Nepal Earthquake News: કુદરતી આફતો સામે ઝૂઝી રહેલા પડોશી દેશ નેપાળ પર મુશ્કેલીઓનો પહાડ તૂટી પડ્યો છે. તાજેતરમાં જ આવેલા વિનાશક પૂર અને ભેખડો ધસી પડવાની (લેન્ડસ્લાઈડ) ઘટનાઓમાંથી દેશ હજુ બહાર પણ નહોતો આવ્યો, ત્યાં મંગળવારે મોડી રાત્રે ભૂકંપના તીવ્ર આંચકાથી આખો દેશ ધ્રૂજી ઊઠ્યો હતો. રાષ્ટ્રીય ભૂકંપ વિજ્ઞાન કેન્દ્ર (NCS)ના જણાવ્યા અનુસાર, આ ભૂકંપની તીવ્રતા રિક્ટર સ્કેલ પર 5 માપવામાં આવી છે.
રાત્રિના સમયે અચાનક આંચકા અનુભવાતા જ પૂરથી પ્રભાવિત વિસ્તારો સહિત અનેક શહેરોમાં લોકો ભયના માર્યા ઘરોની બહાર દોડી આવ્યા હતા.
તિબેટમાં થયેલી હલચલની અસર
મળતી માહિતી મુજબ, નેપાળમાં ભૂકંપ આવવાના થોડા કલાકો પહેલા જ પડોશી ક્ષેત્ર તિબેટમાં 5.3ની તીવ્રતાનો ભૂકંપ નોંધાયો હતો. હિમાલયન ફોલ્ટ લાઇન પર સતત થઈ રહેલી પ્લેટોની હલચલને કારણે આ ક્ષેત્રમાં વારંવાર આંચકા આવી રહ્યા છે. આ પહેલા પણ તિબેટમાં 5ની તીવ્રતાનો ભૂકંપ આવ્યો હતો, જેના લીધે સમગ્ર સરહદી વિસ્તારમાં સતર્કતા વધારી દેવામાં આવી છે.
પૂરે મચાવી છે ભારે તબાહી: 1350થી વધુ મોત
અગાઉ આવેલા વિનાશક પૂરના કારણે નેપાળમાં અત્યાર સુધીમાં 1,357 લોકો પોતાના જીવ ગુમાવી ચૂક્યા છે. જ્યારે 5,300થી વધુ લોકો હજુ પણ ગુમ હોવાના અહેવાલ છે. વહીવટીતંત્ર દ્વારા અત્યાર સુધીમાં 13,500થી વધુ લોકોને સુરક્ષિત સ્થળે ખસેડવામાં આવ્યા છે, પરંતુ સતત ખરાબ હવામાન અને ભૂકંપના કારણે રાહત કામગીરીમાં ભારે વિઘ્નો આવી રહ્યા છે.
હાઇડ્રોપાવર સુરંગોમાં કર્મચારીઓ ફસાયા: ભારતીય ટીમો મેદાનમાં
પૂરની હોનારત બાદ નેપાળના 9 જિલ્લાઓમાં આવેલા હાઇડ્રોપાવર પ્રોજેક્ટ્સને ભારે નુકસાન પહોંચ્યું છે.
રસુવા જિલ્લાના ચિલિમે હાઇડ્રોપાવર પ્રોજેક્ટની સુરંગોમાં આશરે 121 લોકો ફસાયા હોવાની ભીતિ છે.
સુરંગોની અંદર વેન્ટિલેશન સિસ્ટમ, આરામ કરવાની જગ્યાઓ અને રસોડાની સુવિધા હોવાથી રેસ્ક્યુ ટીમને હજુ પણ કર્મચારીઓ જીવિત હોવાની આશા છે.
આ અત્યંત જટિલ બચાવ કામગીરી માટે ભારતીય ટનલ નિષ્ણાતો (Tunnel Experts)ની એક ખાસ ટીમ નેપાળ પહોંચી ગઈ છે. આ સિવાય ઓસ્ટ્રેલિયાના જાણીતા ટનલ એક્સપર્ટ અર્નોલ્ડ ડિક્સ પણ આ મિશનમાં મદદ કરી રહ્યા છે.
પૂરના કારમા પ્રહાર બાદ હવે ભૂકંપના આંચકાઓએ નેપાળની જનતા અને સ્થાનિક તંત્રની ચિંતામાં ભારે વધારો કરી દીધો છે.