Tiger Shroff Firing: મુંબઈના જુહુ વિસ્તારમાં બોલીવુડ અભિનેતા ટાઈગર શ્રોફ પર થયેલા હુમલાના પ્રયાસ બાદ મહારાષ્ટ્રના મુખ્યમંત્રી દેવેન્દ્ર ફડણવીસે કડક વલણ અપનાવતાં દોષિતો સામે સખત કાર્યવાહી કરવાની ખાતરી આપી છે. તેમણે સ્પષ્ટપણે જણાવ્યું છે કે, આ ઘટનાના કોઈ પણ આરોપીને બક્ષવામાં આવશે નહીં.
મુખ્યમંત્રી ફડણવીસે કહ્યું કે, મુંબઈ પોલીસે આ ગોળીબારની ઘટનાને ખૂબ જ ગંભીરતાથી લીધી છે અને તપાસ દરમિયાન મળેલા પુરાવાના આધારે કેટલાક લોકોની ઓળખ પણ કરી લીધી છે. શંકાસ્પદોની ટૂંક સમયમાં જ ધરપકડ કરવામાં આવશે અને મુખ્ય આરોપીઓની પણ શોધખોળ કરશે, જેઓ અન્ય રાજ્ય કે વિદેશથી આ કાવતરાને અંજામ આપી રહ્યા છે.
'કોઈને બક્ષવામાં નહીં આવે, ટૂંક સમયમાં થશે ધરપકડ'
એક પત્રકાર પરિષદને સંબોધતા સીએમ ફડણવીસે કહ્યું હતું કે, "આ એક ખૂબ જ ગંભીર અને નિંદનીય મામલો છે. મુંબઈ પોલીસે આને પૂરી ગંભીરતાથી લીધો છે. તેમને કેટલાક મહત્વના સુરાગ મળ્યા છે, જેના આધારે તેઓ કામ કરી રહ્યા છે અને કેટલાક લોકોની ઓળખ પણ કરી લેવામાં આવી છે. આ લોકોને ખૂબ જ વહેલી તકે ધરપકડ કરવામાં આવશે."
માત્ર ધરપકડ સાથે તપાસ પૂર્ણ નહીં થાય
મુખ્યમંત્રી ફડણવીસે ભારપૂર્વક જણાવ્યું હતું કે, તપાસ માત્ર સીધી રીતે સામેલ લોકોની ધરપકડ સાથે જ પૂર્ણ નહીં થાય. અધિકારીઓ એવા માસ્ટર માઈન્ડ આરોપીઓને પણ શોધી કાઢશે જેઓ છુપાયેલા છે અને દૂરથી નિર્દેશ આપી રહ્યા છે. તેમણે વધુમાં ઉમેર્યું કે, મહારાષ્ટ્રની અંદરથી કામ કરનારા આરોપીઓની અગાઉ જ ધરપકડ કરવામાં આવી ચૂકી છે.
છુપાયેલા મુખ્ય આરોપીઓને પણ શોધીશું
તેમણે ઉમેર્યું કે, "આ ઉપરાંત, અમે એવા માસ્ટરમાઇન્ડ્સને પણ શોધી કાઢીશું જેઓ છુપાયેલા છે અને દૂરથી આદેશો આપી રહ્યા છે. એ ધ્યાનમાં રાખવું મહત્વપૂર્ણ છે કે આમાંથી કોઈ પણ વ્યક્તિ મહારાષ્ટ્રની અંદરથી કામ નથી કરી રહી. જે લોકો રાજ્યની અંદરથી કામ કરતા હતા, તેમની અગાઉથી જ ધરપકડ કરી લેવામાં આવી છે."
મુખ્યમંત્રીએ વધુમાં જણાવ્યું કે, આ ઘટનાને અંજામ આપનાર લોકો મહારાષ્ટ્ર બહાર, અથવા કદાચ દેશની બહારથી કામ કરી રહ્યા છે. તેમણે સ્પષ્ટ કર્યું કે આ લોકોનો પત્તો લગાવવા માટે રાજ્ય સરકાર અન્ય રાજ્યોની પોલીસ સાથે મળીને કામ કરશે. જે લોકો વિદેશથી કામ કરી રહ્યા છે, તેની કેન્દ્ર સરકારની મદદ લઈને પત્તો લગાવવામાં આવશે અને તેમની સામે કડકમાં કડક કાર્યવાહી કરવામાં આવશે.
ડેપ્યુટી સીએમ એકનાથ શિંદેએ કરી મુલાકાત
આ દરમિયાન, મહારાષ્ટ્રના નાયબ મુખ્યમંત્રી એકનાથ શિંદેએ ટાઇગર શ્રોફના નિવાસસ્થાને પહોંચી તેમની સાથે મુલાકાત કરી હતી, તેમના હાલચાલ પૂછ્યા હતા અને સુરક્ષાની સંપૂર્ણ ખાતરી આપી હતી.