Navratri 2026 Jewellery: નવરાત્રીમાં ગરબા અને ડાંડિયા નાઈટ માટે યુવતીઓ અને મહિલાઓ ચણિયા ચોળીની સાથે જ્વેલરી પર પણ ખાસ ધ્યાન આપે છે. ચણિયા ચોળીનો લુક યોગ્ય જ્વેલરી વગર અધૂરો લાગી શકે છે. આ વખતે જો તમે ટ્રેડિશનલની સાથે ટ્રેન્ડી લુક પણ મેળવવા માંગતા હો, તો કેટલીક ખાસ જ્વેલરી તમારા આઉટફિટને વધુ સુંદર બનાવી શકે છે. તો જાણો ચણિયા ચોળી સાથે કઈ 6 જ્વેલરી પહેરી શકાય.
ઝુમકા
ચણિયા ચોળી સાથે મોટા અને સુંદર ઝુમકા સૌથી સરળ વિકલ્પ છે. ખાસ કરીને ઓક્સિડાઇઝ્ડ ઝુમકા ગરબા લુક સાથે ખૂબ જ સારા લાગે છે. તમે તમારા ચણિયા ચોળીના કલર અને ડિઝાઇન પ્રમાણે સિલ્વર, ઓક્સિડાઇઝ્ડ અથવા કુન્દનના ઝુમકા પસંદ કરી શકો છો. જો તમારો ચણિયો વધારે હેવી છે તો બહુ વધારે જ્વેલરી પહેરવાને બદલે માત્ર સ્ટેટમેન્ટ ઝુમકા પણ પહેરી શકાય. તેનાથી લુક ટ્રેડિશનલ હોવાની સાથે એલિગન્ટ પણ લાગશે.
કંગન
ગરબા રમતી વખતે હાથની જ્વેલરી પણ લુકને ખાસ બનાવે છે. ચણિયા ચોળી સાથે રંગબેરંગી બંગડીઓ અથવા ઓક્સિડાઇઝ્ડ કંગન પહેરી શકાય છે. તમે ચણિયા ચોળીમાં રહેલા રંગ સાથે મેચ થતી બંગડીઓ પસંદ કરી શકો છો. જો આઉટફિટમાં મિરર વર્ક અથવા હેવી વર્ક હોય તો મેટલ કે ઓક્સિડાઇઝ્ડ કંગન પણ સુંદર લાગશે.
નથ
ગુજરાતી ટ્રેડિશનલ લુકને વધુ ખાસ બનાવવા માટે નથ સારો વિકલ્પ છે. ચણિયા ચોળી સાથે ઓક્સિડાઇઝ્ડ નથ ખાસ કરીને સારી લાગે છે. જો તમને હેવી લુક પસંદ હોય તો મોટી નથ પહેરી શકો છો, જ્યારે સિમ્પલ લુક માટે નાની નથ પસંદ કરી શકાય. નથ પસંદ કરતી વખતે ચણિયા ચોળીના વર્ક અને અન્ય જ્વેલરી સાથે તેનું બેલેન્સ રાખવું જરૂરી છે.
માંગ ટીકો
માથા પર માંગ ટીકો પહેરવાથી ચણિયા ચોળીનો ટ્રેડિશનલ લુક વધુ સુંદર બને છે. ઓક્સિડાઇઝ્ડ, સિલ્વર અથવા કુન્દનનો માંગ ટીકો ગરબા નાઈટ માટે સારો વિકલ્પ બની શકે છે. જો તમે વાળમાં બન બનાવ્યો હોય તો માંગ ટીકા સાથે માથાપટ્ટી પણ પહેરી શકો છો. જ્યારે ઓપન હેર સાથે સિમ્પલ માંગ ટીકો પણ ખૂબ સુંદર લાગશે.
હાર
ચણિયા ચોળી સાથે ગળામાં હાર પહેરવાથી આખો લુક વધુ હેવી અને ટ્રેડિશનલ લાગે છે. તમે ઓક્સિડાઇઝ્ડ સિલ્વરનો લાંબો હાર અથવા ચોકર પસંદ કરી શકો છો. જો ચણિયા ચોળી પર પહેલેથી જ વધારે વર્ક હોય તો ખૂબ હેવી નેકલેસ પહેરવાને બદલે એક સિમ્પલ ચોકર અથવા લાંબો હાર પસંદ કરવો સારો રહેશે. જ્યારે સિમ્પલ ચણિયા ચોળી સાથે હેવી નેકલેસ લુકને હાઇલાઇટ કરી શકે છે.
અંગૂઠી
છેલ્લે હાથની આંગળીઓમાં પહેરવામાં આવતી સ્ટેટમેન્ટ રિંગ પણ ગરબા લુકને ખાસ બનાવી શકે છે. ઓક્સિડાઇઝ્ડ સિલ્વર, મિરર વર્ક અથવા ટ્રેડિશનલ ડિઝાઇનવાળી મોટી રિંગ ચણિયા ચોળી સાથે સારી લાગે છે. જો તમે પહેલેથી જ હેવી કંગન અથવા બંગડીઓ પહેરી હોય તો એક કે બે સ્ટેટમેન્ટ રિંગ પૂરતી રહેશે. આ રીતે લુક વધારે ઓવર પણ નહીં લાગે અને સ્ટાઇલિશ પણ દેખાશે.