Atiq Ahmed Kasari Masari: ઉત્તર પ્રદેશના મુખ્યમંત્રી યોગી આદિત્યનાથે ગુરુવારે એક મોટી જાહેરાત કરતા જણાવ્યું હતું કે, પ્રયાગરાજનો કસારી-મસારી વિસ્તાર જે એક સમયે માર્યા ગયેલા ગુંડા અને રાજકારણી અતીક અહેમદનો ગઢ ગણાતો હતો તે હવે 'શ્રીકૃષ્ણપુરી' તરીકે ઓળખાશે. માફિયાના કબ્જામાંથી મુક્ત કરાવવામાં આવેલી જમીન પર રાજ્ય સરકાર દ્વારા 1,200 ગરીબ પરિવારો માટે આવાસ નિર્માણ કરવામાં આવી રહ્યા છે. ગુનેગારોને કડક ચેતવણી આપતા મુખ્યમંત્રીએ કહ્યું કે, હવે પ્રયાગરાજમાં કોઈ પણ માફિયા પ્રવૃત્તિ કરવાની હિંમત કરશે નહીં અને જો કોઈ સાહસ કરશે તો તેને "માટીમાં મિલાવી દેવામાં આવશે".
પદ્મ લોક એપાર્ટમેન્ટ પ્રોજેક્ટનું ભૂમિપૂજન
મુખ્યમંત્રીએ પ્રયાગરાજમાં અતીક અહેમદના ગેરકાયદેસર કબ્જામાંથી મુક્ત કરાયેલી સરકારી જમીન પર પ્રસ્તાવિત 'પદ્મ લોક એપાર્ટમેન્ટ' પ્રોજેક્ટનું ભૂમિપૂજન કર્યા બાદ આ જાહેરાત કરી હતી. યોગી આદિત્યનાથે જણાવ્યું કે માફિયાઓ પાસેથી જમીન છોડાવીને ગરીબોને ઘર આપવાની સરકારની ઝુંબેશ હેઠળ પ્રથમ તબક્કામાં કસારી-મસારીના 602 પરિવારોને અને બીજા તબક્કામાં અન્ય 598 પરિવારોને મકાનો મળશે. આ પ્રોજેક્ટથી કુલ 1,200 પરિવારોને પોતાનું છત મળશે. અગાઉ પણ આવી જ પહેલ હેઠળ લુકરગંજમાં 86 ગરીબ પરિવારોને મકાનો આપવામાં આવ્યા હતા.
અતીક અહેમદ અને અગાઉની સરકારો પર પ્રહાર
સમાજવાદી પાર્ટી પર નિશાન સાધતા યોગી આદિત્યનાથે આક્ષેપ કર્યો કે અગાઉની સરકારો માફિયાઓને પ્રોત્સાહન આપતી હતી. અતીક અહેમદ અને તેનો ભાઈ અશ્રફ જે જમીન ઈચ્છતા તે તેમની થઈ જતી અને તત્કાલીન સરકારો મૌન રહેતી હતી. તેમણે સ્પષ્ટ કર્યું કે લોકોની સંપત્તિ પર ગેરકાયદેસર કબ્જો કરનારાઓ સામે કડક કાર્યવાહી કરાશે અને જરૂર પડ્યે તેમની પૈતૃક સંપત્તિ જપ્ત કરીને ગરીબો માટે મકાનો બનાવાશે. ઉલ્લેખનીય છે કે, 15 એપ્રિલ 2023 ના રોજ પોલીસ સંરક્ષણ હેઠળ મેડિકલ ચેકઅપ માટે લઈ જવાતી વખતે પત્રકારોના વેશમાં આવેલા ત્રણ હુમલાખોરોએ અતીક અહેમદ અને તેના ભાઈ અશ્રફની ગોળી મારીને હત્યા કરી દીધી હતી.
શ્રીકૃષ્ણપુરી ટાઉનશીપની વિશેષતાઓ
પ્રયાગરાજ ડેવલપમેન્ટ ઓથોરિટી (PDA) ના સચિવ વિનીત કુમાર સિંહના જણાવ્યા અનુસાર:
- પદ્મ લોક એપાર્ટમેન્ટ: આ પ્રોજેક્ટ 9,811 ચોરસ મીટરમાં ફેલાયેલો હશે, જેમાં 14 માળની બિલ્ડિંગ અને 602 ફ્લેટ હશે.
- ફ્લેટનું ક્ષેત્રફળ: દરેક ફ્લેટ 2BHK (બે બેડરૂમ, હોલ અને કિચન) ધરાવતો 56.45 ચોરસ મીટરનો હશે.
- સુવિધાઓ: ટાઉનશીપમાં માર્કેટ, પાર્ક, સ્પોર્ટ્સ ફેસિલિટી, જીમ, રેઈનવોટર હાર્વેસ્ટિંગ, સોલર સિસ્ટમ, સ્વિમિંગ પૂલ, કમ્યુનિટી હોલ અને કમર્શિયલ કોમ્પ્લેક્સ હશે.
- લાભાર્થીઓની પસંદગી: PDA દ્વારા એપ્રિલ 2025 માં લોટરી સિસ્ટમ મારફતે ફ્લેટના લાભાર્થીઓની પસંદગી કરી લેવામાં આવી હતી.
આ ઉપરાંત, મુખ્યમંત્રીએ જાહેરાત કરી હતી કે પ્રયાગરાજમાં નિર્માણ પામી રહેલી ઈન્ડસ્ટ્રિયલ ટ્રેનિંગ ઈન્સ્ટિટ્યૂટ (ITI) નું નામ મહારાજા બિજલી પાસીના નામ પર રાખવામાં આવશે.