CJP Protest News: દિલ્હી પોલીસે 'કોકરોચ જનતા પાર્ટી' (CJP) ના સ્થાપક અભિજીત દીપકે સહિત ત્રણ મુખ્ય નેતાઓની ધરપકડ કરી હોવાના મોટા સમાચાર સામે આવ્યા છે. પાર્ટીના સ્થાપક ઉપરાંત પ્રવક્તાઓ સૌરભ દાસ અને આશુતોષ રંકા વિરુદ્ધ પણ કડક કાર્યવાહી કરવામાં આવી છે અને તેમની સામે પોલીસ સ્ટેશનમાં સત્તાવાર ગુનો નોંધવામાં આવ્યો છે. આ અચાનક થયેલી કાર્યવાહીથી રાજકીય વર્તુળોમાં ભારે ચર્ચા જાગી છે.
ભારતીય ન્યાય સંહિતા (BNS) હેઠળ ગુનો દાખલ
દિલ્હી પોલીસે CJP ના આ ત્રણેય નેતાઓ સામે નવા કાયદા એટલે કે ભારતીય ન્યાય સંહિતા (BNS) ની કલમ 126 અને 170 હેઠળ કેસ નોંધ્યા છે. આજે બપોરે આ ત્રણેય નેતાઓને દિલ્હી કેન્ટ સ્થિત ACM કોર્ટમાં સત્તાવાર રીતે રજૂ કરવામાં આવશે. કોર્ટ તેમના વર્તન અને પોલીસ દ્વારા રજૂ કરાયેલા તથ્યોના આધારે તેમને ન્યાયિક કસ્ટડીમાં એટલે કે જેલમાં મોકલવા કે નહીં તેનો આખરી નિર્ણય કરશે.
દિલ્હી પોલીસની અટકાયતી કાર્યવાહી
પોલીસ સૂત્રોના જણાવ્યા અનુસાર, આ સમગ્ર કાર્યવાહીને 'પ્રિવેન્ટિવ એક્શન' (અટકાયતી પગલાં) તરીકે વર્ગીકૃત કરવામાં આવી છે. જ્યારે કાયદો અને વ્યવસ્થા જાળવતી એજન્સીઓને એવી દહેશત હોય કે અમુક વ્યક્તિઓ સામે સમયસર કડક પગલાં ન લેવાથી જાહેર શાંતિ અને વ્યવસ્થાનો ભંગ થઈ શકે છે, ત્યારે પોલીસ અગાઉથી જ દરમિયાનગીરી કરતી હોય છે. આવા સંવેદનશીલ કિસ્સાઓમાં, પોલીસ સંજ્ઞેય ગુનાઓ અંતર્ગત આકરા પગલાં લે છે.
નવા કાયદાકીય માળખા હેઠળ અટકાયતી પગલાં માટે બે મુખ્ય જોગવાઈઓ છે. પહેલી કલમ 126/167 હેઠળ આવે છે, જે સામાન્ય રીતે એવી વ્યક્તિઓ પર લાગુ થાય છે જેને પોલીસ મોટો ખતરો માનતી નથી. પરંતુ, જો પોલીસને કોઈ ગંભીર જોખમ જણાય એટલે કે સંબંધિત વ્યક્તિઓને તાત્કાલિક ન રોકવામાં આવે તો ગંભીર પરિણામો આવી શકે તેમ હોય ત્યારે પોલીસ કલમ 126/170 નો ઉપયોગ કરે છે. આ કેસમાં પોલીસને ઉચ્ચ સ્તરનું જોખમ જણાતા આ જ કડક કલમ હેઠળ કાર્યવાહી કરવામાં આવી છે.
કોર્ટ જેલવાસનો આદેશ આપી શકે છે
કોર્ટમાં રજૂ કર્યા બાદ આ ત્રણેય નેતાઓએ તેમના ભવિષ્યના શાંતિપૂર્ણ વર્તન અંગે વ્યક્તિગત બોન્ડ ભરવો પડશે. જો કોર્ટ આ બોન્ડ અને તેમના ખુલાસાથી સંતુષ્ટ થાય, તો તેમને શરતી જામીન પર મુક્ત કરવામાં આવી શકે છે; અન્યથા, કાયદાકીય પ્રક્રિયા મુજબ કોર્ટ તેમને જેલ મોકલવાનો આદેશ પણ આપી શકે છે.
IGI એરપોર્ટ પર થઈ હતી અટકાયત
મૂળ ઘટના શનિવારે સવારે બની હતી, જ્યારે આ ત્રણેય નેતાઓ મુંબઈથી ફ્લાઈટ દ્વારા દિલ્હી પહોંચ્યા હતા. દિલ્હી પોલીસે ઇન્દિરા ગાંધી આંતરરાષ્ટ્રીય (IGI) એરપોર્ટ પર જ આ ત્રણેય CJP નેતાઓની અટકાયત કરી લીધી હતી. અટકાયત કર્યા બાદ પૂછપરછ અને સુરક્ષા કારણોસર ત્રણેયને અલગ-અલગ સુરક્ષિત સ્થળોએ રાખવામાં આવ્યા હતા, જે બાદ હવે તેમની ઔપચારિક ધરપકડ દર્શાવવામાં આવી છે.