UAE Oil Tanker Drone Attack: UAE નજીક શારજહા એન્કરેજમાં 9 ઓક્ટોબરના રોજ પનામાના ફ્લેગ વાળા કાચા તેલના ટેન્કર MT Gem No 2 પર ડ્રોન હુમલો કરવામાં આવ્યો હતો. આ હુમલા બાદ જહાજ પર સવાર તમામ 22 ભારતીય નાવિકો સંપૂર્ણપણે સુરક્ષિત બચી ગયા છે. કેન્દ્રીય મંત્રી સર્બાનંદ સોનોવાલે આ સમગ્ર મામલાની પુષ્ટિ કરતા કહ્યું કે, સ્થિતિ પર નજર રાખવામાં આવી છે.
કેન્દ્રીય મંત્રી સર્બાનંદ સોનોવાલે શનિવારે સોશિયલ મીડિયા પ્લેટફોર્મ 'X' પર આ અંગે વિગતો આપતા જણાવ્યું કે, સ્થિતિ પર સતત નજર રાખવામાં આવી રહી છે. ભારતીય નાવિકોની સુરક્ષા અને કુશળતા સુનિશ્ચિત કરવા માટે જહાજની મેનેજમેન્ટ કંપની સાથે સંપર્ક જાળવી રાખવામાં આવ્યો છે. તાજેતરના દિવસોમાં ખાડી ક્ષેત્ર અને કાળા સમુદ્રમાં વ્યાપારી જહાજો પર વધતા હુમલાઓએ આંતરરાષ્ટ્રીય સ્તરે સુરક્ષા અંગે ગંભીર ચિંતા ઊભી કરી છે.
નાવિકો અને જહાજોની સુરક્ષા માટે આંતરરાષ્ટ્રીય પહેલ
વ્યાપારી જહાજો અને નાવિકોની સુરક્ષા માટે વિદેશ મંત્રાલયના પ્રવક્તા રણધીર જયસ્વાલે માહિતી આપી કે 'ગ્રુપ ઓફ ફ્રેન્ડ્સ ઓન સેફ્ટી એન્ડ સિક્યુરિટી ઓફ શિપિંગ એન્ડ સીફારર્સ' (Group of Friends on Safety and Security of Shipping and Seafarers) ની શરૂઆત કરવામાં આવી છે. આ પહેલનો મુખ્ય ઉદ્દેશ્ય દરિયાઈ ક્ષેત્ર સાથે સંકળાયેલા દેશોને એક મંચ પર લાવવાનો છે, જેથી આંતરરાષ્ટ્રીય સહયોગ દ્વારા નાવિકો અને વેપારી જહાજોની સુરક્ષા સુનિશ્ચિત કરી શકાય.
ભારત અને લાઈબેરિયાની સંયુક્ત આગેવાની હેઠળ બેઠક
સંયુક્ત રાષ્ટ્ર મહાસભા (UNGA) દરમિયાન શરૂ કરવામાં આવેલા આ જૂથની પહેલી બેઠક ન્યૂયોર્કમાં યોજાઈ હતી. આ બેઠકની સહ-અધ્યક્ષતા ભારતના વિદેશ મંત્રી એસ. જયશંકર અને લાઇબેરિયાના વિદેશ મંત્રી સારા બેસોલો ન્યાંતી એ કરી હતી, જેમાં 25 દેશોએ ભાગ લીધો હતો.
હુમલાઓની કડક નિંદા અને વિદેશ મંત્રીનું નિવેદન
ભારત અને લાઈબેરિયાએ સંયુક્ત નિવેદન જાહેર કરતા ખાડી ક્ષેત્ર અને કાળા સમુદ્રમાં કમર્શિયલ જહાજો પર થઈ રહેલા હુમલાઓની સખત શબ્દોમાં નિંદા કરી છે. બંને દેશોએ સ્પષ્ટ કર્યું કે દરિયાઈ વેપારને પ્રભાવિત કરતા અને નિર્દોષ લોકોના જીવ લેતા હુમલાઓ અયોગ્ય છે. વિદેશ મંત્રી એસ. જયશંકરે જણાવ્યું કે, ભારત નાવિકો સપ્લાય કરતો એક મુખ્ય દેશ છે, અને તેથી જ આ હુમલા તાત્કાલિક ધોરણે બંધ થાય તે અત્યંત જરૂરી છે.