Captain Baba Fraud in Nashik: મહારાષ્ટ્રના નાસિકમાં મર્ચન્ટ નેવીના નિવૃત્ત અધિકારીમાંથી સ્વયંભૂ ધર્મગુરુ બનેલા અશોક ખરાત ઉર્ફે 'કેપ્ટન' ખરાતના કાળા કારનામાઓએ સમગ્ર રાજ્યમાં ખળભળાટ મચાવી દીધો છે. ધાર્મિક વિધિઓના નામે મહિલાઓનું શોષણ કરવાના આરોપમાં ધરપકડ કરાયેલા આ ઢોંગી બાબાના સામ્રાજ્યમાંથી હવે ચોંકાવનારી વિગતો બહાર આવી રહી છે.
દુષ્કર્મ અને તાંત્રિક વિધિના ગંભીર આરોપો:
અશોક ખરાતની ધરપકડ 18 માર્ચના રોજ એક મહિલાની ફરિયાદ બાદ કરવામાં આવી હતી, જેણે આક્ષેપ કર્યો હતો કે ખરાતે તેને નશીલું પીણું પીવડાવી 3 વર્ષ સુધી વારંવાર દુષ્કર્મ ગુજાર્યું હતું. તપાસ દરમિયાન અન્ય મહિલાઓ પણ સામે આવી છે, જેમાં 7 મહિનાની ગર્ભવતી મહિલાનો પણ સમાવેશ થાય છે. પોલીસને શંકા છે કે ખરાત મહિલાઓને પોતાની પાસે અલૌકિક શક્તિ હોવાનું કહીને ડરાવીને તેમનું શોષણ અને બ્લેકમેલ કરતો હતો. કોર્ટમાં સરકારી વકીલે એમ પણ જણાવ્યું કે ખરાતના રહેઠાણ પરથી રિવોલ્વર અને વપરાયેલા કારતૂસ મળી આવ્યા છે, જેનો ઉપયોગ નરબલિ જેવી વિધિઓમાં થયો હોવાની આશંકા છે.
15 લાખનું 'જાદુઈ' મધ અને લક્ઝરી લાઈફ:
આ કેસમાં સૌથી વિચિત્ર ખુલાસો 'જાદુઈ' મધનો છે. ખરાત તેના પ્રભાવશાળી ગ્રાહકો અને નેતાઓને તુર્કીનું દુર્લભ 'એલ્વિશ' મધ વેચતો હતો. આ મધ તુર્કીના આર્ટવિન શહેરની ગુફામાં 1800 મીટરની ઊંડાઈએથી વર્ષમાં માત્ર એક જ વાર મેળવવામાં આવે છે. બજારમાં તેની કિંમત અંદાજે 9 લાખ રૂપિયા પ્રતિ કિલો છે, પરંતુ ખરાત તેને 'જાદુઈ શક્તિ' વાળું ગણાવીને 15 લાખ રૂપિયા પ્રતિ કિલોના ભાવે વેચતો હતો. તે પોતે પણ આ મધ ખાતો હોવાનો અને તેનાથી ઉંમર થંભી જતી હોવાનો દાવો કરતો હતો.
1500 કરોડનું સામ્રાજ્ય અને રાજકીય કનેક્શન:
સ્પેશિયલ ઇન્વેસ્ટિગેશન ટીમ (SIT) ની તપાસમાં અત્યાર સુધીમાં અશોક ખરાત પાસે અંદાજે 1500 કરોડ રૂપિયાની સંપત્તિ હોવાના દસ્તાવેજો મળી આવ્યા છે. આ ઉપરાંત તેના ઠેકાણાઓ પરથી 100 જેટલા વાંધાજનક વીડિયો પણ જપ્ત કરવામાં આવ્યા છે. ખરાતના રાજકીય સંબંધો એટલા ઊંડા હતા કે તેના સતત સંપર્કમાં રહેવા બદલ રાજ્ય મહિલા આયોગના પૂર્વ અધ્યક્ષ રૂપાલી ચાકણકરને રાજીનામું આપવાની ફરજ પડી હતી. એક ડેપ્યુટી કલેક્ટરની બદલી પણ ખરાત સાથેના આર્થિક વ્યવહારોને કારણે રદ કરવામાં આવી છે.
સરકારની કડક કાર્યવાહી:
મહારાષ્ટ્રના મુખ્યમંત્રી દેવેન્દ્ર ફડણવીસે વિધાનસભામાં આ મામલે સ્પષ્ટતા કરતા જણાવ્યું હતું કે, આ અત્યંત ગંભીર વિષય છે અને દોષિતોને કોઈ પણ સંજોગોમાં બક્ષવામાં આવશે નહીં, પછી ભલે તે કોઈ નેતા હોય કે અધિકારી. આ મામલાની તપાસ સીધી પોલીસ મહાનિર્દેશકની દેખરેખ હેઠળ SIT દ્વારા કરવામાં આવી રહી છે. આવકવેરા વિભાગ અને સાયબર પોલીસ પણ આ તપાસમાં જોડાઈ છે.
હાલમાં કોર્ટે અશોક ખરાતની પોલીસ કસ્ટડી 29 માર્ચ સુધી લંબાવી દીધી છે. પોલીસ હવે એ દિશામાં તપાસ કરી રહી છે કે ખરાતે હજુ કેટલી મહિલાઓનું શોષણ કર્યું છે અને તેના આર્થિક સામ્રાજ્યના મૂળ ક્યાં સુધી ફેલાયેલા છે.