Delhi Voter List: રાજધાની દિલ્હીમાં સ્પેસિયલ ઇન્ટેન્સિવ રિવિઝન (SIR) 2026 કાર્યક્રમને લઈને રાજકીય ગરમાવો જોવા મળી રહ્યો છે. એક તરફ વિપક્ષી ગઠબંધન INDIA આ પ્રક્રિયાનો વિરોધ કરી રહ્યું છે, તો બીજી તરફ દિલ્હીના મુખ્ય નિર્વાચન અધિકારી (CEO)ની ઓફિસે મહત્વપૂર્ણ SIR ડેટા જાહેર કરીને તમામ સ્થિતિ સ્પષ્ટ કરવાનો પ્રયાસ કર્યો છે.
33 લાખ નામોમાં તાર્કિક ગડબડ
ચૂંટણી પંચ દ્વારા આપવામાં આવેલી સત્તાવાર માહિતી અનુસાર, દિલ્હીની મતદાતા યાદીની ચકાસણી દરમિયાન આશરે 33 લાખ એન્ટ્રી એવી સામે આવી હતી જેમાં તાર્કિક વિસંગતતા હતી અથવા તો તેમનો રેકોર્ડ હાલના ડેટાબેઝ સાથે મેચ થઈ રહ્યો નહોતો.
20 લાખ કેસોનું નિરાકરણ લાવવામાં આવ્યું
ચૂંટણી પંચે સ્પષ્ટતા કરી છે કે આ ગડબડીઓને સુધારવા માટે એક વિશેષ સક્રિય ઝુંબેશ ચલાવવામાં આવી હતી. તંત્રના જણાવ્યા અનુસાર, 33 લાખમાંથી આશરે 20 લાખથી વધુ કેસોનું સફળતાપૂર્વક સમાધાન કરી દેવામાં આવ્યું છે અને બાકીના કેસો પર પણ ઝડપથી કામ ચાલી રહ્યું છે.
પંચનું મોટું આશ્વાસન
વિપક્ષના આક્ષેપો વચ્ચે ચૂંટણી પંચે દિલ્હીના નાગરિકોને ખાતરી આપી છે કે કોઈપણ યોગ્ય કે કાયદેસરના મતદાતાનું નામ મતદાતા યાદીમાંથી દૂર કરવામાં આવશે નહીં. જો કોઈ નાગરિકને પોતાના નામ કે વિગતો અંગે કોઈ પણ પ્રકારની ફરિયાદ કે શંકા હોય, તો તેઓ પોતાના વિસ્તારના 14,497 BLOs (બૂથ લેવલ ઓફિસર), 902 AEROs, 70 EROs અથવા 13 DEOsનો સીધો સંપર્ક કરી શકે છે.
રાજકીય ગરમાવો વધ્યો
નોંધનીય છે કે મતદાતા યાદીમાં વ્યાપક ફેરફારો અને નામો કપાવાના વિરોધમાં વિપક્ષી પક્ષોએ મોરચો માંડ્યો છે અને દિલ્હીમાં વિરોધ પ્રદર્શનો યોજી રહ્યા છે. આ પરિસ્થિતિ વચ્ચે ચૂંટણી પંચ દ્વારા જારી કરવામાં આવેલો આ ડેટા નાગરિકોની શંકાઓ દૂર કરવા માટે ખૂબ મહત્વનો માનવામાં આવી રહ્યો છે.