Winter Skin Care: હવે ધીમે-ધીમે શિયાળાની શરૂઆત થઈ રહી છે અને વાતાવરણમાં ઠંડક વધવાની સાથે ત્વચાની સંભાળ રાખવી પણ જરૂરી બની જાય છે. બદલાતી ઋતુની અસરને કારણે સ્કીનમાં ડ્રાયનેસ આવવા લાગે છે અને ત્વચા પોતાની કુદરતી ચમક ગુમાવવા લાગે છે. ખાસ કરીને હાથ-પગ પર સફેદ પોપડીઓ અને રૂક્ષતા દેખાવા લાગે છે. જો તમે પણ શિયાળાની શરૂઆતમાં જ આવી સમસ્યાથી બચવા અને ત્વચાને મુલાયમ રાખવા માંગતા હોવ, તો ઘરે જ રસોડાની કેટલીક વસ્તુઓથી આ ઘરેલું બોડી સ્ક્રબ તૈયાર કરી શકો છો.
ચણાના લોટ અને મલાઈથી બનાવો ઘરેલું બોડી સ્ક્રબ
રસોડામાં સરળતાથી મળી રહેતી ચણાનો લોટ, ઘઉંનો લોટ, મલાઈ અને હળદર જેવી વસ્તુઓનો ઉપયોગ કરીને આ બોડી સ્ક્રબ તૈયાર કરી શકાય છે. આ મિશ્રણ ત્વચાની ઉપરની સપાટીની હળવી સફાઈ કરવામાં મદદ કરી શકે છે. મલાઈને કારણે પેસ્ટ ક્રીમી બને છે અને ત્વચા ધોયા પછી મોઇશ્ચરાઇઝર લગાવવાથી ભેજ જાળવવામાં મદદ મળે છે.
બોડી સ્ક્રબ બનાવવા માટે જરૂરી સામગ્રી
- 1 મોટી ચમચી ચણાનો લોટ
- 1 મોટી ચમચી ઘઉંનો લોટ
- 1 ચમચી તાજી મલાઈ
- 1 ચપટી હળદર
- જરૂર મુજબ દૂધ
- અડધી ચમચી ચંદન પાવડર (વૈકલ્પિક)
આ રીતે તૈયાર કરો ઘરેલું બોડી સ્ક્રબ
સૌથી પહેલાં એક સાફ વાટકીમાં ચણાનો લોટ અને ઘઉંનો લોટ લઈ લો. હવે તેમાં મલાઈ અને હળદર ઉમેરો. બધી સામગ્રીને બરાબર મિક્સ કર્યા પછી તેમાં થોડું-થોડું દૂધ ઉમેરતા જાઓ. જ્યાં સુધી સ્મૂધ અને ઘટ્ટ પેસ્ટ તૈયાર ન થાય ત્યાં સુધી મિશ્રણ હલાવતા રહો. જો તમને ચંદન પાવડર માફક આવતું હોય તો તે પણ ઉમેરી શકો છો. આ રીતે તમારું ઘરેલું બોડી સ્ક્રબ તૈયાર થઈ જશે.

શરીર પર બોડી સ્ક્રબ લગાવવાની સાચી રીત
પહેલાં શરીર સાફ કરો: સ્ક્રબ લગાવતાં પહેલાં શરીરને હૂંફાળા પાણીથી ભીનું કરી લો. આનાથી ત્વચા પર રહેલી ધૂળ અને પરસેવો સાફ થઈ જશે.
હવે પેસ્ટ લગાવો: તૈયાર કરેલું મિશ્રણ હાથ, પગ અને શરીરના અન્ય ભાગો પર લગાવો. કોણી, ઘૂંટણ અને એડી જેવા ભાગો પર પણ લગાવી શકો છો. જોકે, ત્વચા પર વધારે દબાણ આપવાનું ટાળો.
થોડીવાર રહેવા દો: પેસ્ટને આશરે 10 મિનિટ સુધી રહેવા દો. ત્યારબાદ થોડું પાણી લગાવીને હળવા હાથે સાફ કરો. સ્કીનને જોરથી ઘસીને સાફ ન કરો.
મોઇશ્ચરાઇઝર લગાવવાનું ભૂલશો નહીં: સ્ક્રબ સાફ કર્યા પછી ટુવાલથી શરીરને હળવેથી સૂકવો. ત્યારબાદ બોડી લોશન અથવા મોઇશ્ચરાઇઝર લગાવી લો, જેથી ત્વચામાં ભેજ જળવાઈ રહે.
બોડી સ્ક્રબ વાપરતી વખતે આ ભૂલો ટાળો
શિયાળામાં ત્વચા પહેલેથી જ સૂકી અને સંવેદનશીલ હોઈ શકે છે. તેથી વારંવાર સ્ક્રબ કરવાનું ટાળવું જોઈએ. પહેલીવાર ઉપયોગ કરતાં પહેલાં હાથના નાના ભાગ પર પેચ ટેસ્ટ જરૂર કરો. જો ત્વચા પર ખંજવાળ, બળતરા કે લાલાશ હોય તો આ મિશ્રણનો ઉપયોગ ન કરો.
સાથે જ ત્વચા પર દેખાતી સૂકી પોપડીઓને નખથી ખેંચીને કે જોરથી ઘસીને દૂર કરવાનો પ્રયાસ ન કરો. જો ત્વચાની ડ્રાયનેસ લાંબા સમય સુધી રહે અથવા પોપડીઓ વધતી જાય તો ત્વચા નિષ્ણાતની સલાહ લેવી યોગ્ય છે.

