Pressure Cooker Cleaning Tips: રસોડામાં દરરોજ ઉપયોગમાં લેવાતા પ્રેશર કુકર પર સમય જતાં કાળા ડાઘ, બળેલા ખોરાકના નિશાન અને તેલની ચીકાશ જામી જાય છે. ઘણી વખત સાબુથી ધોયા પછી પણ આ ડાઘ દૂર થતા નથી. આવી સ્થિતિમાં કુકરને વારંવાર જોરથી ઘસવાને બદલે રસોડામાં સરળતાથી મળી રહેતી ત્રણ વસ્તુઓની મદદથી તેની સફાઈ કરી શકાય છે. જોકે, કુકરની ધાતુ અને તેની સપાટીને ધ્યાનમાં રાખીને સફાઈ કરવી જરૂરી છે.
પ્રેશર કુકર સાફ કરવાની 3 ઘરેલુ રીતો
આ પણ વાંચો
બેકિંગ સોડાથી દૂર કરો બળેલા ડાઘ
પ્રેશર કુકરની અંદર ખોરાક બળી ગયો હોય અને તળિયે ચોંટી ગયો હોય તો બેકિંગ સોડા ઉપયોગી થઈ શકે છે. આ માટે કુકરમાં બળેલો ભાગ ડૂબી જાય એટલું પાણી ભરો અને તેમાં એકથી બે ચમચી બેકિંગ સોડા ઉમેરો. ત્યારબાદ પાણીને થોડી મિનિટ ગરમ કરો અને ગેસ બંધ કરી દો. પાણી ઠંડું થાય પછી બળેલા ખોરાકને નરમ સ્પોન્જથી હળવા હાથે સાફ કરો. જો ડાઘ સંપૂર્ણપણે દૂર ન થાય તો આ પ્રક્રિયા ફરીથી કરી શકાય છે. કુકરની સપાટી પર તીક્ષ્ણ વસ્તુથી ખોતરવાનું ટાળો.
વિનેગરથી સાફ કરો સફેદ નિશાન
કુકર પર સફેદ ડાઘ દેખાતા હોય તો તેનું એક કારણ પાણીમાં રહેલા ખનિજો હોઈ શકે છે. આવા ડાઘ માટે સફેદ વિનેગર અને પાણી ઉપયોગી થઈ શકે છે. એક ભાગ વિનેગરમાં બે ભાગ પાણી ભેળવીને ડાઘવાળી જગ્યાએ લગાવો. થોડી મિનિટ પછી નરમ કપડાથી સપાટી સાફ કરો અને ત્યારબાદ સ્વચ્છ પાણીથી સારી રીતે ધોઈ લો. વિનેગરનો ઉપયોગ કરતા પહેલાં કુકરના ઉત્પાદકની સૂચનાઓ તપાસો. ખાસ કરીને એલ્યુમિનિયમના કુકર પર એસિડિક પદાર્થોનો લાંબો સમય ઉપયોગ ન કરવો.
લીંબુ અને મીઠાથી દૂર કરો ચીકાશ
કુકરની બહારની સપાટી પર તેલની ચીકાશ અને હળવા ડાઘ જામી ગયા હોય તો લીંબુની મદદ લઈ શકાય છે. ડાઘવાળી જગ્યાએ થોડો લીંબુનો રસ લગાવો અને જરૂર હોય તો થોડું મીઠું વાપરો. ત્યારબાદ નરમ સ્પોન્જથી હળવા હાથે સાફ કરો. સફાઈ કર્યા પછી કુકરને પાણીથી સારી રીતે ધોઈને સૂકા કપડાથી લૂછી લો. જોકે, મીઠાના દાણાથી સ્ક્રેચ પડી શકે છે, તેથી પોલિશ કરેલી, એલ્યુમિનિયમ અથવા નોન-સ્ટિક સપાટી પર તેને ઘસવાનું ટાળો.
કુકરની ચીકાશ દૂર કરવા આ રીત પણ અજમાવો
જો કુકર પર માત્ર તેલ અને સામાન્ય ગંદકી જામી હોય તો ગરમ પાણીમાં થોડું ડિશવૉશ લિક્વિડ ભેળવીને કુકરને થોડી વાર પલાળી રાખો. ત્યારબાદ નરમ સ્પોન્જથી સાફ કરો. સ્ટીલના કુકર પર પણ સફાઈ કરતી વખતે સપાટીને નુકસાન ન થાય તેનું ધ્યાન રાખવું.
સફાઈ કરતી વખતે આ બાબતોનું ધ્યાન રાખો
કુકરના ઢાંકણની સિટી, સેફ્ટી વાલ્વ, ગાસ્કેટ અને અન્ય સુરક્ષા ભાગોમાં પાણી કે સફાઈના પદાર્થો જમા ન રહેવા દો. ઉત્પાદકની સૂચના મુજબ જ આ ભાગો સાફ કરો. કુકરની અંદર જમા થયેલો દબાણ સંપૂર્ણપણે નીકળી ગયો હોય અને કુકર ઠંડું થયું હોય ત્યારે જ તેની સફાઈ કરો. બેકિંગ સોડા, વિનેગર અને લીંબુને એકસાથે ભેળવવાને બદલે જરૂરિયાત મુજબ અલગ-અલગ ઉપયોગ કરો.