Longest Solar Eclipse; ખગોળશાસ્ત્ર અને અંતરિક્ષ વિજ્ઞાનમાં રસ ધરાવતા લોકો માટે એક રોમાંચક સમાચાર સામે આવ્યા છે. 2 ઓગસ્ટ, 2027 ના રોજ આકાશમાં એક અત્યંત દુર્લભ અને અદ્ભુત ખગોળીય ઘટના આકાર લેવા જઈ રહી છે. આ દિવસે 21મી સદીના સૌથી લાંબા પૂર્ણ સૂર્યગ્રહણમાંથી એક જોવા મળશે, જે તેના સંપૂર્ણતાના માર્ગ પર સતત છ મિનિટથી પણ વધુ સમય માટે દિવસને રાતમાં ફેરવી દેશે.
આકાશમાં સર્જાશે અદ્ભુત દ્રશ્ય
નાસા અને અગ્રણી ખગોળશાસ્ત્રીઓના જણાવ્યા અનુસાર, આ પૂર્ણ સૂર્યગ્રહણ દરમિયાન ચંદ્ર પૃથ્વીની ખૂબ નજીક હોવાથી તે સૂર્યને સંપૂર્ણપણે ઢાંકી દેશે. આ ઘટના દરમિયાન પૃથ્વી પર અચાનક ગાઢ અંધારું છવાઈ જશે, તાપમાનમાં પણ નોંધપાત્ર ઘટાડો અનુભવાશે અને આકાશમાં તેજસ્વી તારાઓ સ્પષ્ટપણે દેખાવા લાગશે. સૌથી અદ્ભુત દ્રશ્ય સૂર્યનો ચમકતો બાહ્ય ભાગ એટલે કે 'કોરોના' રહેશે, જે સ્પષ્ટપણે જોઈ શકાશે. ઇજિપ્તના લુક્સર શહેર નજીક આ ગ્રહણનો મહત્તમ સમયગાળો 6 મિનિટ અને 23 સેકન્ડ નોંધવામાં આવશે.
વિશ્વમાં ક્યાં-ક્યાં દેખાશે આ પૂર્ણ ગ્રહણ?
આ સૂર્યગ્રહણની સંપૂર્ણતાનો માર્ગ એટલાન્ટિક મહાસાગર પરથી શરૂ થશે. ત્યારબાદ તે દક્ષિણ સ્પેન, જિબ્રાલ્ટર, મોરોક્કો, અલ્જેરિયા, ટ્યુનિશિયા, લિબિયા, ઇજિપ્ત, સાઉદી અરેબિયા, યમન અને સોમાલિયા જેવા દેશો પરથી પસાર થશે. લુક્સર, જેદ્દાહ, મક્કા અને બેનગાઝી જેવા પ્રમુખ શહેરોમાં લોકો આ ઐતિહાસિક તસવીરના સાક્ષી બનશે.
ભારતમાં કેવો રહેશે પ્રભાવ?
ભારતમાં આ ખગોળીય ઘટના 'પૂર્ણ' સૂર્યગ્રહણ તરીકે નહીં, પરંતુ આંશિક સૂર્યગ્રહણ તરીકે જોવા મળશે. દેશના અલગ-અલગ ભાગોમાંથી ચંદ્ર સૂર્યના માત્ર એક ચોક્કસ ભાગને જ ઢાંકતો નજરે પડશે.
વર્ષ 2009 પછી જમીન પરથી આટલા લાંબા સમયગાળાનું પૂર્ણ સૂર્યગ્રહણ સરળતાથી જોવા મળ્યું નથી. ચંદ્ર પોતાના ભ્રમણકક્ષામાં પૃથ્વીની નજીક અને સૂર્ય પ્રમાણમાં દૂર હોવાને કારણે આ લાંબો સમયગાળો સર્જાશે. આગામી અનેક દાયકાઓ સુધી આટલો લાંબો સમયગાળો ધરાવતું સૂર્યગ્રહણ ફરી જોવા મળશે નહીં.
વૈજ્ઞાનિકોની ચેતવણી અને સલાહ
નિષ્ણાતો અને વૈજ્ઞાનિકોએ ચેતવણી આપતા જણાવ્યું છે કે, સૂર્યગ્રહણને ક્યારેય ખુલ્લી આંખે કે સામાન્ય સનગ્લાસ પહેરીને ન જોવું જોઈએ, કારણ કે તેનાથી આંખોને કાયમી નુકસાન થઈ શકે છે. ગ્રહણ જોવા માટે માત્ર પ્રમાણિત સોલર ઈવેન્ટ ગ્લાસ (સૌર ચશ્મા) નો જ ઉપયોગ કરવો સલાહભર્યો છે. ખગોળશાસ્ત્રના ઈતિહાસમાં આ દિવસ સુવર્ણ અક્ષરે લખાશે.