BRICS Summit 2026 India Presidency: નવી દિલ્હીના ભવ્ય ભારત મંડપમ ખાતે શનિવારથી ભારતના અધ્યક્ષપદ હેઠળ 2026ની 18મી બ્રિક્સ (BRICS) સમિટનો સત્તાવાર પ્રારંભ થઈ રહ્યો છે. વૈશ્વિક કક્ષાએ ભારતની વધતી મુત્સદ્દીગીરી વચ્ચે આ સમિટમાંથી 50થી વધુ નક્કર અને વ્યવહારુ પરિણામો પ્રાપ્ત થાય તેવી પ્રબળ અપેક્ષા સેવાઈ રહી છે. આ પરિણામોમાં આતંકવાદની સખત નિંદા અને સંયુક્ત રાષ્ટ્ર સુરક્ષા પરિષદ (UNSC)માં ભારતની કાયમી સદસ્યતા માટેના સમર્થન જેવા મુખ્ય મુદ્દાઓનો સમાવેશ થાય છે.
ચાર સ્તંભો પર કેન્દ્રિત રહેશે સમિટ
ભારતના અધ્યક્ષપદ હેઠળ આ સમિટ મુખ્યત્વે ચાર મહત્વપૂર્ણ સ્તંભો—સ્થિતિસ્થાપકતા (resilience), નવીનતા, સહયોગ અને ટકાઉપણું—પર કેન્દ્રિત રહી છે. આ સ્તંભોના આધારે જ વિવિધ માળખાઓ અને કાર્ય યોજનાઓ તૈયાર કરવામાં આવી છે. 'ટાઇમ્સ ઓફ ઇન્ડિયા'ના અહેવાલ મુજબ, ભારતીય અધિકારીઓએ સ્પષ્ટ કર્યું છે કે ભારત માટે મુખ્ય બાબત આતંકવાદના તમામ સ્વરૂપો સામે લડવાની વૈશ્વિક પ્રતિબદ્ધતા છે. આ ઉપરાંત વૈશ્વિક શાસન સંસ્થાઓમાં સુધારણા અને બહુપક્ષીયવાદને મજબૂત કરવા પર સર્વસંમતિ સાધવામાં આવી છે.
પશ્ચિમ એશિયા મામલે અનિશ્ચિતતા છતાં સકારાત્મક વલણ
શરૂઆતમાં પશ્ચિમ એશિયાની સ્થિતિને લઈને સંયુક્ત આરબ અમીરાત (UAE) અને ઈરાન વચ્ચેના મતભેદોના કારણે સંયુક્ત ઘોષણાપત્ર અંગે થોડી અનિશ્ચિતતા ઊભી થઈ હતી. અગાઉ વિદેશ મંત્રીઓની બેઠક પણ સમાન મતભેદોને કારણે સંયુક્ત નિવેદન વિના સમાપ્ત થઈ હતી. જોકે, સરકારી સૂત્રોના જણાવ્યા અનુસાર, ભારતના અધ્યક્ષપદને મળેલા વ્યાપક સમર્થનને જોતા સમિટના સકારાત્મક પરિણામ અંગે સંપૂર્ણ આશાવાદ છે. વર્ષ દરમિયાન 400 જેટલી બેઠકો યોજીને ભારતે તમામ દેશો વચ્ચે સર્વસંમતિ સાધવાની મજબૂત ક્ષમતા દર્શાવી છે.
'ગ્લોબલ સાઉથ'નો અવાજ અને બ્રિજ-બિલ્ડરની ભૂમિકા
વડાપ્રધાન નરેન્દ્ર મોદીના નેતૃત્વ હેઠળ ભારત વિકસતી વૈશ્વિક વ્યવસ્થામાં 'ગ્લોબલ સાઉથ' (વિકાસશીલ દેશો) માટે એક સશક્ત અવાજ બનીને ઉભર્યું છે. સરકારે બ્રિક્સને સંવાદ અને રચનાત્મક સહયોગના મંચ તરીકે સ્થાપિત કરીને 'સેતુ-નિર્માતા' (bridge-builder) તરીકેની ભૂમિકા ભજવી છે. આ બ્રિક્સ અધ્યક્ષપદ સમગ્ર રાષ્ટ્રનો સામૂહિક પ્રયાસ હતો, જેના હેઠળ દેશના 30થી વધુ શહેરોમાં વિવિધ કાર્યક્રમો યોજીને કેન્દ્ર, રાજ્યો, ઉદ્યોગો અને નાગરિક સમાજને જોડવામાં આવ્યા હતા.