Microsoft 365 Outage: વૈશ્વિક સ્તરે ટેક્નોલોજી ક્ષેત્રે મોટો હંગામો મચી ગયો છે, કારણ કે માઇક્રોસોફ્ટ 365 (Microsoft 365) ની સેવાઓમાં અચાનક વૈશ્વિક સ્તરે મોટો વિક્ષેપ સર્જાયો છે. આ ટેક્નિકલ ખામીના કારણે દુનિયાભરના લાખો વપરાશકર્તાઓ પ્રભાવિત થયા છે અને અનેક મોટી કંપનીઓ તેમજ સરકારી સંસ્થાઓનું દૈનિક કામકાજ થંભી ગયું છે. આ ખામીની વ્યાપક અસરને કારણે કેટલીક ફ્લાઈટ્સ પણ રદ કરવી પડી હોવાના અહેવાલો સામે આવ્યા છે.
12 નવેમ્બરની મોડી રાતથી સેવાઓ થઈ ઠપ
પ્રાપ્ત માહિતી અનુસાર, આ વિક્ષેપ 12 નવેમ્બરની મોડી રાતથી શરૂ થયો હતો. આ ટેક્નિકલ સમસ્યાના કારણે વિશ્વભરના લાખો લોકો Outlook ઈમેલ, Teams મીટિંગ ટૂલ્સ અને આધુનિક ઓફિસ કામગીરી માટે અત્યંત જરૂરી એવી અન્ય મહત્વપૂર્ણ ક્લાઉડ સેવાઓનો ઉપયોગ કરી શકતા નથી. માત્ર યુનાઇટેડ સ્ટેટ્સ જ નહીં, પરંતુ ભારત, જાપાન અને અન્ય ઘણા દેશોમાં ખાનગી ક્ષેત્રો, બેંકો, સરકારી વિભાગો અને અદાલતોની કામગીરી પર પણ તેની માઠી અસર જોવા મળી છે.
સાયબર હુમલા કે 'Rogue AI' ની અટકળો પર માઇક્રોસોફ્ટનો ખુલાસો
આટલા મોટા પાયે સર્જાયેલા ડાઉનટાઇમને કારણે સોશિયલ મીડિયા પર વિવિધ પ્રકારની અટકળો અને દાવાઓનો દોર શરૂ થઈ ગયો હતો. કેટલાક લોકોએ શંકા વ્યક્ત કરી હતી કે આ કોઈ મોટો સાયબર હુમલો હોઈ શકે છે, જ્યારે અન્યોએ એવું અનુમાન લગાવ્યું હતું કે કદાચ કોઈ AI એજન્ટ 'અનિયંત્રિત' થઈ ગયો હશે.
જોકે, માઇક્રોસોફ્ટે આ તમામ વાયરલ દાવાઓને સદંતર ફગાવી દીધા છે અને સ્પષ્ટ કર્યું છે કે આ ઘટના પાછળ કોઈ દૂષિત પ્રવૃત્તિ કે સાયબર હુમલાના કોઈ પુરાવા નથી. માઇક્રોસોફ્ટમાં 'કોપાયલોટ', એજન્ટ્સ અને પ્લેટફોર્મ્સના એક્ઝિક્યુટિવ વાઇસ પ્રેસિડેન્ટ ચાર્લ્સ લામાન્નાએ એક સોશિયલ મીડિયા પોસ્ટમાં જણાવ્યું હતું કે, "આ વિક્ષેપને કારણે અમારા ગ્રાહકોને જે અસુવિધા પડી છે તે બદલ અમે દિલગીર છીએ અને સમસ્યાને ઝડપથી ઉકેલવા માટે અમારી ટીમ યુદ્ધના ધોરણે કામ કરી રહી છે."
સેવાઓ પૂર્વવત કરવા માટેના પ્રયાસો ચાલુ
માઇક્રોસોફ્ટ દ્વારા આપવામાં આવેલી સત્તાવાર માહિતી મુજબ, સેવાઓને વધુ બહેતર બનાવવા માટે જે ફેરફારો કરવામાં આવ્યા હતા, તેની અસરની સમીક્ષા કરવામાં આવી રહી છે અને પ્રાથમિક તપાસમાં જણાયું છે કે આ ફેરફારો અપેક્ષિત પરિણામો આપી રહ્યા નથી. નેટવર્ક ટ્રાફિકમાં સતત અસંતુલન જોવા મળી રહ્યું છે, જેને પહોંચી વળવા અને ક્ષમતા વધારવા માટે કંપની અન્ય વિકલ્પો પર ગંભીરતાથી વિચાર કરી રહી છે.
કંપનીએ પ્રભાવિત યુઝર્સ અને એડમિનિસ્ટ્રેટર્સને અપડેટ્સ મેળવવા માટે Microsoft 365 એડમિન સેન્ટરમાં આપવામાં આવેલા આઈડી (EX1550543 અને MO1550821) ચકાસવા અથવા અધિકૃત લિંક https://msft.it/6013xBHsf ની મુલાકાત લેવા અનુરોધ કર્યો છે.