Delhi Satya Niketan Building Collapse: દિલ્હીના સાઉથ કેમ્પસ પોલીસ સ્ટેશન વિસ્તાર હેઠળના સત્ય નિકેતનમાં રવિવારે બપોરે એક પાંચ માળની રહેણાંક ઈમારત અચાનક ધરાશાયી થઈ ગઈ હતી. આ અકસ્માતમાં આશરે આઠ લોકો કાટમાળ નીચે દબાયા હોવાની આશંકા છે, જેના પગલે સમગ્ર વિસ્તારમાં ભારે અફરાતફરી સર્જાઈ હતી.
બોયઝ PG ધરાશાયી, ફાયર બ્રિગેડ સ્થળ પર
પ્રાપ્ત પ્રાથમિક માહિતી અનુસાર, જે ઈમારત ધરાશાયી થઈ છે તેમાં વિદ્યાર્થીઓ માટેનું બોયઝ PG 'Hostel Daze' ચાલતું હતું. રવિવારે બપોરે અચાનક આ આખી ઈમારત ધડાકાભેર તૂટી પડી હતી. ફાયર બ્રિગેડને બપોરે આશરે 1:30 વાગ્યે આ ઘટના અંગેની માહિતી મળી હતી. માહિતી મળતાની સાથે જ ફાયર બ્રિગેડની ટીમો અને સ્થાનિક પોલીસનો કાફલો તાત્કાલિક ઘટનાસ્થળે દોડી ગયો હતો.
યુદ્ધના ધોરણે બચાવ અને રાહત કામગીરી શરૂ
સ્થાનિક લોકોએ તાત્કાલિક પોલીસ અને ફાયર બ્રિગેડની ટીમને આ અકસ્માત અંગે જાણ કરી હતી. કાટમાળ નીચે દબાયેલા લોકોને બહાર કાઢવા માટે રાહત અને બચાવ કામગીરી ઝડપથી શરૂ કરી દેવામાં આવી છે. ફાયર બ્રિગેડ અને પોલીસની ટીમો સાથે સ્થાનિક રહીશો પણ બચાવ કાર્યમાં સક્રિયપણે જોડાયા છે અને કાટમાળ હટાવવામાં મદદ કરી રહ્યા છે.
રાહતની વાત એ છે કે, શરૂઆતી તપાસ અને બચાવ કામગીરી દરમિયાન હજી સુધી કોઈ પણ પ્રકારની જાનહાનિ કે મૃત્યુના સમાચાર પ્રાપ્ત થયા નથી. વહીવટીતંત્ર દ્વારા કાટમાળ નીચે ફસાયેલા તમામ લોકોને સલામત રીતે બહાર કાઢવાના પૂરતા પ્રયાસો કરવામાં આવી રહ્યા છે.