Russia Ukraine War: રશિયામાં ચાલી રહેલી સંસદીય ચૂંટણીના અંતિમ ચરણ અને મતદાનના માહોલ વચ્ચે યુક્રેને રશિયાની રાજધાની મોસ્કો અને તેની આસપાસના વિસ્તારો પર અત્યાર સુધીનો સૌથી મોટો એર સ્ટ્રાઈક કર્યો છે. આ ભીષણ હુમલામાં રશિયાની એર ડિફેન્સ સિસ્ટમે હવામાં જ સેંકડો ડ્રોનને તોડી પાડ્યા હોવા છતાં અનેક ડ્રોન પોતાના નિશાન પર સફળ રહ્યા હતા, જેના કારણે મોસ્કોમાં ભારે તારાજી સર્જાઈ છે.
એર ડિફેન્સ સિસ્ટમ છતાં વ્યાપક નુકસાન
સ્થાનિક અને સત્તાવાર સૂત્રોના જણાવ્યા અનુસાર, યુક્રેન તરફથી છોડવામાં આવેલા 1,600થી વધુ ડ્રોનને રશિયન એર ડિફેન્સ સિસ્ટમે હવામાં જ રોકીને નાશ કર્યો હતો. જોકે, તેમાંથી અંદાજે 450 જેટલા ડ્રોન સીધા મોસ્કો શહેરને જ નિશાન બનાવીને આગળ વધ્યા હતા. મોસ્કો ક્ષેત્રના ગવર્નર આન્દ્રે વોરોબ્યોવ(Andrey Vorobyov) દ્વારા આપવામાં આવેલી માહિતી મુજબ, આ ઘાતક હુમલામાં મોસ્કો પ્રદેશમાં બે નાગરિકોના મોત થયા છે જ્યારે 20થી વધુ લોકો ગંભીર રીતે ઘાયલ થયા છે. હુમલાની તીવ્રતા એટલી વધારે હતી કે મોસ્કોની એક મુખ્ય તેલ રિફાઇનરી (Oil Refinery) અને એક રહેણાંક ઇમારતને ગંભીર ક્ષતિ પહોંચી છે.
21 માળની ઇમારતમાં આગ અને 400 લોકોનું સ્થળાંતર
આ ભીષણ હુમલા દરમિયાન એક વિસ્ફોટક ડ્રોન મોસ્કોની એક 21-માળની ઊંચી રહેણાંક ઇમારત સાથે અથડાયું હતું, જેના કારણે તેમાં ભીષણ આગ લાગી ગઈ હતી. પરિસ્થિતિની ગંભીરતાને પારખીને તાત્કાલિક રાહત અને બચાવ ટીમોએ દોડી આવીને બિલ્ડિંગમાં ફસાયેલા લગભગ 400 જેટલા રહેવાસીઓને સુરક્ષિત બહાર કાઢ્યા હતા. આ ઉપરાંત, યુક્રેનના કબજા હેઠળના ખેરસોન વિસ્તારમાં ચૂંટણી આયોગ (Election Commission) ના એક સભ્ય સહિત બે લોકોની બસ પર થયેલા ડ્રોન હુમલામાં મોત થયાની પુષ્ટિ પણ કરવામાં આવી છે.
ચૂંટણીને પ્રભાવિત કરવાનો કિવ (Kyiv)નો પ્લાન
મોસ્કોના મેયર સરગેઇ સોબયાનિન (Sergey Sobyanin) એ આ ઘટના અંગે પ્રતિક્રિયા આપતા જણાવ્યું હતું કે, આ હુમલો સંપૂર્ણપણે રાજકીય અને પૂર્વઆયોજિત હતો. ફેબ્રુઆરી 2022થી ચાલી રહેલા યુદ્ધ વચ્ચે રશિયામાં યોજાઈ રહેલા આ મહત્વપૂર્ણ ચૂંટણી માહોલને ડહોળવા અને અવરોધ ઊભો કરવાના હેતુથી જ આ હુમલાને અંજામ આપવામાં આવ્યો હતો. જોકે, તેમણે દાવો કર્યો હતો કે દુશ્મન દેશ પોતાના આ નાપાક મસૂબામાં સંપૂર્ણપણે સફળ થઈ શક્યો નથી. રિફાઇનરીના પરિસરમાં નુકસાન થયા બાદ તાત્કાલિક ધોરણે ઇમરજન્સી સેવાઓ કામે લાગી ગઈ હતી.
યુક્રેનિયન રાષ્ટ્રપતિ વોલોડીમિર ઝેલેન્સ્કીનું નિવેદન
બીજી બાજુ, યુક્રેનના રાષ્ટ્રપતિ વોલોડીમિર ઝેલેન્સ્કીએ પોતાની સૈન્ય કાર્યવાહીની પ્રશંસા કરતા તેને રશિયાની "યુદ્ધ મશીનરી" અને તેની આર્થિક કરોડરજ્જુ પરનો મોટો પ્રહાર ગણાવ્યો છે. સોશિયલ મીડિયા પ્લેટફોર્મ 'એક્સ' પર પોતાના નિવેદનમાં તેમણે સ્પષ્ટ કર્યું કે આ અભિયાન રશિયાના ઊર્જા માળખાને અને ઓઇલની આવકને ધ્વસ્ત કરવાનો એક ભાગ છે, જેની ફંડિંગથી રશિયા પોતાના સૈન્ય અભિયાનો ચલાવે છે. યુક્રેને આ મિશન માટે સ્વદેશી ટેકનોલોજીથી વિકસિત ડ્રોન અને મિસાઇલોનો ઉપયોગ કર્યો હોવાનું પણ સામે આવ્યું છે.
પુતિનના શાસનમાં રશિયા માટે આ ચૂંટણી સમયનો હુમલો સુરક્ષા વ્યવસ્થા સામે મોટા સવાલો ઊભા કરી રહ્યો છે, ત્યારે આ યુદ્ધ હવે વધુ ભીષણ વળાંક લઈ રહ્યું છે.