Donald Trump: અમેરિકી પ્રમુખ ડોનાલ્ડ ટ્રમ્પની ગ્રીનલેન્ડને અમેરિકા સાથે જોડવાની અને ત્યાં અત્યાધુનિક "ગોલ્ડન ડોમ" મિસાઇલ ડિફેન્સ સિસ્ટમ તૈનાત કરવાની યોજનાએ આંતરરાષ્ટ્રીય સ્તરે વિવાદ છેડ્યો છે. કેનેડા અને યુરોપિયન દેશોએ આ સુરક્ષા પ્રણાલીનો સખત વિરોધ કર્યો છે, જેના કારણે ટ્રમ્પ અને કેનેડાના વડાપ્રધાન માર્ક કાર્ની વચ્ચે સીધી ટક્કર જોવા મળી રહી છે.
કેનેડાનો ચીન સાથે મોટો વેપાર કરાર
સ્વિટ્ઝર્લેન્ડના દાવોસમાં વર્લ્ડ ઇકોનોમિક ફોરમ (WEF) દરમિયાન કેનેડાએ ચીન સાથે $7 બિલિયનના મોટા નિકાસ કરારની જાહેરાત કરી છે. પીએમ માર્ક કાર્નીએ ચીનને અમેરિકા કરતાં વધુ "વિશ્વસનીય" ભાગીદાર ગણાવતા કહ્યું કે, આ કરારથી કેનેડિયન વ્યવસાયો અને કામદારો માટે નવા બજારો ખુલશે.
ટ્રમ્પની ચેતવણી: "ચીન તમને ગળી જશે"
કેનેડા અને ચીનની વધતી નિકટતાથી ગુસ્સે થયેલા ટ્રમ્પે સોશિયલ મીડિયા પ્લેટફોર્મ 'ટ્રુથ સોશિયલ' પર આકરી પ્રતિક્રિયા આપી છે. ટ્રમ્પે લખ્યું કે, "કેનેડા ગ્રીનલેન્ડ પર ગોલ્ડન ડોમ બનાવવાની વિરુદ્ધ છે, જ્યારે આ સિસ્ટમ કેનેડાનું પણ રક્ષણ કરવાની છે. ચીન સાથે વેપાર કરીને કેનેડા મોટી ભૂલ કરી રહ્યું છે, બેઇજિંગ પ્રથમ વર્ષમાં જ તેમને ગળી જશે (કબજે કરી લેશે)."
"ફ્રી વસ્તુઓ" માટે આભાર માનો: ટ્રમ્પ
WEF ના સંબોધનમાં ટ્રમ્પે કેનેડાની ટીકા કરતા કહ્યું કે, સુરક્ષા સહિત અમેરિકા તરફથી મળતી "મફત સુવિધાઓ" માટે કેનેડાએ અમેરિકાનો આભાર માનવો જોઈએ. તેમણે સ્પષ્ટ કર્યું કે ગોલ્ડન ડોમ મિસાઇલ ડિફેન્સ સિસ્ટમ ઉત્તર અમેરિકાના સંરક્ષણ માટે અનિવાર્ય છે.
વિવાદનું મુખ્ય કારણ
- 1) ગ્રીનલેન્ડનું વ્યૂહાત્મક મહત્વ: ટ્રમ્પ કોઈપણ ભોગે ગ્રીનલેન્ડ પર અમેરિકી સૈન્ય પ્રભુત્વ ઈચ્છે છે.
- 2) ગોલ્ડન ડોમ: આ મિસાઇલ સિસ્ટમને યુરોપ અને કેનેડા પોતાની સ્વાયત્તતા પર જોખમ માને છે.
- 3) ચીન ફેક્ટર: અમેરિકાના પડોશી દેશ કેનેડાનું ચીન તરફ ઝુકાવ અમેરિકાની સુરક્ષા ચિંતાઓ વધારે છે.
આ ઘટનાક્રમે ઉત્તર અમેરિકાના બે સૌથી જૂના સાથી દેશો વચ્ચેના સંબંધોમાં મોટી તિરાડ પાડી છે. આગામી સમયમાં આ વિવાદ વધુ વણસે તેવી શક્યતા છે.