Aadu Vadi Chaa Recipe: હજુ તો શિયાળાની શરૂઆત થઈ છે અને સવાર-સાંજ હવામાં ઠંડકનો અહેસાસ થવા લાગ્યો છે. આવી ઋતુમાં દિવસની શરૂઆત ગરમાગરમ ચાના કપથી થાય તો મૂડ પણ સારો થઈ જાય. ખાસ કરીને ચૂલા પર ધીમે ધીમે ઉકળતી આદુવાળી દેશી ચાની સુગંધ આખા ઘરમાં ફેલાઈ જાય તો વાત જ કંઈક અલગ હોય છે. બજારમાં મળતી ચા કરતાં ઘરે બનાવેલી તાજા આદુની કડક ચાનો સ્વાદ પણ નિરાળો હોય છે. તો ચાલો જાણીએ એકદમ દેશી અંદાજમાં આદુવાળી ચા બનાવવાની રીત.
આદુવાળી દેશી ચા બનાવવા માટેની સામગ્રી
- 2 કપ દૂધ
- 1 કપ પાણી
- 2 ચમચી ચાની ભૂકી
- 1 થી 2 ઇંચ આદુ
- 2 થી 3 ચમચી ખાંડ (સ્વાદ પ્રમાણે)
- 2 નંગ ફુદીનાનાં પાન (વૈકલ્પિક)
- 2 એલચી (વૈકલ્પિક)
આદુવાળી કડક ચા બનાવવાની રીત
સૌથી પહેલાં આદુને બરાબર ધોઈને ખાંડી લો અથવા છીણી લો. દેશી ચાનો અસલી સ્વાદ મેળવવા માટે આદુને મિક્સરમાં પીસવાને બદલે ખાંડવાથી તેની સુગંધ વધારે સારી રીતે બહાર આવે છે.
હવે એક તપેલીમાં પાણી ગરમ કરવા મૂકો. તેમાં ખાંડેલું આદુ અને ચાની ભૂકી ઉમેરીને મધ્યમ તાપે ઉકળવા દો. ચાનો રંગ ધીમે ધીમે ઘેરો થવા લાગે ત્યારે તેમાં ખાંડ અને ઈચ્છા હોય તો એલચી ઉમેરો.
ત્યારબાદ તેમાં દૂધ નાખીને ચાને ધીમા તાપે થોડીવાર ઉકળવા દો. ચા બે-ત્રણ વખત ઊભરો આવે ત્યાં સુધી ઉકાળો, જેથી આદુ અને ચાની ભૂકીનો સ્વાદ દૂધમાં બરાબર ભળી જાય.
હવે ગેસ બંધ કરીને ચાને ગરણીથી ગાળી લો. તૈયાર છે ગરમાગરમ આદુવાળી દેશી ચા. તેને માટીના કુલડ અથવા કાચના કપમાં ભરીને ગરમાગરમ પીરસો. સાથે ગરમાગરમ ગાંઠિયા કે ખાખરા હોય તો સવારની ચાની મજા બમણી થઈ જશે.
