US Iran Peace Deal: પશ્ચિમ એશિયામાં લાંબા સમયથી ચાલી રહેલા અમેરિકા અને ઈરાન વચ્ચેના ભયંકર સૈન્ય સંઘર્ષનો હવે સુખદ અંત આવવાના સંકેતો મળી રહ્યા છે. અમેરિકી પ્રમુખ ડોનાલ્ડ ટ્રમ્પની ઓચિંતી જાહેરાત બાદ ઈરાને પણ પુષ્ટિ કરી છે કે બંને દેશો હવે યુદ્ધના મેદાનને છોડી વાટાઘાટોના ટેબલ પર આવવા સંમત થયા છે. જોકે, ઈરાને સ્પષ્ટ કર્યું છે કે આ શાંતિ પ્રક્રિયા અમેરિકા પરના વિશ્વાસને આધારે નહીં, પરંતુ ઈરાનની લશ્કરી તાકાતને કારણે શક્ય બની છે.
ટ્રમ્પની 'ટ્રુથ સોશિયલ' પર જાહેરાત અને હોર્મુઝ સ્ટ્રેટ
ડોનાલ્ડ ટ્રમ્પે તેમના સોશિયલ મીડિયા પ્લેટફોર્મ 'ટ્રુથ સોશિયલ' પર આ ઐતિહાસિક સોદાની જાહેરાત કરતા લખ્યું કે, ઈરાન સાથેનો કરાર પૂર્ણ થઈ ગયો છે. તેમણે હોર્મુઝ સ્ટ્રેટ પરથી અમેરિકી નૌકાદળની નાકાબંધી તાત્કાલિક હટાવવાનો આદેશ આપતા વિશ્વભરના ઓઇલના જહાજોને પોતાનો વેપાર ફરી શરૂ કરવા આમંત્રણ આપ્યું છે. ટ્રમ્પે ભારપૂર્વક જણાવ્યું કે, "હવે તેલને વહેવા દો".
ઈરાનની ત્રણ કડક શરતો
શાંતિ કરારને સમર્થન આપવા છતાં ઈરાનના નાયબ વિદેશ પ્રધાન કાઝેમ ઘરીબબાદીએ અત્યંત મક્કમ વલણ અપનાવ્યું છે. ઈરાને શરત મૂકી છે કે જો અમેરિકા પહેલા તેના પર લાદવામાં આવેલા તમામ આર્થિક પ્રતિબંધો હટાવે, દરિયાઈ નાકાબંધી દૂર કરે અને જપ્ત કરેલી ઈરાની સંપત્તિ (ભંડોળ) પરત કરે, તો જ તેઓ વાટાઘાટોમાં આગળ વધશે. ઘરીબબાદીએ ચેતવણી આપી છે કે ઈરાન આંધળો વિશ્વાસ કરવાને બદલે અમેરિકાના દરેક પગલા પર નજીકથી નજર રાખશે.
19 જૂને સ્વિટ્ઝર્લૅન્ડમાં સત્તાવાર બેઠક
આ કરારના માળખાને આખરી ઓપ આપવા માટે આગામી શુક્રવાર, 19 જૂનના રોજ બંને દેશોના પ્રતિનિધિમંડળો વચ્ચે સ્વિટ્ઝર્લૅન્ડમાં એક સત્તાવાર બેઠક યોજાશે. આ બેઠકમાં હસ્તાક્ષર થયા બાદ કરારની સંપૂર્ણ વિગતો જાહેર કરવામાં આવશે. ઈરાની મંત્રીએ આ જીતને તેમના શહીદોના લોહી અને લશ્કરી સિદ્ધિઓનું પરિણામ ગણાવ્યું છે. જો અમેરિકા આગામી 60 દિવસમાં પોતાની પ્રારંભિક શરતો પૂર્ણ કરશે, તો જ ઈરાન અંતિમ રાઉન્ડની વાટાઘાટોમાં ભાગ લેશે તેમ પણ જણાવવામાં આવ્યું છે.