Sudan Gold Mine Airstrike: ઉત્તર સુડાનમાં સોનાની ખાણ પર થયેલા એક વિનાશક હવાઈ હુમલામાં ઓછામાં ઓછા 72 નાના પાયે કામ કરતા ખાણિયાઓના દર્દનાક મોત થયા છે. માનવાધિકાર જૂથ 'ઇમર્જન્સી લોયર્સ' એ રવિવારે આ ઘટનાની જાણકારી આપતા દાવો કર્યો હતો કે, તાજેતરના મહિનાઓમાં સોનાના ખાણકામ ક્ષેત્ર પર થયેલો આ બીજો મોટો હુમલો છે.
ઇજિપ્ત વાયુસેના સામે ગંભીર આરોપો
માનવાધિકાર સંગઠન 'ઇમર્જન્સી લોયર્સ' એ આ હવાઈ હુમલા માટે ઇજિપ્તીયન વાયુસેનાને જવાબદાર ઠેરવી છે. જૂથના જણાવ્યા અનુસાર, આવા સરહદ પારના લશ્કરી હુમલાઓ આંતરરાષ્ટ્રીય કાયદાનું સીધું ઉલ્લંઘન છે. જોકે, આંતરરાષ્ટ્રીય સમાચાર એજન્સી રોઇટર્સે આ દાવાની સ્વતંત્ર ચકાસણી કરી શકાઈ નથી તેમ જણાવ્યું છે. બીજી તરફ, ઇજિપ્તીયન સૈન્ય દ્વારા આ અંગે કોઈ ટિપ્પણી કરવામાં આવી નથી અને ઇજિપ્તના વિદેશ મંત્રાલયે પણ વિનંતીઓનો કોઈ જવાબ આપ્યો નથી.
સોશિયલ મીડિયા અને સ્થાનિક અધિકાર જૂથો દ્વારા શેર કરવામાં આવેલી તસવીરોમાં કાટમાળ વચ્ચે ડઝનેક મૃતદેહો વિખરાયેલા અને કફનમાં લપેટાયેલા જોવા મળ્યા છે. પ્રત્યક્ષદર્શી ખાણિયાઓના જણાવ્યા મુજબ, હવાઈ હુમલા બાદ જમીન પર ચારેય તરફ વિનાશના દ્રશ્યો સર્જાયા હતા.
સોનાની દાણચોરી અને ગૃહયુદ્ધનું સંકટ
ઉત્તરી સુડાનમાં ચાલુ સશસ્ત્ર સંઘર્ષને કારણે આજીવિકાના અન્ય સ્ત્રોતો ઠપ થઈ જતાં લોકો મોટા પાયે કામચલાઉ સોનાની ખાણોમાં મજૂરી કરવા મજબૂર બન્યા છે. સોનું હાલમાં યુદ્ધરત પક્ષો માટે રોકડ મેળવવાનો મુખ્ય આધાર બની ગયું છે. નિષ્ણાતો અને ઉદ્યોગ જગતના સૂત્રોના જણાવ્યા અનુસાર, અહીંથી મોટા પ્રમાણમાં સોનાની ગેરકાયદેસર દાણચોરી પાડોશી દેશ ઇજિપ્તમાં કરવામાં આવી રહી છે, જેના કારણે સરહદી વિસ્તારોમાં તણાવ વધ્યો છે.
ડ્રોન યુદ્ધ અને વધતી જાનહાની
સુડાનની સરકારી સેના અને અર્ધલશ્કરી દળો (RSF) વચ્ચે ચાલી રહેલા યુદ્ધમાં હવે ડ્રોન અને એરસ્ટ્રાઈક પ્રાથમિક શસ્ત્ર બની ગયા છે. સંયુક્ત રાષ્ટ્ર (UN) ના અહેવાલ મુજબ, આ ઘટનાના બે દિવસ પહેલા શુક્રવારે પણ સુદાનના બ્લુ નાઇલ રાજ્યના સૈન્ય-નિયંત્રિત વિસ્તારમાં આવેલા વિસ્થાપિત શિબિર પર ડ્રોન હુમલો થયો હતો, જેમાં 31 લોકોએ જીવ ગુમાવ્યા હતા.