Nepal Landslide News: ઉત્તરાખંડના પિથોરાગઢ જિલ્લાની સરહદે આવેલા નેપાળના દારચુલા જિલ્લામાં કુદરતી આપત્તિના કારણે ગંભીર સંકટ ઊભું થયું છે. સતત ભારે વરસાદ વચ્ચે અપી હિમાલ ગામની ઉપર આવેલી ટેકરી પર ભયાનક ભૂસ્ખલન થતાં ચૌલાની નદીનો પ્રવાહ આંશિક રીતે રોકાઈ ગયો છે. નદીમાં મોટી માત્રામાં કાટમાળ ખાબકવાથી કુદરતી બંધ જેવી સ્થિતિ સર્જાઈ છે, જેના કારણે નીચાણવાળા વિસ્તારોમાં અચાનક પૂર આવવાનું જોખમ વધી ગયું છે.
15 પરિવારોનું સ્થળાંતર કરાયું
અપી હિમાલ ગ્રામીણ મ્યુનિસિપાલિટીના ભટ્ટાર વિસ્તારમાં શુક્રવારે બપોરે આ ટેકરી ધરાશાયી થઈ હતી. ઘટનાની ગંભીરતાને ધ્યાનમાં રાખીને વહીવટીતંત્રે તાત્કાલિક સાવચેતીના પગલાં ભર્યા છે. ભટ્ટાર ગામના 15થી વધુ પરિવારોને તાત્કાલિક સુરક્ષિત સ્થળે ખસેડવામાં આવ્યા છે. તેમજ વિસ્તારમાં આવેલા ત્રણ સ્થાનિક જળવિદ્યુત પ્રોજેક્ટ્સના કર્મચારીઓ અને મજૂરોને સુરક્ષિત જગ્યાએ ખસી જવાની કડક સૂચના આપવામાં આવી છે. અને દારચુલા જિલ્લા વહીવટી કાર્યાલયે ચેતવણી જારી કરી છે કે જો વધુ ભૂસ્ખલન થશે તો નદી સંપૂર્ણપણે બંધ થઈ શકે છે. સ્થિતિ પર નજર રાખવા સુરક્ષા કર્મચારીઓને તૈનાત કરાયા છે.
મુખ્યમંત્રી ખગરાજ ભટ્ટનો હાઇ એલર્ટનો આદેશ
સુદુરપશ્ચિમ પ્રાંતના મુખ્યમંત્રી ખગરાજ ભટ્ટે સ્થાનિક વહીવટીતંત્ર અને સુરક્ષા એજન્સીઓને ઉચ્ચ સ્તરીય એલર્ટ પર રહેવાનો નિર્દેશ આપ્યો છે. કોઈ પણ કટોકટીનો સામનો કરવા માટે કંટ્રોલ રૂમ અને ઈમરજન્સી હેલ્પલાઈન નંબરો જારી કરવામાં આવ્યા છે. નદી કિનારે વસતા લોકોને સાવચેત રહેવા અને સુરક્ષિત સ્થળોએ ખસી જવા અપીલ કરાઈ છે.
હવામાન પરિવર્તન હિમાલય ક્ષેત્ર માટે બન્યું ખતરો
પર્યાવરણ નિષ્ણાતોના મતે, આબોહવા પરિવર્તનને કારણે હિમાલયનું નાજુક પર્યાવરણ ઝડપથી અસ્થિર બની રહ્યું છે. વધતા તાપમાનને કારણે હિમનદીઓ પીગળી રહી છે અને પર્માફ્રોસ્ટ નબળો પડી રહ્યો છે. આ કારણોસર પર્વતીય ઢોળાવ નબળા પડી રહ્યા છે અને નેપાળમાં ભૂસ્ખલન, હિમનદી પતન તેમજ નદીઓમાં કાટમાળ જમા થવાના જોખમો ચિંતાજનક રીતે વધી રહ્યા છે.