ભારતીય સેનામાં નારી શક્તિની નવી મિસાલ: આગ્રાના બાહની દીકરી કર્નલ શિખા ભદૌરિયાએ કાશ્મીરમાં બીઆરઓની કમાન સંભાળી

Colonel Shikha Bhadauria BRO Kashmir: દેશના સૌથી પ્રતિષ્ઠિત અને મહત્વપૂર્ણ સૈન્ય સંગઠનો પૈકીના એક એવા બોર્ડર રોડ્સ ઓર્ગેનાઈઝેશન (BRO) માં ઉત્તર પ્રદેશના આગ્રા જિલ્લાના બાહ તાલુકાની દીકરી કર્નલ શિખા ભદૌરિયાએ એક નવો ઈતિહાસ રચ્યો છે. કર્નલ શિખાને સીમા સડક સંગઠનના પ્રોજેક્ટ બીકન હેઠળ '32 બોર્ડર રોડ્સ ટાસ્ક ફોર્સ' (32 BRTF) ના કમાન્ડિંગ ઓફિસર તરીકે અત્યંત મહત્વની અને સંવેદનશીલ જવાબદારી સોંપવામાં આવી છે. આ ભવ્ય સિદ્ધિથી તેમના વતન પુરા બાઘરાજ (કૈંજરા) ગામ સહિત સમગ્ર પંથકમાં ભારે ખુશી વ્યાપી ગઈ છે.

અતિ સંવેદનશીલ સરહદો અને અમરનાથ યાત્રાના માર્ગની સુરક્ષાની જવાબદારી

આ નવી નિયુક્તિ સાથે કર્નલ શિખા ઉત્તર કાશ્મીરના વ્યૂહાત્મક રીતે અત્યંત મહત્વપૂર્ણ એવા સરહદી વિસ્તારોમાં માર્ગ સંપર્ક અને કનેક્ટિવિટી જાળવી રાખવાનું નેતૃત્વ કરશે. બરફથી ઢંકાયેલા પહાડી અને દુર્ગમ વિસ્તારોમાં ભારતીય સેનાની સરળ અવરજવર તેમજ રેશન-સરસામાનની આપૂર્તિ માટે રસ્તાઓને તમામ ઋતુઓમાં ખુલ્લા રાખવાની મુખ્ય ફરજ તેઓ નિભાવશે. આ ઉપરાંત, પવિત્ર અમરનાથ યાત્રાના રૂટને શ્રદ્ધાળુઓ માટે સુરક્ષિત, સરળ અને અવિરત રાખવામાં પણ તેમની સૈન્ય ટુકડી ચાવીરૂપ ભૂમિકા ભજવશે.

ગોલ્ડ મેડલથી લઈને 'વુમન ઓફિસર ઓફ ધ યર' સુધીની સફર

કર્નલ શિખા ભદૌરિયાની અત્યાર સુધીની સફર અનેક મોટી સિદ્ધિઓથી ભરેલી રહી છે. તેમણે દેશની નામાંકિત સંસ્થા આઈઆઈટી રૂરકી (IIT Roorkee) માંથી એમ.ટેક. (M.Tech) ની પદવી હાંસલ કરી છે. સૈન્ય એકેડેમીમાં પોતાની તાલીમ દરમિયાન તેઓ 'એકેડેમી ગોલ્ડ મેડલ' મેળવી ચૂક્યા છે. વર્ષ 2018 માં ભારતીય સેનામાં ઉત્કૃષ્ટ સેવાઓ આપવા બદલ તેમને 'વુમન ઓફિસર ઓફ ધ યર' ના એવોર્ડથી સન્માનિત કરવામાં આવ્યા હતા. લશ્કરી કૌશલ્યની સાથે સાથે તેઓ રાષ્ટ્રીય સ્તરના શૂટર પણ છે.

પરિવારમાં દેશસેવાની ભવ્ય પરંપરા

કર્નલ શિખાના પરિવારમાં રાષ્ટ્ર સેવાનો વારસો પેઢીઓથી ચાલ્યો આવે છે. તેઓ વિજય પ્રતાપ સિંહ અને ચંદ્રપ્રભાના પુત્રી છે. તેમના કાકા ગજેન્દ્ર સિંહ ભદૌરિયા ભારતીય સેનામાંથી કર્નલ તરીકે નિવૃત્ત થયા છે, જ્યારે તેમના પતિ ઋષભ સિંહ ભદૌરિયા પણ હાલમાં ભારતીય સેનામાં કર્નલ તરીકે દેશની સેવા કરી રહ્યા છે. પરિવારની આ ગૌરવશાળી સૈન્ય પૃષ્ઠભૂમિ અને સંસ્કારોને આગળ ધપાવીને શિખાએ દેશસેવામાં પોતાની એક અલગ ઓળખ ઊભી કરી છે.

આગ્રાના બાહ વિસ્તારના ધારાસભ્ય પક્ષાલિકા સિંહ અને પૂર્વ મંત્રી અરિદમન સિંહે કર્નલ શિખાની આ સિદ્ધિને બિરદાવતા જણાવ્યું છે કે, તેમનું શૌર્ય અને નેતૃત્વ ક્ષમતા માત્ર ભારતીય સેના માટે જ ગર્વની વાત નથી, પરંતુ દેશની કરોડો દીકરીઓ માટે પણ પ્રેરણાનો સ્ત્રોત બનશે.