Vladimir Putin Donald Trump Xi Jinping Summit: રશિયા અને યુક્રેન વચ્ચે ચાલી રહેલા સંઘર્ષને ઉકેલવા માટે રશિયાના રાષ્ટ્રપતિ વ્લાદિમીર પુતિને એક નવો અને મહત્વકાંક્ષી કૂટનીતિક પ્રસ્તાવ મૂક્યો છે. પુતિને યુએસ પ્રમુખ ડોનાલ્ડ ટ્રમ્પ અને ચીનના રાષ્ટ્રપતિ શી જિનપિંગ સાથે આવતા મહિને ત્રિપક્ષીય શિખર સંમેલન (Trilateral Summit) યોજવા માટેનો પ્રસ્તાવ રજૂ કર્યો છે. 'ધ વોલ સ્ટ્રીટ જર્નલ'ના અહેવાલ મુજબ, 9 ઓક્ટોબરના રોજ ડોનાલ્ડ ટ્રમ્પ સાથે ટેલિફોનિક વાતચીત દરમિયાન પુતિને આ પહેલ કરી હતી.
ચીનમાં APEC સમિટ દરમિયાન મુલાકાતની શક્યતા
અહેવાલો મુજબ, ક્રેમલિન દ્વારા 18 અને 19 નવેમ્બરના રોજ ચીનના શેનઝેન શહેરમાં યોજાનારી એશિયા-પેસિફિક આર્થિક સહકાર (APEC) સમિટ દરમિયાન આ ત્રિપક્ષીય વાટાઘાટો યોજવાનું સૂચન કરવામાં આવ્યું છે.
ક્રેમલિનનું વલણ: ક્રેમલિનના પ્રવક્તા દિમિત્રી પેસ્કોવે પુષ્ટિ કરી છે કે ત્રણેય દેશો વચ્ચે ચર્ચા ચાલુ છે, પરંતુ હજુ સુધી કોઈ ચોક્કસ એજન્ડા કે કરાર આખરી થયો નથી.
ચીનનો પ્રતિસાદ: ચીની અધિકારીઓએ સંકેત આપ્યો છે કે જો ટ્રમ્પ આ બેઠકમાં ભાગ લેવા તૈયાર થશે તો ચીનને આ ત્રિપક્ષીય વાટાઘાટો સામે કોઈ વાંધો નથી.
યુરોપ અને યુક્રેનની ચિંતા: આ પ્રસ્તાવથી યુક્રેન અને યુરોપિયન સાથી દેશોમાં ભારે ચિંતા વ્યાપી છે, કારણ કે આ સંભવિત શાંતિ વાટાઘાટોમાંથી યુક્રેનનું પ્રતિનિધિત્વ સંપૂર્ણપણે ગાયબ છે.
ઝેલેન્સકી પર ટ્રમ્પના પ્રહાર અને 'ટ્રુથ સોશિયલ' પોસ્ટ
અમેરિકી પ્રમુખ ડોનાલ્ડ ટ્રમ્પે વાટાઘાટોમાં નોંધપાત્ર પ્રગતિ થઈ રહી હોવાનો દાવો કર્યો છે. સોશિયલ મીડિયા પ્લેટફોર્મ 'ટ્રુથ સોશિયલ' પર લખતા ટ્રમ્પે જણાવ્યું હતું કે, "હું રશિયા અને યુક્રેન વચ્ચે શાંતિ સ્થાપવા માટે કામ કરી રહ્યો છું અને એવું કંઈ કરવા નથી માગતો જેનાથી રશિયા વાટાઘાટોના ટેબલ પરથી દૂર થઈ જાય. બંધકો સંબંધિત વાટાઘાટોમાં સારી પ્રગતિ થઈ રહી છે." આ સાથે જ ટ્રમ્પે યુક્રેનના રાષ્ટ્રપતિ વોલોડીમીર ઝેલેન્સકી પર નિશાન સાધતા આક્ષેપ કર્યો હતો કે તેઓ બે વર્ષ પહેલાં રશિયા સાથે વધુ સારો શાંતિ કરાર કરવામાં નિષ્ફળ રહ્યા હતા.
ઇંધણ પુરવઠો અને દ્વિપક્ષીય ઊર્જા સહકાર
રશિયન રાષ્ટ્રપતિના સહાયક યુરી ઉશાકોવના જણાવ્યા અનુસાર, પુતિન અને ટ્રમ્પ વચ્ચેની વાતચીત અત્યંત મૈત્રીપૂર્ણ રહી હતી. યુક્રેન મુદ્દા ઉપરાંત બંને નેતાઓ વચ્ચે ઊર્જા સહકાર પર પણ ચર્ચા થઈ હતી. આ ચર્ચા બાદ ટ્રમ્પે જાહેરાત કરી હતી કે રશિયા તાત્કાલિક ધોરણે અમેરિકા અને વૈશ્વિક બજારો માટે 3,00,000 ટનથી વધુ ડીઝલનો પુરવઠો પૂરો પાડશે, અને આગામી મહિનાઓમાં વધુ જથ્થો મોકલવામાં આવશે. APEC સમિટમાં બંને નેતાઓની રૂબરૂ મુલાકાત શાંતિ પ્રક્રિયા માટે નિર્ણાયક સાબિત થઈ શકે છે.