Dahi Kebab Recipe: દિવાળીના તહેવારમાં ઘરે મહેમાનોનું આવવા-જવાનું રહે છે, ત્યારે ચા સાથે કંઈક સ્વાદિષ્ટ નાસ્તો પીરસવાનું મન થાય છે. જો તમે દર વખતે સમોસા કે કચોરી બનાવવાને બદલે કંઈક નવું ટ્રાય કરવા માંગતા હોવ તો દહીં કબાબ સારો વિકલ્પ છે. બહાર રેસ્ટોરન્ટમાં મળતા આ કબાબ તમે ઘરે પણ સરળતાથી બનાવી શકો છો. બહારથી ક્રિસ્પી અને અંદરથી એકદમ સોફ્ટ એવા દહીં કબાબની રેસિપી જાણીએ.
દહીં કબાબ બનાવવા માટેની સામગ્રી
- 1 કપ ઘટ્ટ દહીં (હંગ કર્ડ)
- 2 ચમચી બારીક સમારેલી ડુંગળી
- 2 ચમચી બારીક સમારેલી કોથમીર
- 1 લીલું મરચું બારીક સમારેલું
- 2 ચમચી છીણેલું પનીર
- 2 ચમચી બ્રેડ ક્રમ્બ્સ
- 2 ચમચી કોર્નફ્લોર
- અડધી ચમચી આદુની પેસ્ટ
- અડધી ચમચી ગરમ મસાલો
- અડધી ચમચી જીરું પાવડર
- સ્વાદ અનુસાર મીઠું
- તળવા માટે તેલ
દહીં કબાબ બનાવવાની રીત
સૌથી પહેલાં દહીંને મલમલના કપડામાં બાંધીને 4થી 5 કલાક અથવા દહીંનું વધારાનું પાણી નીકળી જાય ત્યાં સુધી લટકાવી રાખો. આ રીતે તૈયાર થયેલા ઘટ્ટ દહીંને હંગ કર્ડ કહેવામાં આવે છે. દહીં જેટલું ઘટ્ટ હશે એટલા જ સરસ કબાબ બનશે.
હવે એક મોટા બાઉલમાં હંગ કર્ડ લો. તેમાં છીણેલું પનીર, બારીક સમારેલી ડુંગળી, લીલું મરચું, કોથમીર અને આદુની પેસ્ટ ઉમેરો. ત્યારબાદ તેમાં ગરમ મસાલો, જીરું પાવડર અને સ્વાદ અનુસાર મીઠું નાખીને બધી સામગ્રીને બરાબર મિક્સ કરો.
હવે આ મિશ્રણમાં બ્રેડ ક્રમ્બ્સ અને કોર્નફ્લોર ઉમેરો. બંને વસ્તુઓ મિશ્રણને બાંધવામાં મદદ કરશે. તૈયાર મિશ્રણને થોડો સમય ફ્રિજમાં રાખો, જેથી તેના કબાબ બનાવવામાં સરળતા રહે.
ત્યારબાદ હાથમાં થોડું તેલ લગાવીને મિશ્રણમાંથી નાના-નાના ગોળા બનાવો અને તેને હળવા હાથે દબાવીને કબાબનો આકાર આપો. એક પ્લેટમાં થોડા બ્રેડ ક્રમ્બ્સ લઈને તૈયાર કબાબને તેની ઉપર હળવા હાથે રોલ કરો, જેથી કબાબની બહાર ક્રિસ્પી પડ તૈયાર થાય.
હવે એક પેનમાં તેલ ગરમ કરો. તેલ ગરમ થાય એટલે કબાબને ધીમા અને મધ્યમ તાપે બંને બાજુથી ગોલ્ડન બ્રાઉન અને ક્રિસ્પી થાય ત્યાં સુધી શેકો. કબાબ ખૂબ નરમ હોવાથી તેને પલટાવતી વખતે ખાસ ધ્યાન રાખો.
તૈયાર છે તમારા સ્વાદિષ્ટ દહીં કબાબ. તેને લીલી ચટણી, ટામેટાંની ચટણી અથવા મીઠી ચટણી સાથે ગરમાગરમ પીરસો.