Flydubai Flight Incident: ઈઝરાયલના પ્રધાનમંત્રી બેન્જામિન નેતન્યાહૂએ ફ્લાયદુબઈ (Flydubai) વિમાનમાં ઘટેલી ઘટનામાં ભારતીય પાયલોટ કેપ્ટન સ્મિત મછારની બહાદુરીની ભારે પ્રશંસા કરી છે. નેતન્યાહૂએ સોશિયલ મીડિયા પ્લેટફોર્મ 'X' પર પોસ્ટ કરીને તેમને સાચા હીરો ગણાવ્યા છે, અને તેમના ઝડપી તથા પૂર્ણ સ્વસ્થ થવાની કામના કરી છે.
અસાધારણ સાહસ: 174 લોકોનો જીવ બચાવ્યો
ઈઝરાયેલી પ્રધાનમંત્રી કાર્યાલય (PMO) દ્વારા 'એક્સ' પર શેર કરવામાં આવેલા નિવેદનમાં PM નેતન્યાહૂએ જણાવ્યું હતું કે, કેપ્ટન મછારે ગંભીર રીતે ઈજાગ્રસ્ત હોવા છતાં અસાધારણ સાહસ દર્શાવ્યું હતું. પાયલટ પર ચાકુ વડે હુમલો કરવામાં આવ્યો હતો, પરંતુ તેમણે હિંમતભેર હુમલાખોરનો સામનો કર્યો અને કોકપિટનો દરવાજો ખોલવામાં સફળ રહ્યા હતા.
દરવાજો ખુલ્યા બાદ વિમાનમાં સવાર મુસાફરો અને ક્રૂ મેમ્બર્સના સભ્યોએ હુમલાખોરને કાબૂમાં લેવામાં મદદ કરી હતી. પાયલોટની આ બહાદુરીપૂર્ણ કામગીરીથી એક સંભવિત મોટી વિમાન દુર્ઘટના ટળી ગઈ અને ઈઝરાયેલી નાગરિકો સહિત કુલ 174 લોકોના જીવ બચી શક્યા હતા.
ઈઝરાયેલના રાજદૂતે પણ પાયલોટની પ્રશંસા કરી
સાયપ્રસમાં ઈઝરાયેલના રાજદૂત રૂવેન અજારે પણ કેપ્ટન મછાર, વિમાનમાં સવાર મુસાફરો તેમજ ચાલક દળના સભ્યોની મુક્તકંઠે સરાહના કરી હતી. તેમણે કહ્યું હતું કે તમામ લોકોના સંયુક્ત સાહસથી વિમાનમાં સવાર લોકોના જીવ બચાવવામાં મદદ મળી હતી. આ ઘટના બાદ કેપ્ટન સ્મિત મછારની અદ્ભુત બહાદુરીની આંતરરાષ્ટ્રીય સ્તરે વ્યાપક ચર્ચા થઈ રહી છે.
રાષ્ટ્રપતિ ટ્રમ્પની પ્રતિક્રિયા: કહ્યું, 'હીરો જેવું કામ કર્યું'
આ ઘટના અંગે અમેરિકાના રાષ્ટ્રપતિ ડોનાલ્ડ ટ્રમ્પે પણ પોતાની પ્રતિક્રિયા આપી હતી. ટ્રમ્પે જણાવ્યું હતું કે, "મેં આ ઘટના અંગે બેન્જામિન નેતન્યાહૂ સાથે વાત કરી છે. એવું લાગે છે કે કો-પાયલોટ કદાચ કોઈ આતંકવાદી અથવા સનકી કિસ્મનો માણસ હતો, અને તેણે પાયલોટને ચાકુ મારી દીધું હતું. પાયલોટની હાલત ખૂબ જ ખરાબ હતી... પરંતુ એક રીતે, દરવાજો ખોલીને તેમણે હીરો જેવું કામ કર્યું છે."