Yamuna Expressway Bus Accident: ગ્રેટર નોઈડા નજીક યમુના એક્સપ્રેસ-વે પર થયેલા બસ અકસ્માતમાં આગ લાગવાથી 9 લોકોના મોત નીપજ્યા છે. અકસ્માતગ્રસ્ત બસ વિરુદ્ધ વાહનવ્યવહારના નિયમોના ભંગ બદલ કુલ ₹1.75 લાખના 19 મેમો નોંધાયેલા હતા. આ ઉપરાંત RC બુકમાં બસનો નોંધાયેલો રંગ કાળો હતો, જ્યારે અકસ્માત સ્થળે બસ પીળા અને સફેદ રંગની મળી આવી હતી. વાંચો, Jagran Exclusive Report.
અકસ્માતગ્રસ્ત બસ સામે 19 મેમો અને ₹1.75 લાખનો દંડ
આ પણ વાંચો
ગ્રેટર નોઈડામાં યમુના એક્સપ્રેસ-વે પર ખાનગી AC સ્લિપર બસમાં આગ લાગવાની કરૂણ ઘટનામાં 9 લોકોના મોત થયા છે. આ ઘટના બાદ સામે આવેલા રિપોર્ટ અનુસાર, બસ સતત ટ્રાફિક નિયમોની અનદેખી કરીને દોડાવવામાં આવી રહી હતી. ટ્રાફિક પોલીસે અકસ્માતગ્રસ્ત બસ પર અલગ-અલગ નિયમોના ભંગ બદલ કુલ ₹1.75 લાખની રકમના 19 મેમો ફટકાર્યા હતા, છતાં તેનું સંચાલન રોકવામાં આવ્યું નહોતું.
એન્જિનની ખામી અને ટ્રાફિક નિયમોની બેદરકારી
બસના એન્જિનમાંથી અવાજ આવવાની સતત ફરિયાદ મળી રહી હોવા છતાં તેને રસ્તા પર દોડતી અટકાવવા કે તેની ટેકનિકલ તપાસ કરવાને બદલે માત્ર ચલણ જ કાપવામાં આવતા હતા. બસના સંચાલનમાં અનેક સ્તરે નિયમોના ધજાગરા ઉડ્યા હોવાનું સામે આવ્યું છે.
ઓછી ઉંમરના ડ્રાઈવર દ્વારા સંચાલન: જાન્યુઆરી 2026 માં ચિલ્લા વિસ્તારમાં 20 વર્ષથી ઓછી ઉંમરના ચાલક પાસે બસ ચલાવવા બદલ ચલણ કપાયું હતું.
ફ્યુઅલ અને રેટ્રોફિટિંગના નિયમોનો ભંગ: જૂન 2025 માં ફ્યુઅલ ચેન્જ તથા રેટ્રોફિટિંગ સંબંધિત નિયમોના ભંગ બદલ ચલણ આપવામાં આવ્યું હતું.
રંગ અને બોડીમાં વિસંગતતા: બસની RC પર તેનો રંગ કાળો દર્શાવ્યો હતો, પરંતુ ઘટના સ્થળે બસ પીળા અને સફેદ રંગની હતી. આ ઉપરાંત પરમિટ સંબંધિત ઉલ્લંઘનના પણ ચલણ થયેલા હતા.
તંત્રની કામગીરી અને દેખરેખ સામે ગંભીર સવાલો
જવાબદાર અધિકારીઓ માત્ર ચલણ કાપીને પોતાની કામગીરી બતાવતા રહ્યા અને સંચાલક ચલણ હોવા છતાં નિયમોને નેવે મૂકીને બસ દોડાવતો રહ્યો. 9 લોકોના મોત બાદ પોલીસ પ્રશાસન, ફાયર બ્રિગેડ અને ટ્રાફિક વિભાગ સહિતનું સરકારી તંત્ર સક્રિય થયું છે. અગાઉથી જ સતત ફરિયાદો અને નિયમ ભંગ સામે આવ્યા હોવા છતાં સમયસર અસરકારક પગલાં કેમ ન લેવાયા, તે અંગે ગંભીર સવાલો ઉભા થયા છે.