સૌરવ દાસ અને આશુતોષ રાંકાની મુશ્કેલી વધી: જામીન મળતા જ ક્રાઈમ બ્રાન્ચે પાઠવી નવી નોટિસ

Delhi News: ગતરોજ બુધવારે કોકરોચ જનતા પાર્ટીના નેતા સૌરવ દાસ અને આશુતોષ રાંકા જામીન પર જેલમાંથી બહાર આવ્યા હતા. બીજી તરફ દિલ્હી પોલીસની ક્રાઇમ બ્રાન્ચે પોતાના કેસની તપાસમાં સામેલ થવા માટે બંને નેતાને નવી નોટિસ પાઠવી છે. આ નવી નોટિસના કારણે હવે બંને નેતાઓએ અદાલતો અને પોલીસ મથકોના ચક્કર કાપવા પડશે તથા તેમના માટે દિલ્હી છોડીને બહાર જવું આસાન રહેશે નહીં.

કેન્દ્ર સરકાર સામે દિલ્હીમાં સતત વિરોધ પ્રદર્શન કરીને પોલીસ અને સામાન્ય જનતા માટે પરેશાની ઊભી કરવાના આરોપોથી ઘેરાયેલા કોકરોચ જનતા પાર્ટીના સહ-સંયોજક સૌરવ દાસ અને આશુતોષ રાંકાની કાનૂની અડચણો સતત વધી રહી છે. દિલ્હીમાં કાનૂની મુકદ્દમાઓના કારણે તેમની મુશ્કેલીઓ વધુ જટિલ બની રહી છે.

આ મામલે સ્પેશિયલ એક્ઝિક્યુટિવ મેજિસ્ટ્રેટ (SEM) કોર્ટે સૌરવ દાસ અને આશુતોષ રાંકા ઉપરાંત તેમને જામીન આપનારા 2 જામીનદારોને શુક્રવારે ફરી કોર્ટમાં હાજર થવાનો આદેશ આપ્યો છે. આ 2 જામીનદારોના દસ્તાવેજોનું સત્તાવાર વેરિફિકેશન કરવામાં આવશે. નોંધનીય છે કે, દિલ્હીમાં બંને નેતાઓને જામીન આપવા માટે સ્થાનિક સ્તરે કોઈ તૈયાર થયું નહોતું.

સ્થાનિક સ્તરે કોઈ જામીનદાર ન મળતાં, સૌરવ દાસને ગાઝિયાબાદના રહેવાસી 1 પ્રોફેસરે જામીન આપ્યા હતા, જ્યારે આશુતોષ રાંકાનેતેમની પત્નીએ જામીન આપ્યા છે. તેમની પત્ની મૂળ બનારસની રહેવાસી છે અને હાલ બેંગલુરુમાં રહે છે, તેમને જામીન આપવાની કાનૂની પ્રક્રિયા પૂર્ણ કરવા માટે ખાસ દિલ્હી આવવું પડ્યું હતું. જામીન મળ્યા છતાં ક્રાઇમ બ્રાન્ચની નવી નોટિસ અને જામીનદારોના દસ્તાવેજોની ચકાસણીને કારણે બંને નેતાઓની કાનૂની ગૂંચવણો ચાલુ જ રહી છે.