Trump Iran ceasefire: મધ્ય પૂર્વમાં ચાલી રહેલા ભારે તણાવ વચ્ચે એક મોટા સમાચાર સામે આવ્યા છે. અમેરિકી રાષ્ટ્રપતિ ડોનાલ્ડ ટ્રમ્પે ઈરાન પર થનારા સંભવિત હુમલાને હાલ પૂરતો અટકાવી દીધો છે અને યુદ્ધવિરામની સમયમર્યાદા લંબાવવાની જાહેરાત કરી છે. ટ્રમ્પના આ આશ્ચર્યજનક નિર્ણય પાછળ પાકિસ્તાની નેતૃત્વની મધ્યસ્થી હોવાનું બહાર આવ્યું છે, જેના માટે ખુદ ટ્રમ્પે પાકિસ્તાનના વડાપ્રધાન શેહબાઝ શરીફ અને ફિલ્ડ માર્શલ અસીમ મુનીરનો આભાર માન્યો છે.
ટ્રમ્પનો ‘ટ્રુથ સોશિયલ’ પર ધડાકો
યુદ્ધવિરામની ડેડલાઈન પૂરી થવાના ગણતરીના કલાકો પહેલા જ રાષ્ટ્રપતિ ટ્રમ્પે તેમના સોશિયલ મીડિયા પ્લેટફોર્મ ‘ટ્રુથ’ પર લખ્યું કે, "ઈરાની સરકાર હાલમાં ખૂબ જ વિભાજિત છે. પાકિસ્તાનના ફિલ્ડ માર્શલ અસીમ મુનીર અને વડાપ્રધાન શેહબાઝ શરીફના કહેવાથી અમે ઈરાન પરનો હુમલો હાલ સ્થગિત રાખ્યો છે. જ્યાં સુધી ઈરાનના નેતાઓ એકીકૃત શાંતિ પ્રસ્તાવ સાથે સામે નહીં આવે, ત્યાં સુધી આ યુદ્ધવિરામ જારી રહેશે."
ટ્રમ્પે સ્પષ્ટ કર્યું છે કે તેઓ ઈરાનને સ્થાયી શાંતિ કરાર માટે વિચારવાનો પૂરતો સમય આપવા માંગે છે. આ પ્રથમ વખત છે જ્યારે અમેરિકાએ ઈરાન માટે કોઈ કડક સમયમર્યાદા નક્કી કરવાને બદલે પાકિસ્તાની પરામર્શ મુજબ વ્યૂહરચનામાં ફેરફાર કર્યો છે.
નાકાબંધી યથાવત: હોર્મુઝની સમુદ્રધૂની પર કડક નજર
જોકે, હુમલો અટકાવવાની સાથે ટ્રમ્પે ઈરાનને કોઈ મોટી છૂટછાટ આપી નથી. તેમણે ભારપૂર્વક જણાવ્યું છે કે હોર્મુઝ સ્ટ્રેટમાં ઈરાની દરિયાકાંઠાના બંદરોની નાકાબંધી અમેરિકી નૌકાદળ દ્વારા ચાલુ જ રહેશે. અમેરિકી સૈન્ય હજુ પણ ‘હાઈ એલર્ટ’ પર છે અને કોઈ પણ પલકવારે કાર્યવાહી કરવા સક્ષમ છે. જ્યાં સુધી વાટાઘાટો અંતિમ તબક્કે ન પહોંચે ત્યાં સુધી આ આર્થિક અને લશ્કરી દબાણ જાળવી રાખવામાં આવશે.
પાકિસ્તાનનો પ્રતિસાદ
પાકિસ્તાનના આર્મી ચીફ અસીમ મુનીરે ટ્રમ્પના આ નિર્ણયને આવકારીને ‘X’ પર પ્રતિક્રિયા આપી હતી. તેમણે લખ્યું, "યુદ્ધવિરામ લંબાવવાની અમારી વિનંતી સ્વીકારવા બદલ હું રાષ્ટ્રપતિ ટ્રમ્પનો આભાર માનું છું. પાકિસ્તાન આ સંઘર્ષનો શાંતિપૂર્ણ ઉકેલ લાવવા માટે ખંતપૂર્વક પ્રયાસો ચાલુ રાખશે." મુનીરે આશા વ્યક્ત કરી છે કે ઇસ્લામાબાદમાં યોજાનારી વાટાઘાટોના બીજા રાઉન્ડ દરમિયાન બંને દેશો કાયમી ‘શાંતિ કરાર’ પર પહોંચશે.
શા માટે પાકિસ્તાન આટલું સક્રિય છે?
પાકિસ્તાન હાલમાં ભયાનક આર્થિક સંકટમાંથી પસાર થઈ રહ્યું છે. ભંડોળની અછતને કારણે દેશમાં દૈનિક વીજ કાપ છે અને તાજેતરમાં જ તેણે સાઉદી અરેબિયા પાસેથી $૩ બિલિયનની લોન લેવી પડી છે.
રાજદ્વારી ઈમેજ: ઈરાન અને અમેરિકા વચ્ચે મધ્યસ્થી બનીને પાકિસ્તાન વિશ્વ મંચ પર પોતાની વિશ્વસનીયતા વધારવા માંગે છે.
આર્થિક લાભ: જો આ શાંતિ પ્રયાસો સફળ રહે, તો પાકિસ્તાનને આંતરરાષ્ટ્રીય રોકાણ અને વેપારમાં મોટી રાહત મળી શકે છે.