Delhi: 20 જુલાઈ 2026થી શરૂ થઈ રહેલા સંસદના ચોમાસુ સત્ર પૂર્વે દેશની રાજધાની દિલ્હીમાં સુરક્ષા વ્યવસ્થા સખત કરી દેવામાં આવી છે. 'સિટીઝન્સ ફોર જસ્ટિસ એન્ડ પીસ' (CJP) સંગઠન દ્વારા સોમવારે પ્રસ્તાવિત સંસદ માર્ચને લઈને દિલ્હી પોલીસે મોટો ખુલાસો કર્યો છે. પોલીસે સામાન્ય જનતા માટે એક મહત્વપૂર્ણ જાહેરનામું બહાર પાડીને સાફ કર્યું છે કે, આ પ્રસ્તાવિત માર્ચ કે અન્ય કોઈ પણ પ્રકારના જુલસ માટે સંગઠન દ્વારા ન તો કોઈ પરવાનગી માંગવામાં આવી છે અને ન તો પોલીસ વિભાગ દ્વારા આવી કોઈ મંજૂરી આપવામાં આવી છે.
દિલ્હીમાં કલમ 163 BNSS લાગુ, પ્રદર્શનો પર કડક રોક
દિલ્હી પોલીસના જણાવ્યા અનુસાર, સંસદ સત્રની સંવેદનશીલતાને ધ્યાનમાં રાખીને સમગ્ર નવી દિલ્હી જિલ્લામાં કલમ 163 BNSS અંતર્ગત તાત્કાલિક અસરથી લાગુ કરી દેવામાં આવી છે. આ કાયદા હેઠળ નવી દિલ્હી વિસ્તારમાં કોઈ પણ પ્રકારના વિરોધ પ્રદર્શન, રેલી, કૂચ કે 5 અથવા તેનાથી વધુ લોકોના એકઠા થવા પર સંપૂર્ણ પ્રતિબંધ રહેશે. જે લોકોને શાંતિપૂર્ણ વિરોધ પ્રદર્શન કરવું હોય, તેઓએ પૂર્વ મંજૂરી લઈને માત્ર જંતર-મંતરના નિર્ધારિત સ્થળ પર જ પ્રદર્શન કરવાનું રહેશે. સત્ર દરમિયાન મહત્વના સરકારી પ્રતિષ્ઠાનો અને વીઆઈપી (VIP) લોકોની સુરક્ષાને સર્વોચ્ચ અગ્રતા આપવામાં આવી છે.
નિયમોનું ઉલ્લંઘન કરનારાઓને પોલીસની આકરી ચેતવણી
પોલીસ પ્રવક્તાએ સોશિયલ મીડિયા પર ચાલી રહેલી અફવાઓ પર ધ્યાન ન આપવાની અપીલ કરતા સ્પષ્ટ ચેતવણી આપી છે કે, જો કોઈ પણ વ્યક્તિ કે સંગઠન આ જાહેરનામા અને સરકારી આદેશનો ભંગ કરવાનો પ્રયાસ કરશે, તો તેમની સામે ભારતીય ન્યાય સંહિતા (BNS)ની કલમ 223 તેમજ કાયદાની અન્ય કડક જોગવાઈઓ હેઠળ તાત્કાલિક કાનૂની પગલાં લેવામાં આવશે.
રાજધાનીમાં કાયદો અને વ્યવસ્થા જાળવી રાખવા તેમજ સામાન્ય જનજીવન અને ટ્રાફિક વ્યવસ્થાને કોઈ અસર ન પહોંચે તે માટે વધારાના સુરક્ષા દળો પણ તૈનાત કરી દેવામાં આવ્યા છે. દિલ્હી પોલીસે તમામ જાગૃત નાગરિકોને કાયદાનું સન્માન કરવા અને કોઈ પણ બિનસત્તાવાર સભા કે રેલીનો હિસ્સો ન બનવા માટે અનુરોધ કર્યો છે.