China Tibet Earthquake: ચીનના તિબેટ ક્ષેત્રમાં ગુરુવારે મોડી રાત્રે એક શક્તિશાળી અને વિનાશક ભૂકંપ આવતાં ભારે તારાજી સર્જાઈ છે. ‘ચાઇના અર્થક્વેક નેટવર્ક્સ સેન્ટર’ (CENC) અનુસાર, રિએક્ટર સ્કેલ પર 7.0 ની તીવ્રતા ધરાવતા આ ભૂકંપના કારણે અત્યાર સુધીમાં ઓછામાં ઓછા 16 લોકોનાં દુઃખદ મોત થયાં છે, જ્યારે 32 થી વધુ લોકો ગંભીર રીતે ઘાયલ થયા છે. જાન્યુઆરી 2024 પછી ચીનમાં નોંધાયેલો આ સૌથી શક્તિશાળી ભૂકંપ માનવામાં આવી રહ્યો છે.
રાત્રે 10:33 વાગ્યે ધ્રૂજી ઊઠી જમીન
અહેવાલો મુજબ, સ્થાનિક સમય અનુસાર રાત્રે લગભગ 10:33 વાગ્યે ભૂકંપનો તીવ્ર આંચકો અનુભવાયો હતો. આ ભૂકંપનું કેન્દ્રબિંદુ ઉત્તરી તિબેટના નાગચુ ક્ષેત્રમાં જમીનની અંદર 10 કિલોમીટરની ઊંડાઈએ નોંધાયું હતું. આ વિસ્તાર સમુદ્ર સપાટીથી સરેરાશ 4,864 મીટરની ઊંચાઈ પર આવેલો છે.
ભૂકંપ એટલો તીવ્ર હતો કે ક્ષણભરમાં જ સેંકડો મકાનો ધરાશાયી થઈ ગયા હતા. સ્થાનિક તંત્રના જણાવ્યા અનુસાર, અત્યાર સુધીમાં ઓછામાં ઓછા 339 મકાનો સંપૂર્ણપણે ધરાશાયી થયા છે અથવા તો તેમને ભારે નુકસાન પહોંચ્યું છે. આ ઉપરાંત, આસપાસના અનેક ગામોમાં મોટાભાગના ઘરોની દીવાલોમાં મોટી તિરાડો પડી ગઈ છે.
આફ્ટરશોક્સ અને લોકોમાં ભારે દહેશત
7.0 ની તીવ્રતાના મુખ્ય આંચકા બાદ પણ આસપાસના વિસ્તારોમાં 3 થી 4 ની તીવ્રતાના અનેક હળવા આંચકા સતત નોંધાયા હતા. ભૂકંપનું કેન્દ્રબિંદુ તિબેટની રાજધાની લ્હાસાથી લગભગ 400 કિલોમીટર દૂર હતું.
રાત્રિના સમયે અચાનક આવેલી આ આપત્તિને કારણે સ્થાનિક લોકોમાં ભારે ગભરાટ અને ભાગદોડ મચી ગઈ હતી. સ્થાનિક મીડિયા દ્વારા જાહેર કરાયેલા વીડિયોમાં લોકો પોતાના ઘરોમાંથી બહાર નીકળીને કડકતી ઠંડીમાં ખુલ્લા મેદાનોમાં અથવા રસ્તા પર પાર્ક કરેલી પોતાની ગાડીઓમાં આશરો લેતા જોવા મળ્યા હતા.
યુદ્ધના ધોરણે રાહત અને બચાવ કામગીરી
ઘટનાની જાણ થતાં જ સ્થાનિક પોલીસ, ફાયર બ્રિગેડ અને આપત્તિ વ્યવસ્થાપન ટીમ (NDRF સમાન) બચાવ કામગીરીમાં જોડાઈ ગઈ છે. ઉત્તરીય શહેર નાગચુ અને આસપાસના અસરગ્રસ્ત વિસ્તારોમાં કાટમાળ હટાવીને દબાયેલા લોકોને બહાર કાઢવાની કામગીરી ચાલી રહી છે.
ઘાયલ થયેલા 32 લોકોમાંથી 11 લોકોની હાલત અત્યંત ગંભીર જણાવવામાં આવી રહી છે, જ્યારે 21 લોકોને સામાન્ય ઈજાઓ થઈ છે. બેઘર થયેલા સ્થાનિક રહેવાસીઓ માટે તંત્ર દ્વારા કામચલાઉ આશ્રયસ્થાનો અને તંબુઓ (ટેન્ટ) ઊભા કરીને ખોરાક અને તબીબી સહાય પૂરી પાડવામાં આવી રહી છે.