Pakistan Election: શુક્રવારે પાકિસ્તાનની નેશનલ એસેમ્બલીમાં ઈમરાન ખાનના સમર્થકોના વિરોધ વચ્ચે નવાઝ શરીફના પાકિસ્તાન મુસ્લિમ લીગ-નવાઝ (PML-N)ના નેતા સરદાર અયાઝ સાદિકને સ્પીકર અને બિલાવલ ભુટ્ટોની પાકિસ્તાન પીપલ્સ પાર્ટી (PPP)ના નેતા ગુલામ મુસ્તફા શાહને ડેપ્યુટી સ્પીકર તરીકે ચૂંટવામાં આવ્યા હતા. હવે વડાપ્રધાનની ચૂંટણી રવિવારે થશે અને રાષ્ટ્રપતિની ચૂંટણી 9 માર્ચે થશે.
PML-N નેતા સાદિકને કુલ 291 મતોમાંથી 199 વોટ મળ્યા અને તેમના હરીફ સુન્ની ઇત્તેહાદ કાઉન્સિલ (SIC)ના આમિર ડોગરને માત્ર 91 વોટ મળ્યા હતા. સાદિક ત્રીજી વખત આ પદ પર ચૂંટાયા છે. ડેપ્યુટી સ્પીકર તરીકે ચૂંટાયેલા શાહને 197 વોટ મળ્યા, જ્યારે તેમના પ્રતિસ્પર્ધી SICના જુનૈદ અકબરને 92 વોટ મળ્યા. આગામી તબક્કામાં શનિવારથી વડાપ્રધાનની ચૂંટણીની પ્રક્રિયા શરૂ થશે જે રવિવારે પૂર્ણ થશે.
પૂર્વ વડાપ્રધાન શહેબાઝ શરીફ બીજી વખત વડાપ્રધાન તરીકે ચૂંટાશે કારણ કે પીએમએલ-એન અને પીપીપી ગઠબંધન દ્વારા તેમને નોમિનેટ કરવામાં આવ્યા છે. 9મી માર્ચે યોજાનારી રાષ્ટ્રપતિની ચૂંટણીમાં પીપીપીના નેતા અને પૂર્વ રાષ્ટ્રપતિ આસિફ અલી ઝરદારીને ફરીથી ચૂંટવામાં આવે તેવી તમામ શક્યતાઓ છે.
વડાપ્રધાનપદની ચૂંટણી પહેલા એક મહત્વપૂર્ણ વિકાસમાં, PML-Nના સુપ્રીમો નવાઝ શરીફે શુક્રવારે જમીયત ઉલામા એ ઇસ્લામ ફઝલ (JUI-F) નેતા મૌલાના ફઝલુર રહેમાનને તેમના નિવાસસ્થાન પર મળ્યા હતા અને ગઠબંધન સરકાર માટે તેમનું સમર્થન માંગ્યું હતું. ફઝલુરે ગઠબંધન સરકારનો ભાગ બનવાનો ઇનકાર કર્યો હતો અને 8 ફેબ્રુઆરીએ યોજાયેલી ચૂંટણીના પરિણામો પર સવાલો ઉઠાવ્યા હતા.
ઝડપી અને વિશ્વસનીય સમાચારો માટે ડાઉનલોડ કરો ગુજરાતી જાગરણની ન્યૂઝ એપ.