Jaishankar on Russia Oil: રશિયા અને યુક્રેન વચ્ચે ચાલી રહેલા યુદ્ધ અને રશિયન ક્રૂડ ઓઇલની ખરીદી પર પશ્ચિમના દેશોના દબાણ વચ્ચે ભારતના વિદેશ મંત્રી એસ. જયશંકરે મોટું નિવેદન આપ્યું છે. યુક્રેનની રાજધાની કીવની મુલાકાત દરમિયાન તેમણે સ્પષ્ટ કર્યું છે કે રશિયા પાસેથી ઓઇલની ખરીદી રોકવાથી આ જટિલ સંઘર્ષનો ઉકેલ આવી શકે નહીં. યુદ્ધનો અંત માત્ર કૂટનીતિ, મધ્યસ્થતા અને પરસ્પર વાતચીતથી જ શક્ય બનશે.
અમેરિકાના સંભવિત પ્રતિબંધો પર સણસણતો જવાબ
યુક્રેનમાં પત્રકારો દ્વારા પૂછવામાં આવ્યું કે જો અમેરિકા રશિયા પાસેથી ઓઇલ ખરીદતા દેશો પર વધુ સખત પ્રતિબંધો કે સેન્ક્શન્સ (Sanctions) લગાવે, તો શું ભારત રશિયન ક્રૂડ ઓઇલ આયાતમાં ઘટાડો કરશે?
આ સવાલનો જવાબ આપતા જયશંકરે કહ્યું- આ યુદ્ધ આજે તેના પાંચમા વર્ષમાં પ્રવેશી ચૂક્યું છે. ઓઇલ, એલ્યુમિનિયમ, મિનરલ્સ, મેટલ્સ કે ફર્ટિલાઇઝર (ખાતર) જેવી ચીજો ખરીદવાથી કે ન ખરીદવાથી આ સંઘર્ષ ઉકેલાવાનો નથી. બંને દેશો ટેબલ પર બેસીને ચર્ચા કરશે ત્યારે જ શાંતિ સ્થપાશે. ભારત હંમેશા કૂટનીતિક સંવાદનો પક્ષધર રહ્યો છે અને આગળ પણ તેને જ પ્રોત્સાહન આપશે.
વિદેશ મંત્રીએ વધુમાં કહ્યું કે- ભારતે આંતરરાષ્ટ્રીય મંચો પર અગાઉ પણ સ્પષ્ટ કર્યું છે કે દેશના 140 કરોડ નાગરિકો માટે સસ્તું અને સુરક્ષિત ઈંધણ પૂરું પાડવું એ ભારતનું રાષ્ટ્રીય હિત છે અને તેમાં કોઈ બાંધછોડ કરવામાં આવશે નહીં.
યુદ્ધ વચ્ચે પણ ભારત-યુક્રેન વેપાર મજબૂત
બે દેશો વચ્ચેના દ્વિપક્ષીય સંબંધો અને વેપાર પર વાત કરતા વિદેશ મંત્રીએ જણાવ્યું હતું કે ભારત અને યુક્રેન વચ્ચેનો વેપાર માત્ર એક ક્ષેત્ર પૂરતો સીમિત નથી, પરંતુ તે અનેક ક્ષેત્રોમાં વિસ્તરેલો છે.
મુખ્ય ક્ષેત્રો: ફાર્માસ્યુટિકલ્સ (દવાઓ), ખાદ્ય અને કૃષિ ઉત્પાદનો, ફર્ટિલાઇઝર, મશીનરી, કેમિકલ્સ અને કન્ઝ્યુમર ગુડ્સ.
જમીની પડકારો: યુદ્ધની સ્થિતિ અને લોજિસ્ટિક્સ (માલસામાનની હેરફેર) ના કાર્યોમાં આવેલી મુશ્કેલીઓને કારણે છેલ્લા ચાર વર્ષમાં વેપારમાં કેટલાક અવરોધો જરૂર આવ્યા છે, છતાં બંને દેશો આર્થિક સંબંધો જાળવી રાખવા પ્રયત્નશીલ છે.
જયશંકરનું આ નિવેદન એ વાતની સાબિતી છે કે ભારત પોતાની વિદેશ નીતિ અને ઉર્જા જરૂરિયાતો અંગે ગમે તેવા વૈશ્વિક દબાણ સામે પણ તટસ્થ અને મક્કમ વલણ જાળવી રાખશે.