Trump India tariffs: અમેરિકાની સુપ્રીમ કોર્ટે રાષ્ટ્રપતિ ટ્રમ્પ દ્વારા લાદવામાં આવેલા ઇમરજન્સી ટેરિફને 'ગેરબંધારણીય' જાહેર કરીને મોટો આંચકો આપ્યો છે. જોકે, આ નિર્ણયના ગણતરીના કલાકોમાં જ ટ્રમ્પે એક પ્રેસ કોન્ફરન્સ યોજીને આક્રમક તેવર બતાવ્યા હતા. તેમણે સ્પષ્ટ કર્યું હતું કે કોર્ટના આ આદેશની ભારત સાથેના દ્વિપક્ષીય વેપાર કરાર પર કોઈ અસર પડશે નહીં.
ભારત પહેલા આપણને લૂંટી રહ્યું હતું
આ પણ વાંચો
પ્રેસ કોન્ફરન્સ દરમિયાન ભારત-અમેરિકા વેપાર કરાર અંગે પૂછવામાં આવેલા પ્રશ્નના જવાબમાં ટ્રમ્પે લાક્ષણિક અંદાજમાં કહ્યું કે, "ભારત સાથેનો સોદો સ્પષ્ટ છે – તેમણે ટેરિફ ચૂકવવા પડશે. વડાપ્રધાન મોદી એક અદ્ભુત નેતા અને મારા સારા મિત્ર છે, પરંતુ તેઓ અમેરિકા સાથેના વેપારમાં અત્યંત હોશિયાર હતા. અગાઉ ભારત આપણને લૂંટી રહ્યું હતું, પરંતુ હવે અમે એક વાજબી કરાર પર પહોંચ્યા છીએ. આ કરારમાં કોઈ ફેરફાર થશે નહીં." ટ્રમ્પે ભારપૂર્વક જણાવ્યું હતું કે અમેરિકા હવે કોઈ પણ દેશને ટેક્સ વગર વેપાર કરવાની છૂટ આપશે નહીં, ભલે પછી તે મિત્ર દેશ કેમ ન હોય.
રશિયા અને તેલના મુદ્દે ભારતની પ્રશંસા
ભારત સાથેના સંબંધો વિશે વાત કરતા ટ્રમ્પે રશિયા-યુક્રેન યુદ્ધનો ઉલ્લેખ કર્યો હતો. તેમણે દાવો કર્યો કે, "ભારત રશિયા પાસેથી તેલ મેળવી રહ્યું હતું, પરંતુ મારી વિનંતી પર તેમણે રશિયા સાથેના કેટલાક સંબંધોમાં કાપ મૂક્યો છે. અમે આ ભયંકર યુદ્ધનો અંત લાવવા માંગીએ છીએ, જે દર મહિને હજારો નિર્દોષ લોકોનો ભોગ લઈ રહ્યું છે." ટ્રમ્પે આ બાબતને ભારત સાથેના મજબૂત વ્યૂહાત્મક સંબંધોના પુરાવા તરીકે રજૂ કરી હતી.
ભારત-પાકિસ્તાન યુદ્ધ અટકાવવાનો વિવાદાસ્પદ દાવો
ટ્રમ્પે ફરી એકવાર પોતાના જૂના દાવાનું પુનરાવર્તન કર્યું હતું કે તેમણે ટેરિફની ધમકી આપીને ભારત અને પાકિસ્તાન વચ્ચે પરમાણુ યુદ્ધ થતું અટકાવ્યું હતું.
- ટેરિફની ધમકી: ટ્રમ્પે કહ્યું, "ગયા ઉનાળામાં જ્યારે બંને દેશો વચ્ચે તણાવ હતો અને 10 વિમાનો તોડી પાડવામાં આવ્યા હતા, ત્યારે મેં ચેતવણી આપી હતી કે જો તમે યુદ્ધ કરશો તો અમેરિકા સાથે વેપાર ભૂલી જજો. મેં બંને દેશો પર 200 ટકા ટેરિફ લાદવાની ધમકી આપી હતી."
- શાંતિનો દાવો: ટ્રમ્પના મતે, આ આર્થિક દબાણને કારણે જ બંને દેશો શાંતિ માટે સંમત થયા હતા. તેમણે પાકિસ્તાનના વડાપ્રધાનના નિવેદનનો હવાલો આપીને કહ્યું કે તેમના હસ્તક્ષેપથી 30 મિલિયન લોકોના જીવ બચ્યા છે.
વેપાર જગત પર અસર
સુપ્રીમ કોર્ટના ચુકાદા બાદ અમેરિકાના ઉદ્યોગજગતમાં એવી આશા જાગી હતી કે ભારત અને અન્ય દેશોમાંથી આવતી વસ્તુઓ પર ટેરિફ ઘટશે, પરંતુ ટ્રમ્પના આ નિવેદને ફરીથી અનિશ્ચિતતા પેદા કરી છે. ટ્રમ્પનું વલણ સ્પષ્ટ કરે છે કે તેઓ કાયદાકીય અવરોધો છતાં 'અમેરિકા ફર્સ્ટ'ની નીતિ હેઠળ ઊંચા ટેરિફ જાળવી રાખવા માટે મક્કમ છે.
ભારતીય નિકાસકારો માટે આ સમાચાર ચિંતાજનક હોઈ શકે છે, કારણ કે આઈટી, ફાર્મા અને ટેક્સટાઇલ જેવા ક્ષેત્રો પર અમેરિકન ટેરિફની સીધી અસર પડે છે. હવે જોવાનું એ રહેશે કે ભારત સરકાર ટ્રમ્પના આ નિવેદન પર કેવી પ્રતિક્રિયા આપે છે અને આગામી સમયમાં વેપાર વાટાઘાટો કઈ દિશામાં આગળ વધે છે.