Board exam preparation: બોર્ડની પરીક્ષાઓ નજીક આવી રહી છે ત્યારે વિદ્યાર્થીઓ અને વાલીઓ બંને માટે આ સમય ખૂબ જ મહત્વપૂર્ણ બની જાય છે. તહેવારોની મોસમ અને રજાઓની આળસ ખંખેરીને હવે ગંભીરતાથી અભ્યાસમાં જોડાવાનો સમય પાકી ગયો છે. જો વાલીઓ નીચે મુજબની પદ્ધતિ અપનાવે તો બાળકો કોઈપણ તણાવ વગર બોર્ડની પરીક્ષામાં સફળતા મેળવી શકે છે.
સકારાત્મક અને પ્રોત્સાહક વાતાવરણ
પરીક્ષાના સમયે ઘરનું વાતાવરણ શાંત અને સકારાત્મક હોવું અત્યંત જરૂરી છે. વાલીઓએ બાળક પર દબાણ વધારવાને બદલે તેમના સાથીદાર બનવું જોઈએ. તેમની સાથે નિયમિત વાતચીત કરો અને જાણો કે તેઓ કયા વિષયમાં મુશ્કેલી અનુભવી રહ્યા છે. જ્યારે બાળક પોતાનું નિર્ધારિત લક્ષ્ય પૂરું કરે, ત્યારે તેમની નાની પ્રશંસા કરીને તેમનો આત્મવિશ્વાસ વધારો. યાદ રાખો, તમારો વિશ્વાસ બાળકના ડરને દૂર કરી શકે છે.
વૈજ્ઞાનિક સમયપત્રક (Time-Table)
માત્ર ટાઈમ-ટેબલ બનાવવું પૂરતું નથી, તેનું પાલન કરવું જરૂરી છે. વાલીઓએ બાળકો સાથે બેસીને એક પ્રેક્ટિકલ સમયપત્રક બનાવવું જોઈએ.
સવારનો સમય: સૌથી મુશ્કેલ વિષયો માટે ફાળવો, કારણ કે ત્યારે મન તાજું હોય છે.
સંતુલન: એક અઘરા વિષય પછી એક સરળ વિષય રાખવો જેથી કંટાળો ન આવે.
પુનરાવર્તન: દર બીજા કે ત્રીજા દિવસે જે વાંચ્યું હોય તેનું રિવિઝન કરવાની આદત પાડો. પ્રશ્નોને મુદ્દાસર (Points) યાદ રાખવાની ટેકનિક શીખવો.
સ્વાસ્થ્ય અને ઊંઘની જાળવણી
સ્વસ્થ શરીરમાં જ સ્વસ્થ મનનો વાસ હોય છે. અભ્યાસના ચક્રમાં બાળકો ખોરાક અને ઊંઘની ઉપેક્ષા ન કરે તેનું ધ્યાન રાખો.
આહાર: જંક ફૂડને બદલે બદામ, અખરોટ, તાજા ફળો અને લીલા શાકભાજી આપો. પૂરતું પાણી પીવાની આદત પાડો જેથી શરીરમાં સ્ફૂર્તિ રહે.
ઊંઘ: એકાગ્રતા વધારવા માટે 7 થી 8 કલાકની ઊંઘ અનિવાર્ય છે. મોડી રાત સુધી જાગવા કરતા વહેલી સવારે ઉઠીને વાંચવું વધુ હિતાવહ છે. જો બાળકને બપોરે થોડી વાર 'પાવર નેપ' (ટૂંકી ઊંઘ) લેવાની આદત હોય તો તે ફાયદાકારક છે.
ડિજિટલ ડિટોક્સ: ફોનથી અંતર
મોબાઈલ ફોન હાલમાં અભ્યાસમાં સૌથી મોટો અવરોધ છે. બાળકો સાથે વાત કરીને અભ્યાસના કલાકો દરમિયાન ફોન દૂર રાખવાની સમજૂતી કરો. 'સ્માર્ટ ઉપયોગ' અને 'વ્યસન' વચ્ચેનો તફાવત સમજાવો. જો બાળક વિરામમાં ફોન વાપરે તો તેને 10-15 મિનિટ સુધી જ મર્યાદિત રાખો. સમય પૂરો થતા જ તેમને પ્રેમથી યાદ અપાવો.
બોર્ડની પરીક્ષા એ જીવનનો અંત નથી, પણ એક મહત્વનો પડાવ છે. યોગ્ય દિશા, શિસ્ત અને વાલીઓના સહકારથી કોઈપણ વિદ્યાર્થી આ પડકારને તકમાં બદલી શકે છે. હજુ પણ પૂરતો સમય છે, જરૂર છે માત્ર એક મક્કમ શરૂઆતની છે.