કરોડથી વધુનું નુકસાન થયું છે.
પંજાબ અને રાજસ્થાનના જલંધરમાં ઘરમાં આગ લાગવાથી વૃદ્ધ અને જગરાંવમાં 14 વર્ષના બાળકનું મોત થયું. રાજસ્થાનના બુંદી અને બિકાનેરમાં ફટાકડાથી એક-એક બાળકનું જીવન હોમાયું.
હરિયાણાના જીંદમાં ગળામાં ફટાકડો વાગવાથી ૩૯ વર્ષીય મહિલાનું મોત થયું, જ્યારે જમ્મુમાં અનાજ મંડીના ગોડાઉનમાં ફટાકડાની તણખથી લાગેલી આગમાં સાત દુકાનો અને ગોડાઉન બળીને ખાખ થઈ ગયાં.
આ દુર્ઘટનાઓએ તહેવારો દરમિયાન ફટાકડા ફોડવામાં રાખવામાં આવતી સાવચેતી અને સલામતીના પ્રત્યે ગંભીર સવાલો ખડા કર્યા છે.