Israel Lebanon Attack: મધ્ય પૂર્વમાં ચાલી રહેલો તણાવ થમવાનું નામ લઈ રહ્યો નથી. અમેરિકાની મધ્યસ્થતાથી થયેલા યુદ્ધવિરામ છતાં ઇઝરાયલે સોમવારે ફરી એકવાર કરારનો ભંગ કરીને દક્ષિણ લેબનોન પર ભયાનક બોમ્બમારો શરૂ કર્યો છે. ઇઝરાયલની સરહદ નજીક આવેલા આ દક્ષિણી વિસ્તારમાં થયેલા ભીષણ હુમલામાં 12 લોકોના મોત થયા છે જ્યારે અન્ય પાંચ લોકો ગંભીર રીતે ઘાયલ થયા છે. ઉલ્લેખનીય છે કે, આ અગાઉ રવિવારે પણ દક્ષિણ લેબનોનમાં ઇઝરાયલી હુમલા દરમિયાન સાત લોકોએ પોતાના જીવ ગુમાવ્યા હતા.
ફાર રુમ્માન શહેરમાં રહેણાંક ઇમારતો પર હવાઈ હુમલો
તાજેતરમાં થયેલા આ હુમલામાં ઇઝરાયલી લડાકુ વિમાનોએ લેબનોનના ફાર રુમ્માન શહેરને નિશાન બનાવ્યું હતું. અહીંની રહેણાંક ઇમારતો પર કરવામાં આવેલા બોમ્બમારામાં બે નિર્દોષ બાળકો સહિત કુલ 10 લોકોના મોત નીપજ્યા હતા. આ જ શહેરમાં એક અન્ય ઘટનામાં ઇઝરાયલી ડ્રોન દ્વારા એક કારને નિશાન બનાવીને હુમલો કરવામાં આવ્યો હતો, જેમાં કારમાં સવાર વધુ બે લોકો માર્યા ગયા હતા.
ઇઝરાયલી લશ્કરનો દાવો અને આક્રમક રણનીતિ
બીજી તરફ, ઇઝરાયલી લશ્કરી પ્રવક્તાએ આ હુમલા અંગે સ્પષ્ટતા આપતા જણાવ્યું હતું કે, સૈન્ય દ્વારા નાગરિકોને તે વિસ્તાર તાત્કાલિક ખાલી કરી દેવાની ચેતવણી આપવામાં આવી હતી. ઇઝરાયલી સૈન્યના જણાવ્યા અનુસાર, તેમણે શિયા સશસ્ત્ર જૂથ હિઝબુલ્લાહના સક્રિય સ્થાનો અને તેના લડવૈયાઓને જ નિશાન બનાવીને આ કાર્યવાહી કરી હતી.
યુદ્ધવિરામ છતાં સતત હુમલા
જોકે જૂન મહિનાથી યુએસ-મધ્યસ્થી દ્વારા લેબનોનમાં યુદ્ધવિરામ અમલમાં મૂકવામાં આવ્યો છે, છતાં ઇઝરાયલ હિઝબુલ્લાહના ઠેકાણાઓને નિશાન બનાવવાના નામે વારંવાર તેનું ઉલ્લંઘન કરી રહ્યું છે. સંરક્ષણ નિષ્ણાતો એવું માની રહ્યા છે કે ઇઝરાયલ દક્ષિણ લેબનોન પર સંપૂર્ણપણે કબજો કરવાની યોજના બનાવી રહ્યું છે.
આંકડાઓ પર નજર કરીએ તો, છેલ્લા છ મહિનામાં જ ઇઝરાયલી હુમલાઓને કારણે લેબનોનમાં 4,300 થી વધુ લોકોના મોત થયા છે. જો ઓક્ટોબર 2023 થી અત્યાર સુધીનો કુલ મૃત્યુઆંક ગણવામાં આવે તો આ આંકડો 10,000 ને પાર પહોંચી ગયો છે, જે સમગ્ર વિસ્તારમાં સર્જાયેલી માનવતાવાદી કટોકટી દર્શાવે છે.