Anant Singh Daughter Tilak Ceremony Viral Video: લગ્નની સીઝન શરૂ થતાની સાથે જ બિહારના મોકામાના બાહુબલી ધારાસભ્ય અનંત સિંહની દીકરી શિવાંગી સિંહના શાહી લગ્ન સોશિયલ મીડિયા પર ચર્ચાનો મુખ્ય વિષય બન્યા છે. દાનાપુરના એક રિસોર્ટમાં આયોજિત શિવાંગીના તિલક સમારોહના અનેક વીડિયો હાલ ઈન્ટરનેટ પર ઝડપથી વાયરલ થઈ રહ્યા છે. આ વીડિયોમાં ભોજનની વ્યવસ્થા અને ખાવાની અછતને લઈને લોકોની મિશ્ર પ્રતિક્રિયાઓ સામે આવી રહી છે.
અપેક્ષા કરતા વધુ ભીડ ઉમટતા ભોજનની અછત સર્જાઈ
તિલક સમારોહમાં મહેમાનો માટે પરંપરાગત બિહારી વાનગીઓ, વિવિધ મીઠાઈઓ અને અનેક ફૂડ સ્ટોલ્સનું ભવ્ય આયોજન કરવામાં આવ્યું હતું. જોકે, આયોજનમાં અપેક્ષા કરતા ઘણી વધારે ભીડ એકઠી થઈ જવાને કારણે કેટલીક જગ્યાએ ભોજન ખૂટી પડ્યું હોવાના અહેવાલો સામે આવ્યા છે. સોશિયલ મીડિયા પર વાયરલ થયેલા વીડિયોમાં ફૂડ કાઉન્ટર પર લોકોની ભારે ભીડ અને અવ્યવસ્થાના દ્રશ્યો જોવા મળી રહ્યા છે, જેમાં ભોજન પીરસનારા કર્મચારીઓ પણ ભીડને સંભાળતા પરેશાન દેખાઈ રહ્યા છે.
'ન લિટ્ટી ચોખા છે કે ન સ્ટાર્ટર' – ભોજનને આપી 5 રેટિંગ
સોશિયલ મીડિયા પ્લેટફોર્મ 'X' @Thebihar_in હેન્ડલ પરથી શેર કરાયેલા એક વીડિયોમાં બે યુવતીઓ તિલક સમારોહના ભોજનનો રિવ્યુ આપતી જોવા મળે છે. એક યુવતી ભોજનને 10 માંથી માત્ર 5 રેટિંગ આપતા કહે છે કે, "અનંત ચાચાનું જેટલું મોટું નામ અને રુઆબ છે, તે હિસાબે ન તો ખાવાની ક્વોલિટી બરાબર હતી, ન લિટ્ટી ચોખા હતા કે ન તો સ્ટાર્ટરની કોઈ વ્યવસ્થા હતી."
જોકે, આ જ વીડિયોમાં બીજી યુવતી આયોજનનો બચાવ કરતા કહે છે કે, "જ્યારે લાખો લોકો માટે ઓપન ઈન્વિટેશન હોય, ત્યારે આટલી વિશાળ ભીડનું સંચાલન કરવું એ જ મોટી વાત છે અને તે દ્રષ્ટિએ બધું બરાબર છે."
પ્લેટો ભરીને મીઠાઈ લઈ જતા લોકો અને 25 નવેમ્બરના લગ્નની તૈયારીઓ
અન્ય એક 'X' હેન્ડલ @ChapraZila પરથી શેર કરાયેલા વીડિયોમાં કેટલાક લોકો પ્લેટો ભરી-ભરીને મીઠાઈ લઈ જતા જોવા મળી રહ્યા છે, જ્યારે બીજા એક વીડિયોમાં ખાવાનું ખતમ થઈ જવાથી ખાલી ગ્લાસ અને પ્લેટોના ઢગલા દેખાય છે અને લોકો નિરાશ થઈને પરત ફરતા હોવાનો દાવો કરાયો છે. આ ઉપરાંત, અન્ય એક વાયરલ વીડિયોમાં સેંકડો ગેસ સિલિન્ડર એકસાથે જોવા મળી રહ્યા છે, જે 25 નવેમ્બરના રોજ અનંત સિંહના ગામમાં યોજાનાર મુખ્ય લગ્ન સમારોહની ભવ્ય રસોઈની તૈયારીઓ માટે મંગાવવામાં આવ્યા હોવાનું કહેવાય છે.
